ବାରିପଦା ଅଫିସ,୨ା୧୧: ରାଜ୍ୟ ଅର୍ଥ ବିଭାଗର ପ୍ରମୁଖ ସଚିବ ବିଶାଲ ଦେବଙ୍କୁ ସ୍ବତନ୍ତ୍ର ଭାବେ ମୟୂରଭଞ୍ଜ ଜିଲା ଦାୟିତ୍ୱ ନ୍ୟସ୍ତ ପରେ ସେ ବୁଧବାର ଦୁଇ ଦିନିଆ ମୟୂରଭଞ୍ଜ ଗସ୍ତରେ ଆସିଛନ୍ତି। ପ୍ରଥମ ଦିନରେ ସେ ଜିଲାପରିଷଦ ସମ୍ମଳିନୀ କକ୍ଷରେ ଜିଲାର ସମସ୍ତ ଉନ୍ନୟନ କାର୍ଯ୍ୟର ବିଭାଗ ଅନୁସାରେ ସମୀକ୍ଷା କରିଥିଲେ। ଏହା ପରେ ସେ ଜିଲା ଶିକ୍ଷାଧିକାରୀଙ୍କ କାର୍ଯ୍ୟାଳୟରେ ଅନ୍ଲାଇନ ଶିକ୍ଷାଦାନ ପାଇଁ ଆରମ୍ଭ ହେବାକୁ ଥିବା ଡିଜିଟାଲ ଷ୍ଟୁଡିଓ ବୁଲି ଦେଖିଥିଲେ। ତା’ପରେ ରଙ୍ଗମାଟିଆସ୍ଥିତ ପିଆରଏମ୍ ମେଡିକାଲ କଲେଜ ଓ ହସ୍ପିଟାଲ ନୂତନ କ୍ୟାମ୍ପସରେ ନିର୍ମାଣାଧୀନ କୋଠାଗୃହର ଅଗ୍ରଗତି ସମ୍ବନ୍ଧରେ ଅନୁଧ୍ୟାନ କରିଥିଲେ। ଏହାପରେ ପାଲବଣୀରେ ମିଶନଶକ୍ତି ପରିଚାଳିତ ମହିଳା ସ୍ବୟଂ ସହାୟିକା ଗୋଷ୍ଠୀର ଆଚାର ତିଆରି ଉଦ୍ୟୋଗ ବୁଲିବା ସହିତ ସଦସ୍ୟାଙ୍କ ସହିତ ଭାବ ବିନିମୟ କରିଥିଲେ। ସେଠାରୁ କୃଷ୍ଣଚନ୍ଦ୍ରପୁର ସିଏଚ୍ସି ଗସ୍ତ କରି ସ୍ବାସ୍ଥ୍ୟସେବା ସମ୍ବନ୍ଧରେ ଅନୁଧ୍ୟାନ କରିଥିଲେ। ତା’ପରେ ନିକଟସ୍ଥ ୫-ଟି ହାଇସ୍କୁଲ ପରିଦର୍ଶନ କରିଥିଲେ। ସେଠାରୁ ଫେରି ସେ ତକତପୁରସ୍ଥିତ ଗ୍ରାମ୍ୟ ସ୍ବରାଜ କୌଶଳ ଯୋଜନା ଅଧୀନ ତାଲିମ କେନ୍ଦ୍ର ପରିଦର୍ଶନ କରିବା ପରେ ସର୍କିଟ ହାଉସରେ ରାତି ରହଣି କରିଛନ୍ତି । ଗୁରୁବାର ସେ ବ୍ଲକର ବୀରେଶ୍ୱରପୁର ପଞ୍ଚାୟତର ଏମ୍ଜିଏନ୍ଆର୍ଇଜିଏଏସ୍ ଅନୁଦାନରେ ନିର୍ମିତ ଫାର୍ମପଣ୍ଡ ପରିଦର୍ଶନ କରିବେ। ସେହିପରି ଖୁଣ୍ଟା ବ୍ଲକର ଲକ୍ଷଣସାହିରେ ଥିବା ରବର ପ୍ରସେସିଂ ୟୁନିଟ୍, ଗୋପବନ୍ଧୁନଗର ବ୍ଲକରେ ନିର୍ମାଣାଧୀନ ମେଗା ପାଇପ ପାନୀୟ ଜଳଯୋଗାଣ ପ୍ରକଳ୍ପ, ଗୋଟିଏ ଡକ୍ରାଶିଳ୍ପ ଓ ୨ଟି ଅଙ୍ଗନଓ୍ବାଡ଼ି କେନ୍ଦ୍ର ପରିଦର୍ଶନ କରିବେ। ଶେଷରେ ଉଦଳା ବ୍ଲକର ଭୀମତାଳି ବନ୍ଧର ସୌନ୍ଦର୍ଯ୍ୟକରଣ ଓ ଉଦ୍ୟାନକୃଷି ବିଭାଗର କ୍ଷେତ୍ର ପରିଦର୍ଶନ କରିବେ ବୋଲି ଗସ୍ତ ସୂଚୀରୁ ଜଣାପଡ଼ିଛି।