କେନ୍ଦୁଝର,୧୬ା୯(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲାରେ ସ୍କ୍ରବ୍ ଟାଇଫସ ରୋଗୀଙ୍କ ସଂଖ୍ୟା ବଢୁଛି। ବିଶେଷ କରି ଚାଷୀ, ମୂଲିଆ ଲୋକମାନେ ବେଶି ଏହି ରୋଗରେ ଆକ୍ରାନ୍ତ ହେଉଥିବା ଜଣାପଡ଼ିଛି। ଜିଲାରେ ୬୦୦ରୁ ଊର୍ଦ୍ଧ୍ୱ ରୋଗୀ ଚିହ୍ନଟ ହୋଇଥିବା ବେଳେ ଜିଲା ମୁଖ୍ୟ ଚିକିତ୍ସାଳୟରେ ବର୍ତ୍ତମାନ ୧୦ରୁ ଊର୍ଦ୍ଧ୍ୱ ଚିକିତ୍ସାଧୀନ ରହିଛନ୍ତି। ଜିଲାରେ ଡେଙ୍ଗୁ ଜ୍ୱରକୁ ନେଇ ଲୋକେ ଭୟଭୀତ ହୋଇପଡୁଥିବା ବେଳେ ଏବେ ଏହି ଅଜଣା ରୋଗର ଭୟ ସମସ୍ତଙ୍କ ଚିନ୍ତା ବଢ଼ାଇଦେଇଛି।
ଜିଲା ସ୍ବାସ୍ଥ୍ୟ ଅଧିକାରୀ ଡା. କିଶୋର ଚନ୍ଦ୍ର ପୃଷ୍ଟିଙ୍କ ସୂଚନା ମୁତାବକ, ରୋଗୀଙ୍କ ଜ୍ୱର ଅଧିକ ରହିଲେ ଏବଂ ଜ୍ୱର ଭଲ ନ ହେଲେ ଏହାର ପରୀକ୍ଷା କରାଯାଉଛି। ଏହା ସ୍କ୍ରବ୍ ଟାଇଫସ ପଜିଟିଭ ଜଣାପଡ଼ିଲେ ଚିକିତ୍ସା କରାଯାଉଛି। ଏହି ରୋଗରେ ଆକ୍ରାନ୍ତ ରୋଗୀଙ୍କ ଦେହର ତାପମାତ୍ରା ଅଧିକ ରହୁଛି। ଗତ ଜୁନ୍ରୁ ଏପର୍ଯ୍ୟନ୍ତ ସମୁଦାୟ ୧୭୩୧ ଜଣଙ୍କ ରକ୍ତ ନମୁନା ସଂଗ୍ରହ କରି ଯାଞ୍ଚ କରାଯାଇଛି। ଏଲିସା ଓ ଷ୍ଟ୍ରିପ୍ ପ୍ରକ୍ରିୟାରେ ଯାଞ୍ଚ କରାଯାଇଥିବା ବେଳେ ସେଥିରୁ ୬୨୭ ଜଣଙ୍କ ପଜିଟିଭ ବାହାରିଛି। ଅଦ୍ୟାବଧି କେହି ଗୁରୁତର କିମ୍ବା ମୃତ୍ୟୁବରଣ କରି ନ ଥିବା ବେଳେ ମାଗଣାରେ ଡାକ୍ତରଖାନାରେ ଚିକିତ୍ସା କରାଯାଉଥିବାରୁ ରୋଗୀ ସୁସ୍ଥ ହୋଇ ଘରକୁ ଫେରୁଥିବା ସିଡିଏମ ପୃଷ୍ଟି କହିଛନ୍ତି। ଶୁକ୍ରବାର ଜିଲା ମୁଖ୍ୟ ଡାକ୍ତରଖାନାରେ ପାଖାପାଖି ବିଭିନ୍ନ ଓ୍ବାର୍ଡରେ ୧୦ ଜଣ ରୋଗୀ ଚିକିତ୍ସିତ ଥିବା ସୂଚନା ଦେଇଛନ୍ତି। ଏଥିପାଇଁ ଭୟଭିତ ନ ହେବା ପାଇଁ ରୋଗୀଙ୍କ ସମ୍ପର୍କୀୟଙ୍କୁ କୁହାଯାଉଛି।
ପ୍ରକାଶ ଯେ, ଏକ ପ୍ରକାରର କୀଟ କାମୁଡ଼ିଲେ ଏହି ରୋଗ ହେଉଛି। ଏହାବ୍ୟତୀତ ଜଙ୍ଗଲ ବା ବିଲରେ ଯାତାୟାତ କରୁଥିବା ଲୋକଙ୍କୁ ଏହି କୀଟ କାମୁଡ଼ିବା ଦ୍ୱାରା ଏଭଳି ରୋଗ ହେଉଛି। ଯୋଡ଼ା, ତେଲକୋଇ, ହରିଚନ୍ଦନପୁର, ବାଂଶପାଳ ଆଦି ବଣପାହାଡ଼ ଘେରା ଅଞ୍ଚଳରେ ଅଧିକ ଆକ୍ରାନ୍ତ ହେଉଥିବା ସୂଚନା ମିଳିଛି।