ନୂଆଦିଲ୍ଲୀ,୧୬ା୨: ଭାରତର ଜି୨୦ ଅଧ୍ୟକ୍ଷତା ଅଧୀନରେ ପ୍ରଥମ କଲ୍ଚର ଓ୍ବାର୍କିଂ ଗ୍ରୁପ୍ (ସିଡବ୍ଳ୍ୟୁଜି) ବୈଠକ ମଧ୍ୟପ୍ରଦେଶର ମନ୍ଦିର ସହର ଖଜୁରାହୋରେ ଫେବୃୟାରୀ ୨୨ରୁ ଆରମ୍ଭ ହେବ। ଏହା ୨୫ ତାରିଖ ପର୍ଯ୍ୟନ୍ତ ଚାଲିବ। ‘କଲ୍ଚର ଫର୍ ଲାଇଫ୍’ (ଜୀବନ ପାଇଁ ସଂସ୍କୃତି) ବିଷୟ ଉପରେ ଏଥିରେ ଗୁରୁତ୍ୱ ଦିଆଯିବ। ପରିବେଶ ସଚେତନ ଜୀବନଶୈଳୀକୁ ନିରନ୍ତର ଜୀବନ ପାଇଁ କ୍ୟାମ୍ପେନ୍ ଭାବେ ବ୍ୟବହାର କରାଯିବ। ଓଡ଼ିଶାର ରାଜଧାନୀ ଭୁବନେଶ୍ୱରରେ ଦ୍ୱିତୀୟ ଓ କର୍ନାଟକର ହାମ୍ପିରେ ତୃତୀୟ ବୈଠକ ଅନୁଷ୍ଠିତ ହେବ ବୋଲି ବୁଧବାର କେନ୍ଦ୍ର ସଂସ୍କୃତି ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
ପ୍ରାଚୀନ ସହର ଖଜୁରାହୋ ୟୁନେସ୍କୋର ଏକ ବିଶ୍ୱ ଐତିହ୍ୟ ସ୍ଥଳ। ଏଠାରେ ଚନ୍ଦେଲା ବଂଶ ପକ୍ଷରୁ ୯୫୦-୧୦୫୦ ଖ୍ରୀଷ୍ଟାବ୍ଦରେ ନିର୍ମିତ ମନ୍ଦିରର କାରୁକାର୍ଯ୍ୟ ଦେଶବିଦେଶର ପର୍ଯ୍ୟଟକଙ୍କ ଦୃଷ୍ଟି ଆକର୍ଷଣ କରିଥାଏ। ଐତିହାସିକ ରେକର୍ଡ ଅନୁସାରେ ଖଜୁରାହୋର ୨୦ କି.ମି. ପରିଧି ମଧ୍ୟରେ ୮୫ଟି ମନ୍ଦିର ନିର୍ମିତ ହୋଇଥିଲା। ଏହା ବର୍ତ୍ତମାନ ୬ କି.ମି. ଅଞ୍ଚଳରେ ସୀମିତ ହୋଇଯାଇଛି। ମାତ୍ର ୨୫ଟି ମନ୍ଦିର ନିଜ ଅସ୍ତିତ୍ୱ ବଜାୟ ରଖିପାରିଛି। ଖଜୁରାହୋର ମହାରାଜା ଛତ୍ରଶାଳ କନ୍ଭେନ୍ସନ ସେଣ୍ଟର (ଏମ୍ସିସିସି)ରେ ହେବାକୁ ଥିବା ସିଡବ୍ଲ୍ୟୁଜି ବୈଠକରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଓ କେନ୍ଦ୍ର ସଂସ୍କୃତି ମନ୍ତ୍ରୀ ଜି. କିଷନ ରେଡ୍ଡୀ ଯୋଗଦେଇ ଏକ ପ୍ରଦର୍ଶନୀର ଉଦ୍ଘାଟନ କରିବେ ଦ୍ୱିତୀୟ ବୈଠକ ଭୁବନେଶ୍ୱର ଓ ତୃତୀୟ ବୈଠକ ହାମ୍ପିରେ ଅନୁଷ୍ଠିତ ହେବ ବୋଲି ନୂଆଦିଲ୍ଲୀରେ ସଂସ୍କୃତି ସଚିବ ଗୋବିନ୍ଦ ମୋହନ ଗଣମାଧ୍ୟମକୁ ସୂଚନା ଦେଇଛନ୍ତି। ସିଡବ୍ଲ୍ୟୁଜିର ଚତୁର୍ଥ ବୈଠକ ପାଇଁ ସ୍ଥାନ ନିରୂପଣ ହୋଇ ନ ଥିବା ସେ କହିଛନ୍ତି।
ପ୍ରକାଶ ଯେ, ୨୦୨୨ ଡିସେମ୍ବର ୧ରେ ଭାରତ ଜି୨୦ ଅଧ୍ୟକ୍ଷତା ଗ୍ରହଣ କରିଥିଲା। ଦେଶର ୫୫ ସ୍ଥାନରେ ୨୦୦ରୁ ଊର୍ଦ୍ଧ୍ୱ ବୈଂକ ଅନୁଷ୍ଠିତ ହେବ, ଯାହାକି ଆସନ୍ତା ସେପ୍ଟେମ୍ବରରେ ନୂଆଦିଲ୍ଲୀରେ ଶେଷ ହେବ। ଏଥିରେ ଆର୍ଜେଣ୍ଟିନା, ଅଷ୍ଟ୍ରେଲିଆ, ବ୍ରାଜିଲ, କାନାଡା, ଚାଇନା, ଫ୍ରାନ୍ସ, ଜର୍ମାନୀ, ଇଣ୍ଡୋନେସିଆ, ଇଟାଲୀ, ଜାପାନ, ଦକ୍ଷିଣ କୋରିଆ, ମେକ୍ସିକୋ, ରୁଷିଆ, ସାଉଦି ଆରବ, ଦକ୍ଷିଣ ଆଫ୍ରିକା, ତୁର୍କୀ, ବ୍ରିଟେନ, ଆମେରିକା ଏବଂ ୟୁରୋପୀୟ ସଂଘ (ଇୟୁ) ପ୍ରତିନିଧିମାନେ ଯୋଗଦେବେ।
