ପାରାଦୀପ,୨୩ା୨(ସ୍ବ.ପ୍ର.): ପାରାଦୀପ ମାଛଧରା ବନ୍ଦର ପରିସରରେ ରାଜ୍ୟ ମତ୍ସ୍ୟ ବିଭାଗ ପକ୍ଷରୁ ସମୁଦ୍ରରେ ପାଟ୍ରୋଲିଂ ପାଇଁ କିଣା ଯାଇଥିବା ବୋଟ ୩ ବର୍ଷ ହେଲା ଅଚଳ ହୋଇ ବର୍ଥରେ ବନ୍ଧା ହୋଇପଡିଛି। ଦେଢ କୋଟି ଟଙ୍କା ବିନିମୟରେ ଏହା ୨୦୦୭ରେ କିଣା ଯାଇଥିଲା। ପ୍ରାୟ୧୨ ବର୍ଷ ସମୁଦ୍ରରେ ପାଟ୍ରୋଲିଂ କରିବା ପରେ ଖରାପ ହୋଇଥିଲା। ଏକାଧିକ ବାର ମରାମତି କରିବାରେ ଲକ୍ଷାଧିକ ଟଙ୍କା ଖର୍ଚ୍ଚ ହୋଇଛି। ଶେଷରେ ୨୦୧୯ ମତ୍ସ୍ୟ ବିଭାଗ ଉପ ନିର୍ଦ୍ଦେଶକ ପ୍ରତାପ ରାଉତ ଅନୁଧ୍ୟାନ କରିବା ପରେ ତାହା ଚଳନକ୍ଷମ ନୂହେଁ ବୋଲି ଘୋଷଣା କରିଥିଲେ। ସେବେଠାରୁ ବୋଟଟି ବର୍ଥରେ ଅଚଳ ରହିଛି। ଉକ୍ତ ବୋଟ୍ ପରିଚାଳନା ପାଇଁ ୬ ଜଣ ରେଗୁଲାର କର୍ମଚାରୀ ଥିଲେ। ଏହା ମଧ୍ୟରେ ୩ ଜଣ ଅବସର ନେଇ ସାରିଲେଣି। ଅବଶିଷ୍ଟ ୩ ଜଣ ଏବେବି ଅଛନ୍ତି। ସେମାନେ ବସି ବସି ଦରମା ପାଉଛନ୍ତି। ସମୁଦ୍ରରେ ମତ୍ସ୍ୟ ବିଭାଗ ପକ୍ଷରୁ ଯେତେବେଳେ ପାଟ୍ରୋଲିଂ ଆବଶ୍ୟକ ପଡୁଛି ସେତେବେଳେ ଭଡାରେ ବୋଟ ନେଇ କରାଯାଉଛି। ଆଲୁମିନିୟମ ଦ୍ୱାରା ନିର୍ମିତ ଏବଂ ୩୨୫ ହର୍ସ ପାୱାର ଡବଲ ଇଞ୍ଜିନ୍ ଥିବା ସି ହର୍ସ ବର୍ଷର ପ୍ରାୟ ୬ ମାସ ସମୁଦ୍ରରେ ପାଟ୍ରୋଲିଂ କରୁଥିଲା ବୋଲି ଏହାର ଚାଳକ ଏ. ଜେ. ରାଓ କୁହନ୍ତି। ପାରାଦୀପଠାରୁ ଗୋପାଳପୁର ଏବଂ ପାରାଦୀପଠାରୁ ଗହୀରମଥା ପର୍ଯ୍ୟନ୍ତ ପାଟ୍ରୋଲିଂ ହୁଏ। ଅଲିଭ୍ ରିଡେଲେ କଇଁଛ କଟକଣା ସମୟ ଓ ୨ମାସ ସାମୁଦ୍ରିକ ମାଛଧରା କଟକଣା ବେଳେ ଏହା ଅଧିକ କାମରେ ଲାଗିଥାଏ। ଏପରି କି ଅନ୍ୟ ମାଛଧରା ବୋଟ୍ ବିପଦରେ ଥିବା ବେଳେ ମଧ୍ୟ ଏହା କାମରେ ଲାଗୁଥିଲା। ଏବେ ସେ ସବୁ କାମ ଆଉ ହେଉନାହିଁ ବୋଲି ଚାଳକ ରାଓ କୁହନ୍ତି। ଏ ସମ୍ପର୍କରେ ଏହି ବୋଟ୍ ଦାୟିତ୍ୱରେ ଥିବା ଏଡିଏଫ୍ (ସହକାରୀ ମତ୍ସ୍ୟ ନିର୍ଦ୍ଦେଶକ) ତୁଷାରକାନ୍ତ ମହାପାତ୍ରଙ୍କୁ ପଚାରିବାରେ ଉପରିସ୍ଥ ଅଧିକାରୀମାନେ ଆସି ଅନୁଧ୍ୟାନ କରି ଯାଇଛନ୍ତି। ଆଉ ଏକ ପାଟ୍ରୋଲିଂ ବୋଟ କିଣାଯିବାର ପ୍ରସ୍ତାବ ରହିଛି। ଯାହା ଉପରସ୍ତରର ଅଧିକାରୀମାନେ ନିଷ୍ପତ୍ତି ନେବେ ବୋଲି ସେ କହିଛନ୍ତି।
