ମାଲକାନଗିରି, ୮।୮(ଡି.ଏନ.ଏ.):ବର୍ଷ ବର୍ଷ ଧରି ମାଲକାନଗିରି ସୀମାନ୍ତ ରାଜ୍ୟର ବ୍ୟବସାୟୀମାନେ ମାଲକାନଗିରି ଆସି କେନ୍ଦୁପତ୍ର ବ୍ୟବସାୟ କରୁଥିବା ବେଳେ ବର୍ତ୍ତମାନ ଛତିଶଗଡ଼ରେ ଚୋରି ହୋଇଥିବା କେନ୍ଦୁପତ୍ରକୁ ଓଡିଶାରେ ଖୋଜାଚାଲିଛି। ଖବରରୁ ଜଣାପଡିଛି ଚଳିତ ବର୍ଷ ଛତିଶଗଡ଼ ରାଜ୍ୟରୁ କୋଟି କୋଟି ଟଙ୍କାର କେନ୍ଦୁପତ୍ର ଚୋରାରେ ମାଲକାନଗିରିକୁ ଆସିଥିଲା। ଗୁଲାମ ଖାନ ନାମକ ଜଣେ ଛତିଶଗଡ଼ର ବ୍ୟବସାୟୀ ଛତିଶଗଡ଼ ଆଦିବାସୀଙ୍କଠାରୁ କେନ୍ଦୁପତ୍ର କିଣି ପଇସା ଦେଇ ନ ଥିବା ନେଇ ସୁକ୍ମା ଜିଲାର କୋଣ୍ଟା ଥାନାରେ ଅଭିଯୋଗ ହୋଇଥିଲା। ପରେ ସୁକ୍ମା ପୋଲିସ ଓ ବନବିଭାଗ ମାଲକାନଗିରି ପ୍ରଶାସନ ସହାୟତାରେ ମାଲକାନଗିରିରେ ଥିବା ଏକାଧିକ କେନ୍ଦୁପତ୍ର ଗୋଦାମ ଉପରେ ଚଢ଼ାଉ କରିଥିଲେ। ଏହି ଚଢାଉରେ ମାଲକାନଗିରି ବନ ବିଭାଗ ମଧ୍ୟ ସହଯୋଗ କରିଥିଲା। ଏହି ବ୍ୟବସାୟୀ ଜଣକ ମାଲକାନଗିରି ଜିଲାର ବିଭିନ୍ନ ସ୍ଥାନରେ ଥିବା ତାଙ୍କ ସମ୍ପର୍କୀୟଙ୍କ ଘରେ କେନ୍ଦୁପତ୍ର ଗଚ୍ଛିତ ରଖିଥିବା ଜାଣିବା ପରେ ମାଲକାନଗିରି ଜିଲାର ବିଭିନ୍ନ ଗୋଦାମ ଉପରେ ଚଢ଼ାଉ ହୋଇଥିଲା।