ପୁଷୋତ୍ତମପୁର,୧୪।୧୧: ଗଞ୍ଜାମ ଜିଲାର ଇଷ୍ଟଦେବୀ ମା’ ତାରାତାରିଣୀଙ୍କ ମନ୍ଦିରରୁ ମାଙ୍କ ରୁପା ଅଳଙ୍କାର ଚୋରି ସହ ହୁଣ୍ଡିକୁ ଭାଙ୍ଗି ସେଥିରେ ଥିବା ଭକ୍ତଙ୍କ ଦାନ ଟଙ୍କା ଚୋରି ଘଟଣାରେ ଗଞ୍ଜାମ ପୋଲିସକୁ ବଡ ସଫଳତା ମିଳିଛି। ନିଜେ ଗଞ୍ଜାମ ଏସପି ସୁଭେନ୍ଦୁ କୁମାର ପାତ୍ରଙ୍କ ନେତୃତ୍ୱରେ ବରିଷ୍ଠ ପୋଲିସ ଅଧିକାରୀଙ୍କୁ ନେଇ ଗଠିତ ଟିମ୍ ୯ ଦିନର ତଦନ୍ତ ପରେ ଚୋରଙ୍କୁ ଠାବ କରିବାରେ ସଫଳ ହୋଇଛନ୍ତି। ଏହି ଘଟଣାର ଗୁରବାର ପୋଲିସ ଫର୍ଦ୍ଦାଫାସ କରିଛନ୍ତି।
ଯାହାଦ୍ୱାରା ଅଞ୍ଚଳରେ ଲାଗିରହିଥିବା କଳ୍ପନା ଜଳ୍ପନାର ଅନ୍ତଘଟିଛି। ଲୋକଙ୍କ ସନ୍ଦେହକୁ ନେଇ ଏକମାତ୍ର ଧରିତ୍ରୀରେ ପ୍ରକାଶିତ ଖବର ସତ୍ୟ ହୋଇଛି। ପୋଲିସ ଚାରିଜଣ ସେବାୟତ ଓ ଦୁଇଜଣ ସୁରକ୍ଷାକର୍ମୀଙ୍କୁ (ରାତ୍ରଜଗୁଆଳ)ଙ୍କୁ ଗୁରବାର ଗିରଫ କରି କୋର୍ଟ ଚାଲାଣ କରିଛନ୍ତି। ଏହାସହ ସେମାନଙ୍କ ନିକଟରୁ ହୁଣ୍ଡିରୁ ଚୋରାଇ ନେଇଥିବା ୩୯ ହଜାର ଟଙ୍କା ସହ ଘଟଣାରେ ବ୍ୟବହୃତ ଇଲେକ୍ଟ୍ରି କଟର,ତାର,ତିନିଟି ମୋଟର ସାଇକେଲ,ତିନିଗୋଟି ମୋବାଇଲଫୋନ, ମଦ ବୋତଲକୁ ଜବତ କରିଛନ୍ତି।
ଗିରଫ ଯୁବକ ମାନେ ହେଲେ ମାଙ୍କ ସେବାୟତ ପ୍ରତାପୁର ଗ୍ରାମର ଗୌତମ ରଣା(୨୮) ଓ ଗୋବିନ୍ଦପୁର ଗ୍ରାମର ଅମୁଲ୍ୟ ରଣା(୨୮) ବିକାଶ ରଣା (୨୦) ରବିନ କୁମାର ରଣା( ୨୫) ଓ ରାତ୍ର ଜଗୁଆଳ ରାଇପୁର ଗ୍ରାମର କାଳିଆ ଦାସ (୩୫) ବଳିଆ ଓରଫ ବଳରାମ ନାହାକ (୪୫)। ଏନେଇ ପୁରୁଷୋତ୍ତମପୁର ଏସଡିପିଓ ରଜନିକାନ୍ତ ସାମଲ ଓ ଆଇଆଇସି ବିପିନ ବିହାରି ହୋତା ଖବରଦାତା ସମ୍ମୀଳନିରେ କହିଛନ୍ତି ଯେ ମନ୍ଦିର ସେବାୟତ ତପନକୁମାର ରଣା ଗତ ୬ ତାରିଖ ସକାଳେ ତାରାତାରିଣୀଙ୍କ ମନ୍ଦିରରୁ ଚୋରୀ ହୋଇଥିବା ନେଇ ଥାନାରେ ଅଭିଯୋଗ କରିଥିଲେ।
