ବ୍ରହ୍ମପୁର ଅଫିସ,୨୮ା୫: ଗଞ୍ଜାମ ଜିଲା ବ୍ରହ୍ମପୁର ବୈଦ୍ୟନାଥପୁର ଥାନା ଅନ୍ତର୍ଗତ ଆଙ୍କୁଲିରେ ଏକ ଘରେ ଦୀର୍ଘବର୍ଷ ଧରି ବେଆଇନ ଭାବେ ଗର୍ଭସ୍ଥ ଶିଶୁଙ୍କ ଲିଙ୍ଗ ନିରୂପଣ କରାଯାଉଥିଲା। ଏହି ସୂଚନା ମିଳିବା ପରେ ପୋଲିସ ଓ ସ୍ବାସ୍ଥ୍ୟ ବିଭାଗ ଗୁରୁବାର ସନ୍ଧ୍ୟାରେ ସେଠାରେ ଚଢ଼ାଉ କରାଯାଇଥିଲା। ଶୁକ୍ରବାର ଉକ୍ତ ବେଆଇନ କେନ୍ଦ୍ରକୁ ପୋଲିସ ସିଲ୍ କରିଛି। ସେଠାରୁ ୨ଟି ଅଲଟ୍ରାସାଉଣ୍ଡ ମେଶିନ, ଅଲଟ୍ରାସାଉଣ୍ଡ ବେଳେ ବ୍ୟବହୃତ ଜେଲ୍, ୧୮,୨୦୦ ଟଙ୍କା ଓ ଅନ୍ୟ ଜରୁରୀ କାଗଜାତ ଜବତ ହୋଇଛି। ଭ୍ରୂଣ ନିରୂପଣ କେନ୍ଦ୍ରର ମୁଖ୍ୟ ତଥା ଆଙ୍କୁଲି ଆନନ୍ଦନଗରର ଦୁର୍ଗାପ୍ରସାଦ ନାୟକ, ଖଲ୍ଲିକୋଟ ଅଞ୍ଚଳର ଜଣେ ଆଶାକର୍ମୀ, ଦୁଇ ଦଲାଲ ଓ ନିଗମ ନଗରର ଅକ୍ଷୟ ଦଳାଇ ଓ କୁକୁଡ଼ାଖଣ୍ଡିର ହରିମୋହନ ଦଳାଇଙ୍କ ସମେତ ୧୩ ଜଣଙ୍କୁ ଗିରଫ କରାଯାଇଛି। ବ୍ରହ୍ମପୁର ପୋଲିସ ମୁଖ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ଶ୍ରବଣା ବିବେକ ଏମ. ଏହି ସୂଚନା ଦେଇଛନ୍ତି।
ମାଷ୍ଟରମାଇଣ୍ଡ ଦୁର୍ଗାପ୍ରସାଦ ଜଣେ ଲାବ ଟେକ୍ନିସିଆନ। ସେ ଗର୍ଭସ୍ଥ ଶିଶୁର ଲିଙ୍ଗ ନିରୂପଣ କରନ୍ତି। ଏପରିକି ମହିଳାଙ୍କ ଗର୍ଭପାତ ମଧ୍ୟ କରିଥାନ୍ତି। ଭ୍ରୂଣ ନିରୂପଣ ପାଇଁ ଜଣପିଚ୍ଛା ୧୫ ହଜାରରୁ ୨୦ ହଜାର ଟଙ୍କା ପର୍ଯ୍ୟନ୍ତ ନିଆଯାଉଥିଲା। ବିଭିନ୍ନ ଲାବ, ଘରୋଇ କ୍ଲିନିକ ଓ ଗ୍ରାମାଞ୍ଚଳରୁ ଗର୍ଭବତୀଙ୍କୁ ଏହି କେନ୍ଦ୍ରକୁ ଆଣିବାରେ ଅକ୍ଷୟ ଓ ହରିମୋହନ ସହଯୋଗ କରୁଥିଲେ। ଗୁରୁବାର ସନ୍ଧ୍ୟାରେ ଚଢ଼ାଉ ବେଳେ ୧୧ ଜଣ ମହିଳା ରହିଥିଲେ। ସେମାନଙ୍କୁ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଆଶାକର୍ମୀ ରୀନା ପ୍ରଧାନ ୨ଜଣ ମହିଳାଙ୍କୁ ସେମାନଙ୍କ ଶିଶୁର ଲିଙ୍ଗ ନିରୂପଣ ପାଇଁ ଆଣିଥିଲେ ବୋଲି ସେ କହିଛନ୍ତି। ପୋଲିସ ଏହି ଘଟଣାର ତଦନ୍ତ ଜାରି ରଖିଛି। ଯେଉଁମାନେ ଏହାର ତଦନ୍ତ ପରିସରଭୁକ୍ତ ହେବେ ସେମାନଙ୍କୁ ମଧ୍ୟ ଗିରଫ କରାଯିବ ବୋଲି ଏସ୍ପି କହିଛନ୍ତି। ଗିରଫ ୧୨ ଜଣିଆ ଗ୍ୟାଙ୍ଗରେ ସହରର କେତେକ କ୍ଲିନିକର ଟେକ୍ନିସିଆନ ଥିବା ସେ କହିଛନ୍ତି। ବୈଦ୍ୟନାଥପୁର ପୋଲିସ ମାମଲା ନଂ.୧୬୪/୨୨ରେ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରିଛି।