ଭୁବନେଶ୍ୱର,୨୭।୨(ବ୍ୟୁରୋ): ରବିବାର ପଞ୍ଚାୟତ ନିର୍ବାଚନ ଭୋଟ ଗଣତିର ଦ୍ୱିତୀୟ ଦିନ। ଶନିବାର ପ୍ରଥମ ଦିନର ଗଣତି ଆରମ୍ଭ ହୋଇଥିଲେ ହେଁ ତାହା ଶେଷ ହୋଇପାରି ନାହିଁ। ପ୍ରଥମ ଦିନରେ ୩୧୫ଟି ଜିଲା ପରିଷଦ ଜୋନ୍ରେ ଭୋଟ ଗଣତି ଆରମ୍ଭ କରାଯାଇଥିଲା। ସେଥିରୁ ୨୫୬ଟିର ଫଳାଫଳ ଆସିଛି। ୨୩୦ଟି ଆସନରେ ବିଜେଡି ଜିତିଥିବା ବେଳେ କଂଗ୍ରେସ ଓ ବିଜେପିକୁ ଯଥାକ୍ରମେ ୧୨ ଓ ୧୦ଟି ଆସନ ମିଳିଛି। ସେହିପରି ୨ ଆସନରେ ସ୍ବାଧୀନ ପ୍ରାର୍ଥୀ ବିଜୟୀ ହୋଇଥିବା ବେଳେ ଆଉ ୨ଟିରେ ଅନ୍ୟାନ୍ୟ ପ୍ରାର୍ଥୀ ବାଜିମାତ କରିଛନ୍ତି। ଏବେ ବି ୫୯ଟିରେ ଗଣତି ଚାଲିଛି।
ଅପରପକ୍ଷରେ ଆଜି ଆଉ ୩୦୬ଟି ଜିଲା ପରିଷଦ ଜୋନରେ ସକାଳ ୮ଟାରୁ ଗଣତି ପ୍ରକ୍ରିୟା ଆରମ୍ଭ ହୋଇଯାଇଛି। ପ୍ରଥମ ଦିନରେ ଗଣତିରେ ବିଳମ୍ବ ହେବାର ଦେଖି ଆଜି ରାଜ୍ୟ ନିର୍ବାଚନ କମିଶନ ଏହି ପ୍ରକ୍ରିୟାରେ ସାମାନ୍ୟ ପରିବର୍ତ୍ତନ କରିଛନ୍ତି। ପ୍ରତି ପଞ୍ଚାୟତ ପାଇଁ ଗୋଟିଏ ଲେଖାଏଁ ଟେବୁଲର ବ୍ୟବସ୍ଥା କରିଥିବା ବେଳେ ଆଜି ଟେବୁଲ ସଂଖ୍ୟା ବଢ଼ାଇବାକୁ ପ୍ରତି ଜିଲାର ଜିଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି। ଆଜିର ଗଣତିରେ ବିଳମ୍ବ ହେବ ନାହିଁ ବୋଲି ଆଶା କରାଯାଉଛି।