କେସ ନଂ ୭୩୯/୨୪ ଉପରେ ତଦନ୍ତ ଚାଲିଥିବା ବେଳେ ରାତ୍ର ଜଗୁଆଳ କାଳିଆ ଦାସକୁ ସନ୍ଦେହରେ ପୋଲିସ ଉଠାଇ ଆଣି ପଚାରାଉଚରା କରିବା ବେଳେ ସେ ଘଟଣା ସମ୍ପର୍କରେ ସ୍ୱୀକାର କରିଥିଲା। ଏହି ଆଧାରରେ ପୋଲିସ ସମସ୍ତ ଅଭିଯୁକ୍ତଙ୍କୁ ଆଣି ପଚାରିବା ବେଳେ ସେମାନେ ଚୋରି କରିଥିବାନେଇ ସ୍ୱୀକାର କରିବା ସହ କିଭଳି ଚୋରି କରିଛନ୍ତି ତାହା ବର୍ଣନା କରିଥିଲେ। ସେମାନଙ୍କ ଠାରୁ ବ୍ୟବହୃତ ଜିନିସ ଓ ଚୋରି ଟଙ୍କାକୁ ଜବତ କରାଯାଇଥିଲା। ଯାହାକି କାଳିଆ ଠାରୁ କଟର ମେସିନ, ବଳିଆ ଠାରୁ ଇଲେକ୍ଟ୍ରି ତାର, ଅମୁଲ୍ୟଠାରୁ ୨୧ ହଜାର ଟଙ୍କା ଓ ରବିନ ଠାରୁ ୧୮ ହଜାର ଟଙ୍କା ଜବତ କରିବା ସହ ସେମାନେ ବ୍ୟବହୃତ ୩ ଟି ମୋଟର ସାଇକେଲକୁ ଜବତ କରାଯାଇଛି।
ତେବେ ଅଳଙ୍କାର ସମ୍ପର୍କରେ ଏମାନେ କୌଣସି ସୂଚନା ଦେଇ ନାହାନ୍ତି। ଏହାକୁ ନେଇ ପୁଣି ଅଭିଯୁକ୍ତ ମାନଙ୍କୁ ରିମାଣ୍ଡରେ ଅଣାଯିବ। ଘଟଣାର ଆହୁରି ତଦନ୍ତ ଚାଲିଥିବା ଏସଡିପିଓ ରଜନିକାନ୍ତ ସାମଲ କହିଛନ୍ତି। ସୂଚନାଯୋଗ୍ୟ ଏହି ଘଟଣା ପରେ ମନ୍ଦିର ସ୍ଥିତିକୁ ନେଇ ସେବାୟତଙ୍କ ଭୂମିକା ସଂଦେହ ଜନକ ହୋଇପଡିଥିବା ସହ ଲୋକେ କିଛି ସେବାୟତ ଓ ସୁରକ୍ଷା କର୍ମଚାରୀଙ୍କ କାର୍ଯ୍ୟକଳାପ ପ୍ରତି ଆଙ୍ଗୁଠି ଉଠାଇ ଚର୍ଚ୍ଚା କରିବାରେ ଲାଗିଥିଲେ। ଏହାକୁ ନେଇ ଏକ ମାତ୍ର ଧରିତ୍ରୀ ପୋର୍ଟଲାରେ ଗତ ୮ ତାରିଖରେ ଏକ ଶୀର୍ଷକ ଖବର ପ୍ରକାଶ ପାଇଥିଲା। ଯାହାକି ଲୋକଙ୍କ ସନ୍ଦେହର ଚର୍ଚ୍ଚା ବର୍ତ୍ତମାନ ସତ୍ୟ ହୋଇପଡିଛି।