ନୂଆଦିଲ୍ଲୀ,୮।୪: ଦେଶରେ କରୋନା ସଂକ୍ରମଣର ଦ୍ୱିତୀୟ ଲହର ବେକାବୁ ହେବାରେ ଲାଗିଛି। ଏହା ପୂର୍ବାପେକ୍ଷା ୩ଗୁଣା ଅଧିକ ବେଗରେ ବ୍ୟାପୁଥିବାରୁ ଏହାକୁ ଆୟତ୍ତ କରିବା କଷ୍ଟକର ହେଉଛି। ପ୍ରତିଦିନ ନୂଆ ଆକ୍ରାନ୍ତଙ୍କ ସଂଖ୍ୟା ବଢୁଥିବାରୁ ହସ୍ପିଟାଲରେ ବେଡ୍ ଏବଂ ଭେଣ୍ଟିଲେଟରର ଅଭାବ ଦେଖାଦେଇଛି। ଦେଶର ମୁମ୍ବାଇ, ଦିଲ୍ଲୀ, ଅହମଦାବାଦ, ଚଣ୍ଡିଗଡ଼ ଆଦି ବଡ଼ ସହରରେ ସ୍ଥିତି ଧୀରେଧୀରେ ସଙ୍କଟ ଜନକ ହେବାରେ ଲାଗିଛି। ଏସବୁ ସହରରେ ଅବସ୍ଥା ଅସମ୍ଭାଳ ହେବାରେ ଲାଗିଛି। ମୁମ୍ବାଇରେ ୫୧୭୧ କୋଭିଡ୍ ବେଡ୍ ଖାଲି ରହିଛି। ଅପରପକ୍ଷରେ ୧୭ ହଜାରରୁ ଅଧିକ ବେଡ୍ରେ ଆକ୍ରାନ୍ତ ରହିଛନ୍ତି। ଏବେ ମୁମ୍ବାଇରେ ଆକ୍ଟିଭ୍ କରୋନା ଆକ୍ରାନ୍ତଙ୍କ ସଂଖ୍ୟା ୮୦ ହଜାର ପାଖାପାଖି ଥିବାବେଳେ ଏଠାରେ ୫୮ ଭେଣ୍ଟିଲେଟର ବେଡ୍ ଖାଲି ରହିଛି। ସେହିପରି ଦିଲ୍ଲୀରେ ୪୫୮୫ ବେଡ୍ ଖାଲି ରହିଥିବାବେଳେ ୪୨୩୮ ବେଡ୍ରେ ଆକ୍ରାନ୍ତ ରହିଛନ୍ତି। ୩୧୪ ଭେଣ୍ଟିଲେଟର ଖାଲି ରହିଛି। ଅପରପକ୍ଷରେ ୬୪୩ ଭେଣ୍ଟିଲେଟରରେ ଆକ୍ରାନ୍ତଙ୍କୁ ରଖାଯାଇଛି। ଗୁଜରାଟର ଅହମଦାବାଦରେ ୨୭୦୦ କୋଭିଡ୍ ବେଡ୍ ବୃଦ୍ଧି କରାଯାଇଛି। ଚଣ୍ଡିଗଡ଼ରେ ଆକ୍ରାନ୍ତଙ୍କ ସଂଖ୍ୟା ପ୍ରତିଦିନ ବଢୁଥିବାରୁ ଅବସ୍ତା ଅସମ୍ଭାଳ ହେବାରେ ଲାଗିଛି। ଏଠାରେ ଥିବା ଧନ୍ବନ୍ତରୀ କେୟାର ସେଣ୍ଟରରେ ଥିବା ୫୦ ବେଡ୍ ମଧ୍ୟରୁ କେବଳ ଗୋଟିଏ ଖାଲି ରହିଛି। ସେହିପରି ପିଜିଆଇରେ ଥିବା ୩୦୦ ବେଡ୍ ମଧ୍ୟରୁ ୧୬୮ରେ ଆକ୍ରାନ୍ତ ରହିଛନ୍ତିି। ବେଡ୍ ଏବଂ ଭେଣ୍ଟିଲେଟର ଅଭାବ ଯୋଗୁ ଅଗାମୀ ଦିନରେ ସମସ୍ୟା ବଢ଼ିବାର ଆଶଙ୍କା ଦେଖାଦେଇଛି।