କେନ୍ଦୁଝର,୧୮ା୨(ସ୍ବ.ପ୍ର.): ଆଗରୁ କେବଳ ଆଦିବାସୀ ବହୁଳ ଗ୍ରାମାଞ୍ଚଳରେ ସ୍ବତନ୍ତ୍ର ଉନ୍ନୟନ କାଉନ୍ସିଲ(ଏସଡିସି) କାମ କରୁଥିଲା। ଚଳିତ ବର୍ଷଠାରୁ ଏହା ସହରାଞ୍ଚଳରେ ଥିବା ଅବହେଳିତ ଆଦିବାସୀ ଗ୍ରାମମାନଙ୍କରେ କାମ କରିବ। ଦିନିକିଆ ଆଦିବାସୀ ସମ୍ମିଳନୀରେ ଯୋଗଦେବାକୁ କେନ୍ଦୁଝର ଜିଲା ଗସ୍ତରେ ଆସିଥିବା ରାଜ୍ୟ ସ୍ବତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷ ପ୍ରଦୀପ ମାଝୀ ମନ୍ତବ୍ୟରେ କହିଛନ୍ତି।
କେନ୍ଦୁଝର ଜିଲାରେ ତିନି ବର୍ଷ ହେଲା ଅନ୍ବେଶା ଯୋଜନା ବନ୍ଦ ରହିଥିବାରୁ ଗରୀବ ଆଦିବାସୀ ପିଲାମାନେ ପବ୍ଲିକ ସ୍କୁଲରେ ପାଠ ପଢ଼ିବାରୁ ବଞ୍ଚତ୍ତ ରହୁଛନ୍ତି। ଏହା ପୁର୍ନବାର କାର୍ଯ୍ୟକାରୀ ହେବା ନେଇ ନିଶ୍ଚିତ ଭାବରେ ପଦକ୍ଷେପ ନିଆଯିବ। କେନ୍ଦୁଝର ଜିଲାରେ ଏକ୍ସସେଲେନ୍ସ ଯୁକ୍ତ ଦୁଇ ଉଚ୍ଚ ବିଦ୍ୟାଳୟର ଯୋଜନା ରହିଛି କି ବୋଲି ପ୍ରଶ୍ନରେ ଜିଲାରୁ ପ୍ରସ୍ତାବ ଗଲେ ନିଶ୍ଚିତ ଭାବରେ ପଦକ୍ଷେପ ନିଆଯିବ ବୋଲି ମାଝୀ କହିଥିଲେ। ସେହିପରି ଘୋଷଣା ହୋଇଥିବା ପାଉଡିଭୂୟାଁ ଉନ୍ନୟନ ଏଜେନ୍ସିକୁ ଶୀଘ୍ର କାର୍ଯ୍ୟକ୍ଷମ, ପୂର୍ବ ବର୍ଷରେ ଖର୍ଚ୍ଚ ହୋଇ ପାରି ନ ଥିବା ଅନୁଦାନ ଚଳିତ ବର୍ଷ ଖର୍ଚ୍ଚ କରିବା ସହ ଚଳିତ ବର୍ଷର ଅନୁଦାନ ଖର୍ଚ୍ଚ କରାଯିବ। ରାଜ୍ୟର ୯ ଜିଲା ପାଇଁ ପାଖାପାଖି ୨୮୦ କୋଟି ଟଙ୍କା ରହିଛି ା ଆହୁରି ୩୦ କୋଟି ଆସିବ। ୧୫ ଦିନ ମଧ୍ୟରେ କାମ ଆରମ୍ଭ ହେବ। ବିଭିନ୍ନ ବର୍ଗର ଲୋକ ତଥା ବିଜ୍ଞ ଲୋକଙ୍କ ମତାମତ ଲୋଡ଼ାଯାଇ କାଉନ୍ସିଲ କାର୍ଯ୍ୟ କରୁଛି। ଆଦିବାସୀମାନେ କିଭଳି ନିଜକୁ ଗର୍ବର ସହିତ ଆଦିବାସୀ ବୋଲି ପରିଚୟ ଦେଇପାରିବେ। ସେମାନଙ୍କ ପରିବର୍ତ୍ତନ ଆସିପାରିବ ସେ ନେଇ ଏହି କାଉନ୍ସିଲ କାମ କରୁଛି। ଭାରତ ବର୍ଷରେ ଆଦିବାସୀଙ୍କ ପାଇଁ କାଉନ୍ସିଲ ନାହିଁ ା ଓଡ଼ିଶାରେ ଏହି ବ୍ୟବସ୍ଥା ପ୍ରଥମ ବୋଲି ଅଧ୍ୟକ୍ଷ ମାଝୀ କହିଥିଲେ। ସ୍ଥାନୀୟ ଅଡିଟରିୟମରେ ଅନୁଷ୍ଠିତ ଆଦିବାସୀ ସମ୍ମିଳନୀରେ ବିଭିନ୍ନ ବର୍ଗର ଲୋକଙ୍କ ସହିତ ଆଲୋଚନା କରାଯାଇ ଶିକ୍ଷାକୁ ଗୁରୁତ୍ୱ ଦେବାକୁ ପ୍ରସ୍ତାବ ରହିଥିଲା। ଅନ୍ୟମାନଙ୍କ ମଧ୍ୟରେ ସାଂସଦ ଚନ୍ଦ୍ରାଣୀ ମୁର୍ମୁ, ଏସ୍ଡିସି ଜିଲା ଅଧ୍ୟକ୍ଷା ଲକ୍ଷ୍ମୀ ମୁଣ୍ଡା, ଉପାଧ୍ୟକ୍ଷ ନାରାୟଣ ପୂର୍ତ୍ତି, ବିଜେଡି ଜିଲା ସଭାପତି ମାଧବ ସର୍ଦ୍ଦାର ଉପସ୍ଥିତ ଥିଲେ।
ସୂଚନାଯୋଗ୍ୟ, କାଉନ୍ସିଲ ଗଠନ ସରିଥିଲେ ହେଁ ଜିଲାକୁ ଅଦ୍ୟାବଧି ଗୋଟିଏ ଟଙ୍କା ଆସିନାହିଁ। କିନ୍ତୁ ବହୁ ପ୍ରକଳ୍ପ ପ୍ରସ୍ତାବ ଜିଲା ପ୍ରଶାସନ ପାଖରେ ପଡ଼ିରହିଛି।