ଭୁବନ, ୧୧।୯(ଡି.ଏନ୍.ଏ.): ଢେଙ୍କାନାଳ ଜିଲା ଭୁବନର ବିଶ୍ୱପ୍ରସିଦ୍ଧ ବଳଦଯାତ୍ରା ଏବଂ ଦଶହରା ଦୁର୍ଗାପୂଜା ପାଇଁ ବ୍ୟାପକ ପ୍ରସ୍ତୁତି ଆରମ୍ଭ କରିଛି ହରପାର୍ବତୀ ପୂଜା କମିଟି। ଦୁର୍ଗାଛକ, ଗୁଜୁରୀହାଟ ପରେ ସହରର ଏହି ୩ନଂ. ମେଢ଼ ଚଳିତବର୍ଷ ୨୪ବର୍ଷରେ ପଦାର୍ପଣ କରୁଛି। ମୂର୍ତ୍ତି, ଆଲୋକ ସାଜସଜ୍ଜା, ପାରମ୍ପରିକ ପୂଜାକୁ କମିଟି ପକ୍ଷରୁ ପ୍ରାଥମିକତା ଦିଆଯାଉଛି। ୭ଦିନ ବ୍ୟାପୀ ହେଉଥିବା ପୂଜାର ବିଭିନ୍ନ ଦିବସରେ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରିବାକୁ ନିଷ୍ପତ୍ତି ହୋଇଛି।
ଭୁବନରେ ଚଳିତବର୍ଷ ୧୩ଟି ମେଢ଼ ହେଉଥିବାବେଳେ କେବଳ ସେଣସାହି ଓ ହରପାର୍ବତୀ ପୂଜା ପ୍ରତିଷ୍ଠାନରେ ଦେବଦେବ ମହାଦେବ, ମା’ପାର୍ବତୀଙ୍କ ସମେତ ଅନ୍ୟ ପାର୍ଶ୍ୱ ଦେବଦେବୀଙ୍କ ମୃଣ୍ମୟୀ ପ୍ରତିମା ପୂଜା ପାଇଥାଆନ୍ତି। ଅଞ୍ଚଳର ୧୯୮୯ ବ୍ୟାଚ୍ର ମାଟ୍ରିକ୍ ଛାତ୍ରୀଛାତ୍ରମାନେ ଏହାର ଆରମ୍ଭ କରିଥିଲେ। ଏଥିଲାଗି ୫୦ରୁ ଊର୍ଦ୍ଧ୍ୱ ପିଲା ଜଣକ ପିଛା ସଂଗ୍ରହ କରିଥିଲେ ୩୦୦ ଟଙ୍କା। ମାତ୍ର ୨୦ରୁ ୨୫ ହଜାର ଟଙ୍କାରେ ଆରମ୍ଭ ହୋଇଥିବା ଏହି ମେଢ଼ରେ ଏବେ ଖର୍ଚ୍ଚ ହେଉଛି ଲକ୍ଷାଧିକ ଟଙ୍କା। ତେବେ କରୋନା ପାଇଁ ଆୟ ପ୍ରଭାବିତ ହୋଇଥିବାବେଳେ ଚଳିତ ବର୍ଷ ବଜେଟ କମାଯାଇ ୩ ଲକ୍ଷ ଟଙ୍କା ରଖାଯାଇଛି। ଏହି ଅର୍ଥରେ ମୂର୍ତ୍ତି, ମେଢ଼, ଆଲୋକ ସାଜସଜ୍ଜା, ପୂଜାର୍ଚ୍ଚନା, ଭସାଣି ଅନୁଷ୍ଠିତ ହେବ। ଏଥିସହ ଚଳିତବର୍ଷ ଦରିଦ୍ର ନାରାୟଣ ସେବା ଏବଂ ଅସହାୟଙ୍କୁ ବସ୍ତ୍ରଦାନ କାର୍ଯ୍ୟକ୍ରମ ରହିଛି। ତେବେ ସଦସ୍ୟମାନେ ଦୂରଦୂରାନ୍ତରେ ରହୁଥିବାରୁ ସେମାନେ ଆସିବା ପରେ ସାଂସ୍କୃତିକ କାର୍ଯ୍ୟକ୍ରମ ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ନିଆଯିବ ବୋଲି ଜଣାପଡ଼ିଛି।
ପୂଜା ପ୍ରତିଷ୍ଠାନ ପକ୍ଷରୁ ପାରମ୍ପରିକ ପୂଜାକୁ ଗୁରୁତ୍ୱ ଦିଆଯାଉଛି। ଠାକୁରଙ୍କ ନିକଟରେ ନିସଙ୍ଖୁଡ଼ି ଭୋଗ ଲାଗି ହେବ। ସକାଳ, ଅପରାହ୍ନ ଏବଂ ସନ୍ଧ୍ୟାରେ ସ୍ବତନ୍ତ୍ର ପୂଜାର୍ଚ୍ଚନା କରାଯିବ। ମୂର୍ତ୍ତି ନିର୍ମାଣ ପାଇଁ ଭଦ୍ରକରୁ ମୂର୍ତ୍ତିକାର ଆସିଥିବାବେଳେ ସ୍ଥାନୀୟ କାରିଗରଙ୍କ ଦ୍ୱାରା ୫୦ ଫୁଟ ଉଚ୍ଚ ଏବଂ ୨୦୦ ଫୁଟ ଓସାର ବିଶିଷ୍ଟ ସୁଉଚ୍ଚ ତୋରଣ ନିର୍ମାଣ କରାଯାଉଥିବା ପୂଜା ପ୍ରତିଷ୍ଠାନ ପକ୍ଷରୁ ସୂଚନା ଦିଆଯାଇଛି।