ସିଡ୍ନୀ, ୩ା୮ (ଏ.ପି)- କରୋନା ଭାଇରସ୍ ଆଶଙ୍କାରେ ନିକ୍ କିରଗିଓସ୍ ୟୁଏସ୍ ଓପନ୍ ଗ୍ରାଣ୍ଡସ୍ଲାମ ଟେନିସ ପ୍ରତିଯୋଗିତାରୁ ଓହରିଯାଇଛନ୍ତି। କୋଭିଡ୍-୧୯ରେ ସଂକ୍ରିମତ ହୋଇ ଆମେରିକାରେ ଲକ୍ଷାଧିକ ଲୋକଙ୍କର ମୃତ୍ୟୁ ଘଟିସାରିଲାଣି। ଚଳିତ ବର୍ଷର ଟୁର୍ନାମେଣ୍ଟକୁ ଅଗଷ୍ଟ ୩୧ରୁ ସେପ୍ଟେମ୍ବର ୧୩ ପର୍ଯ୍ୟନ୍ତ କରିବା ଲାଗି ୟୁନାଇଟେଡ୍ ଷ୍ଟେଟ୍ସ ଟେନିସ ଆସୋସିଏଶନ ନିଷ୍ପତ୍ତି ନେଇଛି। ପୂର୍ବରୁ ଏହି କାରଣରୁ ଅଷ୍ଟ୍ରେଲିଆର ଅନ୍ୟ ଜଣେ ଖେଳାଳି ବିଶ୍ୱର ନମ୍ବର ଓ୍ବାନ୍ ଆଶଲେ ବାର୍ଟି ମିଡାଜ୍ ଗ୍ରାଣ୍ଡ ସ୍ଲାମ ଟୁର୍ନାମେଣ୍ଟରୁ ଓହରିଯାଇଛନ୍ତି। କିରଗିଓସ୍ କହିଛନ୍ତି, ୟୁଏସ୍ ଓପନରେ ଭାଗ ନେଉ ନ ଥିବାରୁ ମୁଁ ବହୁତ ଦୁଃଖିତ। କିନ୍ତୁ ସ୍ବାସ୍ଥ୍ୟ ଓ ସୁରକ୍ଷା ସବୁଠାରୁ ଗୁରୁତ୍ୱପୂର୍ଣ୍ଣ। ମଣିଷ ଜୀବନ ଚାଲିଗଲେ ଆଉ ଫେରିବ ନାହିଁ। କିନ୍ତୁ ଆମ କ୍ରୀଡ଼ା ଓ ଅର୍ଥ ବ୍ୟବସ୍ଥାରେ ଆମେ ସୁଧାର ଆଣି ପାରିବା। ଏଇ କିଛି ମାସ ମଧ୍ୟରେ କେତେଜଣ ଖେଳାଳି ପ୍ରଦର୍ଶନୀ ମ୍ୟାଚ ଖେଳିଥିବାରୁ କିରଗିଓସ୍ ତାହାର ସମାଲୋଚନା କରିଛନ୍ତି। ବିଶ୍ୱର ନମ୍ବର ଓ୍ବାନ ପୁରୁଷ ସିଙ୍ଗଲ୍ସ ଖେଳାଳି ନୋଭାକ୍ ଜୋକୋଭିଚ୍ଙ୍କ ଦ୍ୱାରା ଏକ ହାଇପ୍ରୋଫାଇଲ ଇଭେଣ୍ଟ ବିଭିନ୍ନ ଦେଶରେ ଆୟୋଜିତ ହୋଇଥିଲା। ଦର୍ଶକମାନଙ୍କ ଫଟୋଗ୍ରାଫ୍ଗୁଡ଼ିକରୁ ଦେଖିବାକୁ ମିଳିଥିଲା ସେ ଇଭେଣ୍ଟଗୁଡ଼ିକରେ ସାମାଜିକ ଦୂରତ୍ୱ ପ୍ରତି ଆଦୌ ଧ୍ୟାନ ଦିଆଯାଇ ନ ଥିଲା। କୋଭିଡ୍-୧୯ ଟେଷ୍ଟରେ ଜୋକୋଭିଚ୍, ଗ୍ରିଗୋର ଦିମିତ୍ରିଭ ଓ ବୋର୍ନା କୋରିକ୍ଙ୍କର ପଜିଟିଭ ଆସିଥିଲା। ବାର୍ଟି ଗୁରୁବାର କହିଥିଲେ ମହାମାରୀ ସମୟରେ ବିଦେଶ ଯାତ୍ରାକୁ ସେ ପସନ୍ଦ କରୁ ନାହାନ୍ତି। ଫ୍ରେଞ୍ଚ ଓପନ ଟାଇଟଲ ବଜାୟ ରଖିବା ଲାଗି ସେ ରୋଲାଣ୍ଡ ଗ୍ୟାରୋସ ଯିବେ କି ନା ସେ ଆସନ୍ତା କିଛି ସପ୍ତାହ ମଧ୍ୟରେ ନିଷ୍ପତ୍ତି ନେବେ।