ଶ୍ରୀନଗର, ୧୩।୮ : ଜମ୍ମୁ-କଶ୍ମୀରରେ ଗତ ୧୨ ଘଣ୍ଟା ମଧ୍ୟରେ ଦ୍ୱିତୀୟ ଆତଙ୍କବାଦୀ ଆକ୍ରମଣ ଘଟିଛି। ଉତ୍ତର କଶ୍ମୀରର ବନ୍ଦିପୋରା ଜିଲାରେ ଆତଙ୍କବାଦୀଙ୍କ ଦ୍ୱାରା ବାହାର ରାଜ୍ୟର ଶ୍ରମିକଙ୍କୁ ଗୁଳି କରି ହତ୍ୟା କରାଯିବା ପରେ ପୁଣି ଥରେ ପୋଲିସ ଉପରକୁ ଗୁଳି ଚାଳନା କରାଯାଇଛି। ଅନନ୍ତନାଗର ବିଜବେହାରା ଅଞ୍ଚଳରେ ପୋଲିସ ଏବଂ ସିଆର୍ପିଏଫ୍ ର ମିଳିତ ଦଳ ଉପରେ ହୋଇଥିବା ଆତଙ୍କବାଦୀ ଆକ୍ରମଣରେ ଜଣେ ପୋଲିସ କର୍ମଚାରୀ ଆହତ ହୋଇଛନ୍ତି। ଏହି ଘଟଣା ପରେ ସର୍ଚ୍ଚ ଅପରେଶନ ଆରମ୍ଭ ହୋଇଛି।
ଏହାପୂର୍ବରୁ ଗୁରୁବାର ଜମ୍ମୁ-କଶ୍ମୀରର ରାଜୌରୀ ଜିଲାର ଦାରହଲ ଅଞ୍ଚଳର ପାରଗାଲ ଠାରେ ଏକ ସେନା କ୍ୟାମ୍ପରେ ଅନୁପ୍ରବେଶ କରିବାକୁ ଚେଷ୍ଟା କରୁଥିବା ବେଳେ ଦୁଇ ଆତଙ୍କବାଦୀଙ୍କ ଆକ୍ରମଣରେ ତିନିଜଣ ସେନା କର୍ମଚାରୀ ଶହୀଦ୍ ହୋଇଥିଲେ। ସନ୍ଦିଗ୍ଧ ଆତ୍ମଘାତୀ ଗୋଷ୍ଠୀର ଉଭୟ ଆତଙ୍କବାଦୀ ସୁରକ୍ଷା ବାହିନୀଙ୍କ ଗୁଳିରେ ମୃତ୍ୟୁ ଘଟିଥିଲା।
ପୋଲିସ ଏବଂ ସିଆରପିଏଫ ଉପରେ ଗୁଳି ଚଳାଇବା ପରେ ସୁରକ୍ଷା ଅଧିକାରୀମାନେ ଏହି ଅଞ୍ଚଳକୁ ଘେରି ରହିଛନ୍ତି ଏବଂ ଘଟଣାସ୍ଥଳକୁ ଅତିରିକ୍ତ ଟିମ ପଠାଯାଇଛି। ୭୫ ତମ ସ୍ବାଧୀନତା ଦିବସ ପାଳନ କରିବାର କିଛି ଘଣ୍ଟା ପୂର୍ବରୁ ଏହି ଆକ୍ରମଣ ହୋଇଛି। ଗୋଟିଏ ଦିନ ପୂର୍ବରୁ ବଡ଼ଗାମରେ ସୁରକ୍ଷା ବାହିନୀ ଦ୍ୱାରା ତିନି ଜଣ ଲ୍s୍କର ଆତଙ୍କବାଦୀଙ୍କୁ ଗୁଳି କରି ହତ୍ୟା କରାଯାଇଥିଲା। ନିହତ ଆତଙ୍କବାଦୀଙ୍କ ମଧ୍ୟରୁ ଜଣେ ସାଧାରଣ ନାଗରିକ ରାହୁଲ ଭଟ୍ଟ ଏବଂ ଅମ୍ରିନକ ଭଟ୍ଟଙ୍କ ହତ୍ୟାରେ ସମ୍ପୃକ୍ତ ଥିଲେ।
