ରିୟାଦ,୧୨ା୧୦: ସାଉଦି ଆରବର ପ୍ରିନ୍ସ ମହମ୍ମଦ ବିନ୍ ସଲମାନ କିଛି ମାସ ମଧ୍ୟରେ ବିଭିନ୍ନ ଅନ୍ତର୍ଜାତୀୟ ଗଣମାଧ୍ୟମର ହେଡ୍ଲାଇନ ବା ମୁଖ୍ୟ ଖବର ହୋଇ ରହିଆସୁଛନ୍ତି। କେତେବେଳେ ନିଜ ଦେଶରେ ସଂସ୍କାରବାଦୀ ପଦକ୍ଷେପ ନେବାକୁ ତ କେତେବେଳେ ଦେଶର ଦୂତାବାସରେ ସାମ୍ବାଦିକ ଜମାଲ ଖାସୋଗୀଙ୍କ ହତ୍ୟା ପାଇଁ। ବର୍ତ୍ତମାନ ଏକ ନୂତନ ପୁସ୍ତକରେ ତାଙ୍କ ବ୍ୟକ୍ତିଗତ ଜୀବନ ବିଷୟରେ ଅନେକ ଖୁଲାସା କରାଯାଇଛି।
ଆମେରିକାର ଏକ ଖବରକାଗଜ ଓ୍ବାଲ ଷ୍ଟ୍ରିଟ୍ ଜର୍ଣ୍ଣାଲର ଦୁଇଜଣ ସାମ୍ବାଦିକ ବ୍ରାଡଲେ ହୋପ୍ ଏବଂ ଜଷ୍ଟିନ ସାକେ ‘ବ୍ଲଡ୍ ଆଣ୍ଡ୍ ଅଏଲ୍’ ନାମକ ଏକ ପୁସ୍ତକ ଲେଖିଛନ୍ତି। ଏହି ବହିରେ ଉଲ୍ଲେଖ କରାଯାଇଛି ଯେ, କ୍ଷମତାରେ ରହିବାକୁ ଏମ୍ବିଏସ୍ କେଉଁ ପ୍ରକାର ନିଷ୍ପତ୍ତି ନିଅନ୍ତି। ତାଙ୍କ ବ୍ୟକ୍ତିଗତ ଜୀବନ ବିଷୟରେ ମଧ୍ୟ ପ୍ରକାଶ କରାଯାଇଛି।
‘ବ୍ଲଡ୍ ଆଣ୍ଡ ଅଏଲ’ ପୁସ୍ତକରେ ରହିଛି ପ୍ରିନ୍ସଙ୍କ ଏକ ଘରୋଇ ପାର୍ଟିର କାହାଣୀ। ଯେଉଁଥିରେ ପ୍ରାୟ ୧୫୦ ମଡେଲ ସାମିଲ ଥିଲେ। ଏହି ମଡେଲମାନେ ବ୍ରାଜିଲ, ରୁଷିଆ, ମାଲଦ୍ୱୀପରୁ ଆସିଥିଲେ।
ପୁସ୍ତକ ଅନୁଯାୟୀ, ମଡେଲମାନେ ଏହି ମାଳଦ୍ୱୀପରେ ପହଞ୍ଚିବା ମାତ୍ରେ ସମସ୍ତଙ୍କୁ ମେଡିକାଲକୁ ପଠାଯାଇ ସେମାନଙ୍କର ଯୌନ ସଂକ୍ରମଣ ଜନିତ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ଏପରିକି ଏହି ପାର୍ଟି ସମୟରେ, ଏମ୍ବିଏସ୍ଙ୍କ ଗୋପନୀୟତା ବିଷୟରେ ଏତେ ଚିନ୍ତିତ ଥିଲେ ଯେ, କର୍ମଚାରୀଙ୍କୁ ସ୍ମାର୍ଟଫୋନ ଆଣିବାକୁ ମନା କରିଥିଲେ। କେବଳ ନୋକିଆ ୩୩୧୦ ମଡେଲ ଫୋନ୍ ବ୍ୟବହାର କରିବାକୁ ଅନୁମତି ଦିଆଯାଇଥିଲା। ନିୟମ ଭାଙ୍ଗିବାରୁ ଦୁଇଜଣ କର୍ମଚାରୀଙ୍କୁ ମଧ୍ୟ ନିଲମ୍ବନ କରାଯାଇଥିଲା। ପ୍ରକାଶ ଥାଉକି, ପାର୍ଟି ଚାଲିିବା ପୂର୍ବରୁ ମଧ୍ୟ ସ୍ଥାନୀୟ ଗଣମାଧ୍ୟମରେ ଏହି ଖବର ଲିକ୍ ହୋଇଥିଲା ଏବଂ ଏକ ସପ୍ତାହରୁ କମ୍ ସମୟ ମଧ୍ୟରେ ଏମ୍ବିଏସ୍ ସେଠାରୁ ଫେରି ଆସିଥିଲେ। ଏହା ପରେ ମଡେଲମାନେ ମଧ୍ୟ ନିଜ ନିଜ ଦେଶକୁ ଫେରି ଯାଇଥିଲେ।