ସମ୍ବଲପୁର,୧୧ା୧୧(ବ୍ୟୁରୋ): ସମ୍ବଲପୁର ଜିଲା ଧନକଉଡା ବ୍ଲକ କିଲାସମା ପଞ୍ଚାୟତରେ ଏମଜିଏନଆରଇଜିଏସ ଯୋଜନାରେ ବ୍ୟାପକ ଦୁର୍ନୀତି ହୋଇଥିବା ନେଇ ଅଭିଯୋଗ ହୋଇଥିଲା । ଏହାକୁ ନେଇ ଖବର ମଧ୍ୟ ପ୍ରକାଶ ପାଇଥିଲା । ଜିଲାପାଳ ଅନନ୍ୟା ଦାସଙ୍କ ନିର୍ଦ୍ଦେଶକ୍ରମେ ତଦନ୍ତ ଆରମ୍ଭ ହୋଇଛି । ଗତ ୩ ଦିନ ଧରି ଜିଲା ପରିଷଦ କାର୍ଯ୍ୟାଳୟର ଅଧିକାରୀ ତଦନ୍ତ ଆରମ୍ଭ କରିଛନ୍ତି । ଏହାର ରିପୋର୍ଟ ଜିଲା ପ୍ରଶାସନ ପାଖରେ ଦାଖଲ କରିବେ । ତଦନ୍ତ ସମୟରେ ଅଧିକାରୀମାନେ ଗ୍ରାମବାସୀଙ୍କ ସହ ମୁହଁାମୁହିଁ ହୋଇଥିଲେ । ତଦନ୍ତକାରୀ ଟିମକୁ ଗ୍ରାମର ମହିଳାମାନେ ଦୁର୍ନୀତି ହୋଇଥିବା ନେଇ ବୟାନ ଦେଇଥିଲେ। ବିଭିନ୍ନ କାର୍ଯ୍ୟରେ ବ୍ଲକ, ପଞ୍ଚାୟତର ଅଧିକାରୀ, ଜନପ୍ରତିନିଧି ମିଳିମିଶି ପ୍ରାୟ ୮ ଲକ୍ଷ ଟଙ୍କା ହଡ଼ପ କରିଥିବା କହିଥିଲେ। କିଭଳି ଭାବେ କାମ ନ କରି ବିଭିନ୍ନ ପ୍ରକଳ୍ପରେ ବିଲ ଉଠାଯାଇଛି, ଏଥିରେ ସମସ୍ତଙ୍କ ସଂପୃକ୍ତି ଥିବା ନିଶ୍ଚିତ ହୋଇଛି ବୋଲି ସେମାନେ ଅଭିଯୋଗ କରିଥିଲେ। ଅଭିଯୋଗ ଅକ୍ଟୋବର ୩ ତାରିଖରୁ ହୋଇଥିବା ବେଳେ ୮ତାରିଖଠାରୁ ତଦନ୍ତ ଆରମ୍ଭ କରାଯାଇଥିଲା । ଅପରପକ୍ଷରେ ଠିକାଦାର ଓ ସ୍ଥାନୀୟ ଜନପ୍ରତିନିଧିଙ୍କୁ କାମ କରିବା ପାଇଁ ବ୍ଲକ ପ୍ରଶାସନ ସହଯୋଗ କରିଥିଲା । ତେଣୁ ସେମାନେ ଜେସିବି, ଟ୍ରାକ୍ଟର ଲଗାଇ ରାତିଅଧିଆ ରାସ୍ତାର କେତେକ ସ୍ଥାନରେ ମାଟି ପକାଇ ଦେଇଛନ୍ତି। ତେବେ ଯେତେ ଚପାଇବାକୁ ଉଦ୍ୟମ କଲେ ମଧ୍ୟ ଦୁର୍ନୀତିକୁ ଘଣ୍ଟ ଘୋଡ଼ାଇ ପାରିବେ ନାହିଁ । ସଠିକ ରିପୋର୍ଟ ଦାଖଲ କରି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଗଲେ ଆଗାମୀ ଦିନରେ ବିକଳ୍ପ ବ୍ୟବସ୍ଥା କରାଯିବ ବୋଲି ଅଭିଯୋଗକାରୀ କହିଛନ୍ତି ।
ସୂଚନାଯୋଗ୍ୟ, ପଞ୍ଚାୟତ ସୁରକ୍ଷା ସମିତି ସଦସ୍ୟମାନେ ଜିଲା ପରିଷଦ କାର୍ଯ୍ୟନିର୍ବାହୀ ଅଧିକାରୀଙ୍କ ପାଖରେ ଅଭିଯୋଗ କରିଥିଲେ । ବଡ ପ୍ରଧାନପାଲି ଗ୍ରାମ ଠାରୁ ଆରଡି ରାସ୍ତାକୁ ସଂଯୋଗ କରୁଥିବା ରାସ୍ତା କାମ ନଁାରେ ୨୯,୭୮୧ ଟଙ୍କା ଓ ମୋରମ ବିଛାଇବା ନାମରେ ୬୯,୯୯୮ ଟଙ୍କା ମୋଟ ୯୯,୭୭୯ ଟଙ୍କା ଚଲୁ କରାଯାଇଛି । ସେହିପରି ପ୍ରଧାନପାଲି ଗ୍ରାମର ତଲିପଡାକୁ ରାସ୍ତା ଉନ୍ନତୀକରଣ ନାମରେ ପ୍ରକଳ୍ପ କରାଯାଇଛି । ବାସ୍ତବରେ କାମ କରଯାଇ ନାହିଁ ି ଓ ୯୧,୯୦୮ ଟଙ୍କା ବିଲ କରି ଉଠାଇ ନିଆଯାଇଛି । ଝରଘାଟି ପଡା ଗ୍ରାମର ନାଗରାଡିପା ରାସ୍ତା ନିର୍ମାଣ ନ କରି ମିଥ୍ୟା ବିଲ କରି ୧ ଲକ୍ଷ ୧୭ ହଜାର ୬୬୦ ଟଙ୍କା ଉଠାଇ ନିଆଯାଇଛି। ସେହିପରି ସାଲେଟିକ୍ରା ଗ୍ରାମରେ ଟ୍ରେଞ୍ଜ ଖୋଲା କାମରେ ମଧ୍ୟ ଅନିୟମିତତା କରାଯାଇଛି । ବନ ବିଭାଗ ପକ୍ଷରୁ ଏଠାରେ ଟ୍ରେଞ୍ଜ ଖୋଲା ଯାଇଥିଲା । ହେଲେ ଉକ୍ତ ଟ୍ରେଞ୍ଜକୁ ଦେଖାଇ ପୁଣି ଥରେ ବ୍ଳକ ପ୍ରଶାସନ ପକ୍ଷରୁ ବିଲ କରି ୨ ଲକ୍ଷ ୭ ହଜାର ୭୯୨ ଟଙ୍କା ଉଠାଇ ନିଆଯାଇଛି। ବଲବସପୁର ଗ୍ରାମ ବିଜଲାପଡା ରାସ୍ତା ଉନ୍ନତୀକରଣ ନଁାରେ ୧ ଲକ୍ଷ ୬ ହଜାର ଓ ମୋରମ ବିଛାଇବା ବାବଦକୁ ୬୦ ହଜାର ୫୮୦ ଟଙ୍କା ବାଟମାରଣା କରାଯାଇଛି ।