ଓ୍ବାଶିଂଟନ,୨୮।୧୧ : ପୃଥିବୀ ବ୍ୟତୀତ, ଆମ ବ୍ରହ୍ମାଣ୍ଡରେ ଅନ୍ୟ ୨୪ ଟି ଗ୍ରହ ଅଛି ଯେଉଁଠାରେ ଜୀବନ ବିଦ୍ୟମାନ ହୋଇପାରେ ବୋଲି ଆଶା କରାଯାଉଛି। ବୈଜ୍ଞାନିକମାନେ ବିଶ୍ୱାସ କରନ୍ତି ଯେ ଏହି ଗ୍ରହମାନଙ୍କ ମଧ୍ୟରୁ ଗୋଟିଏ ଏପରି ଗ୍ରହ ରହିଛି, ଯେଉଁଠି ପୃଥିବୀ ଅପେକ୍ଷା ଅଧି ଉନ୍ନତ ଜୀବନ ସତ୍ତା ରହିଛି। ଏହି ଗ୍ରହମାନଙ୍କୁ ସୁପର ହାବିଟେବୁଲ ପ୍ଲାନେଟ କୁହାଯାଇପାରେ।
ୱାଶିଂଟନ ୟୁନିଭରସିଟି ଏବଂ ବର୍ଲିନ ବୈଷୟିକ ବିଶ୍ୱବିଦ୍ୟାଳୟର ଜ୍ୟୋର୍ତିବିଜ୍ଞାନୀ ଡର୍କ ଶୁଲଜ-ମାକୁଚ କହିଛନ୍ତି ଯେ ପୃଥିବୀ ପରି ସମ୍ଭାବ୍ୟ ଗ୍ରହଗୁଡିକ ପାଇଁ ଆମେ ନିରନ୍ତର ସନ୍ଧାନ କରୁଛୁ। ଏନେଇ ଯୋଜନାବଦ୍ଧ ଭାବେ ସନ୍ଧାନ ଆରମ୍ଭ କରାଯିବ।
ଶୁଲଜ-ମାକୁଚ ଏବଂ ତାଙ୍କ ଦଳ ୨୪ ସୁପର-ବାସଯୋଗ୍ୟ ଗ୍ରହ ଚିହ୍ନଟ କରିଛନ୍ତି। ସେଥିମଧ୍ୟରେ କେଓଆଇ-୫୭୧୫.୦୧ ନାମକ ଗ୍ରହ ପ୍ରାୟ ୫୫୦ କୋଟି ବର୍ଷ ପୁରୁଣା। ଏହା ୨,୯୬୫ ଆଲୋକ-ବର୍ଷ ଦୂରରେ ଥିବା ଏକ କମଳା ରଙ୍ଗର ତାରାକୁ ପରିକ୍ରମା କରେ। ଏହାର ହାରାହାରି ଭୂପୃଷ୍ଠର ତାପମାତ୍ରା ପୃଥିବୀର ତୁଳନାରେ ପ୍ରାୟ ୨.୪ ଡିଗ୍ରୀ ସେଲସିୟସ ଥଣ୍ଡା ହୋଇପାରେ। କିନ୍ତୁ ଯଦି ଉତ୍ତାପକୁ ବଜାୟ ରଖିବା ପାଇଁ ପୃଥିବୀ ଅପେକ୍ଷା ଅଧିକ ଗ୍ରୀନ ହାଉସ ଗ୍ୟାସ ଏଠାରେ ଥାଏ, ତେବେ ଏହା ବାସଯୋଗ୍ୟ ହୋଇପାରିବ।
ସେହିପରି କେଓଆଇ-୫୫୫୪.୦୧ ଗ୍ରହ ପ୍ରାୟ ୬୫୦ ବର୍ଷ ପୁରୁଣା। ଏହାର ବ୍ୟାସ ପୃଥିବୀର ୦.୭୨ ଠାରୁ ୧.୨୯ ଗୁଣା ଅଟେ । ଏହା ପୃଥିବୀଠାରୁ ପ୍ରାୟ ୭୦୦ ଆଲୋକ-ବର୍ଷ ଦୂରରେ ଏକ ହଳଦିଆ ରଙ୍ଗର ତାରାକୁ ପରିକ୍ରମା କରୁଛି। ୨୪ ଟି ସମ୍ଭାବ୍ୟ ବାସଯୋଗ୍ୟ ଗ୍ରହ ପୃଥିବୀଠାରୁ ୧୦୦ ଆଲୋକ ବର୍ଷରୁ ଅଧିକ ଦୂରରେ । ବୈଜ୍ଞାନିକମାନେ ଆଶା କରୁଛନ୍ତି ଯେ ଭବିଷ୍ୟତର ନୂତନ ଟେକ୍ନୋଲୋଜି ମହାକାଶଯାନ ଏବଂ ଟେଲିସ୍କୋପ ସାହାଯ୍ୟରେ ଏ ସମ୍ପର୍କରେ ଅଧିକ ତଥ୍ୟ ସଂଗ୍ରହ କରାଯାଇପାରିବ।
