ପୁରୁଷୋତ୍ତମପୁର,୩/୧( ସିମାଞ୍ଚଳ ମିଶ୍ର) ସମଗ୍ର ଓଡିଶାରେ ସରକାରଙ୍କ ଗୃହ ବିଭାଗ ପକ୍ଷରୁ ୧୧୯ ଗୋଟି ଏସଡିପିଓ ସମେତ କମିସନେରେଟ ପୋଲିସ ଏସିପି କାର୍ଯ୍ୟାଳୟ ରହିଛି। ସେଥିମଧ୍ୟରୁ ୨୦୨୩ ମସିହାରେ ଅପରାଧ ନିୟନ୍ତ୍ରଣରେ ଗଞ୍ଜାମ ପୋଲିସ ଜିଲାର ପୁରୁଷୋତ୍ତମପୁର ଏସଡିପିଓ ରଜନିକାନ୍ତ ସାମଲ ଦକ୍ଷତାର ସହ କାର୍ଯ୍ୟକରି ସମଗ୍ର ଓଡିଶାରେ ପ୍ରଥମସ୍ଥାନ ଅଧିକାର କରି ଗଞ୍ଜାମ ଜିଲା ପାଇଁ ଗୌରବ ଆଣିଛନ୍ତି। ୨୦୧୬ ମସିହାରେ ପୁରୁଷୋତ୍ତମପୁରରେ ସ୍ଥାପିତ ଏହି ଏସଡିପିଓ ଅଫିସ ଅଧିନରେ ପୁରୁଷୋତ୍ତମପୁର ଥାନା ସମେତ ପୋଲସରା , କବିସୂର୍ଯ୍ୟନଗର, କୋଦଳା ଓ ବେଗୁନିଆପଡା ଥାନା ରହିଛିା ରଜନିକାନ୍ତ ଏଠାରେ ଗତ ୨୬.୯.୨୦୨୨ ରେ ଏସଡିପିଓ ଭାବେ ଯୋଗ ଦେବା ପରଠାରୁ ଲୋକଙ୍କ ଆସ୍ଥା ଭାଜନ ହୋଇ ପୋଲିସ ବିଭାଗଲାଗି ଏକ ଉଦାହରଣ ପାଲଟିଛନ୍ତି। ନ୍ୟାଶନାଲ କ୍ରାଇମ ରେକର୍ଡ ବ୍ୟୁରୋ ଓ ଷ୍ଟେଟ କ୍ରାଇମ ରେକଡ ବ୍ୟୁରୋ ପକ୍ଷରୁ ପ୍ରତିବର୍ଷ ପୋଲିସ ଅଧିକାରୀଙ୍କ କାର୍ଯ୍ୟଶୈଳୀକୁ ନେଇ ପ୍ରଗତି ସପ୍ଟୱେର ମାଧ୍ୟମରେ ଅଟୋ ସର୍ଭେ କରି ମାର୍କିଂ କରାଯାଇଥାଏ।
ସିସିଟିଏନସ ପୋର୍ଟାଲରେ ପ୍ରତ୍ୟହ ପଞ୍ଜିକୃତ ଅଭିଯୋଗ ଆଧାରରେ ପୁରୁଷୋତ୍ତମପୁର ଏସଡିପିଓ ଅଧିନରେ ଥିବା ପୁରୁଷୋତ୍ତମପୁର ଥାନାରେ ୯୧୯ ଗୋଟି କେସ, ପୋଲସରା ଥାନାରେ ୮୮୨ କେସ, କବିସୂର୍ଯ୍ୟନଗର ଥାନାରେ ୭୮୯ କେସ କୋଦଳା ଥାନାରେ ୬୨୪ କେସ ଓ ବେଗୁନିଆପଡା ଥାନାରେ ୫୫୧ ଗୋଟି ବିଭିନ୍ନ କେସ ଦାୟର ହୋଇଛି। ଅଞ୍ଚଳରେ ରହିଥିବା ଅପରାଧୀମାନଙ୍କୁ ଦମନ କରିବା ସହ ପଞ୍ଜିକୃତ ସମୁଦାୟ ୩୬୯୮ ଗୋଟି କେସ ମଧ୍ୟରେ ରହିଥିବା ହରିଜନ ଆଦିବାସୀ ସମ୍ପକ୍ରିତ (ଆଟ୍ରୋସିଟି) ମାମଲାରେ ୪୮ ଗୋଟି କେସ ମଧ୍ୟରୁ ୪୭ର ସଠିକ ଭାବେ ତଦନ୍ତ କରାଯାଇଥିଲା। ୫୦୫ ଗୋଟି ବିଭିନ୍ନ ପ୍ରକାର କେସର ତଦନ୍ତର ସୁପରିଭିଜନ ଠିକ ରୁପେ ସମୟ ସୀମା ମଧ୍ୟରେ ସାରିଥିଲେ। ଜନସାଧାରଣଙ୍କ ପକ୍ଷରୁ ହୋଇଥିବା ବିଭିନ୍ନ ଅଭିଯୋଗର ଫଇସଲା କରି ସମାଧାନ କରାଯିବା ସହ ଥାନାମାନଙ୍କର ସଠିକ ତଦାରଖ କରି ଥାନାରେ ହୋଇଥିବା ଅଭିଯୋଗର କେସକୁ ନେଇ ତଦନ୍ତକାରୀ ଅଧିକାରୀମାନଙ୍କୁ ଉପଯୁକ୍ତ ତଦନ୍ତ ଲାଗି ପରାମର୍ଶ ଦେବାଭଳି ବିଭିନ୍ନ କାର୍ଯ୍ୟକଳାପକୁ ନେଇ ପ୍ରଗତିର ମାର୍କିଂ ରେ ଶତ ପ୍ରତିଶତ ମାର୍କରୁ ପୁରୁଷୋତ୍ତମପୁର ଏସଡିପିଓ ନିଜର ସମସ୍ତ କାର୍ଯ୍ୟଦକ୍ଷତାକୁ ସଫଳତାର ସହ ପ୍ରତିପାଦନ କରି ୯୨.୪୫ ପ୍ରତିଶତ ମାର୍କ ରଖି କରି କୃତିତ୍ୱ ହାସଲ କରି ସମଗ୍ର ଓଡିଶାରେ ପ୍ରଥମ ସ୍ଥାନରେ ରହି ଗଞ୍ଜାମ ପୋଲିସ ଲାଗି ସଫଳତା ଆଣି ପାରିଛନ୍ତି ।
ଏହି ସଫଳତା ଲାଗି ଏସଡିପିଓ ସାମଲ ଗଞ୍ଜାମ ଏସପି ଜଗମୋହନ ମିନାଙ୍କୁ ତାଙ୍କର ଶ୍ରେୟ ଦେଇ ଏସପିଙ୍କ ଦୈନିକ ସୁପରିଭିଜନ ଓ ଦିଗଦର୍ଶନ , ପରାମର୍ଶ ଲାଗି ଏହି ସଫଳତା ମିଳିଥିବା ବେଳେ ସମସ୍ତ ଥାନା ଆଇଆଇସି ଓ କର୍ମଚାରୀମାନଙ୍କ ସହ ଏସଡିପିଓ ଅଫିସରେ କାର୍ଯ୍ୟରତ ସମସ୍ତ କର୍ମଚାରୀଙ୍କ ସହଯୋଗ ଏବଂ ଦାୟିତ୍ୱବାନ କାର୍ଯ୍ୟଲାଗି ସଫଳ ହୋଇଛି ବୋଲି କହଛନ୍ତି। ଏହି ସଫଳତା କେବଳ ତାଙ୍କର ନୁହେଁ ଏହା ସବଡିଭିଜନରେ କାର୍ଯ୍ୟରତ ସମସ୍ତ ପୋଲିସ କର୍ମଚାରୀଙ୍କର ସଫଳତା ବୋଲି ସେ କହିଛନ୍ତି।
ସୂଚନା ଯୋଗ୍ୟ, ଏସଡିପିଓ ଭାବରେ ରଜନିକାନ୍ତ ଯୋଗଦେବା ପରଠାରୁ ପୁରୁଷୋତ୍ତମପୁର ,ପୋଲସରା , କୋଦଳା, କବିସୂର୍ଯ୍ୟନଗର, ବେଗୁନିଆପଡା ଅଞ୍ଚଳରେ ଅପରାଧୀମାନଙ୍କୁ ଦମନ କରିବା ସହ ଚୋରା ବାଲି କାରବାର, ମଦ , ଗଞ୍ଜେଇ ଆଦି ନିଶା ବେପାରିଙ୍କ ବିରୋଧରେ କଡ଼ା ପଦକ୍ଷେପ ଗ୍ରହଣ କରିଛନ୍ତି। ଏହା ସହିତ ମଦ୍ୟପ ଗାଡିଚାଳକଙ୍କୁ ଧରପଗଡ କରିବା, ସାମାଜିକ ବାସନ୍ଦ, ଗୁଣିଗାରେଡି ଅନ୍ଧବିଶ୍ବାସ ଭଳି କୁସଂସ୍କାରକୁ ଲୋକଙ୍କ ମନରୁ ଦୂରକରି ଗାଁ ଗାଁ ମଧ୍ୟରେ ଭାଇଚାରା ମନୋଭାବ ଆଣିବାରେ ତାଙ୍କର ପ୍ରମୁଖ ଭୂମିକା ରହିଛି।
ଲୋକଙ୍କ ସମସ୍ୟାକୁ ଗୁରୁତ୍ୱଦେଇ ପୋଲିସ ଓ ଜନସାଧାରଣଙ୍କ ମଧ୍ୟରେ ବନ୍ଧୁତା ସୃଷ୍ଟି କରି ସମ୍ପର୍କକୁ ନିକଟତର କରିବାର ଉଦ୍ୟମ ଯୋଗୁ ସମଗ୍ର ଅଞ୍ଚଳରେ ଶାନ୍ତି ବଜାୟ ରଖିବାରେ ସ୍ଥାନୀୟ ପୋଲିସ ଗିଭାଗ ଲାଗି ସେ ଏକ ନିଆରା ଉଦାହରଣ ପାଲଟିଛନ୍ତିା