ଲକ୍ଷ୍ନୌ,୫।୧୨: ୍ ଡିସେମ୍ବର ୬କୁ ଦୃଷ୍ଟିରେ ରଖି ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସରକାର ମଥୁରାରେ ବିଶେଷ ସତର୍କତା ଅବଲମ୍ବନ କରିଛନ୍ତି। ସ୍ଥାନୀୟ ସଂଗଠନ ଅଖିଳ ଭାରତୀୟ ହିନ୍ଦୁ ମହାସଭା ପକ୍ଷରୁ ଡିସେମ୍ବର ୬ରେ ଶ୍ରୀକୃଷ୍ଣ ଜନ୍ମଭୂମି କମ୍ପ୍ଲେକ୍ସରେ ଅବସ୍ଥିତ ଶାହି ଉଦ୍ଗାହରେ ପ୍ରବେଶ କରି ପ୍ରଭୁ ଶ୍ରୀକୃଷ୍ଣଙ୍କ ବାଲ ବିଗ୍ରହଙ୍କର ଜଳାଭିିଷେକ ଘୋଷଣା କରିବା ପରେ ଜିଲା ପୋଲିସ ପ୍ରଶାସନ ସଜାଗ ରହିଛି। ସ୍ଥାନୀୟ ପ୍ରଶାସନ ପକ୍ଷରୁ ଜିଲାରେ ୧୪୪ ଧାରା ଲାଗୁ କରାଯାଇଛି। ଶ୍ରୀକୃଷ୍ଣ ଜନ୍ମସ୍ଥାନ, ଶାହି ମସଜିଦ ଇସ୍ଗାହ ଏବଂ ଏହାର ଆଖପାଖ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି।
ଜିଲା ଡିଏମ ନବନୀତ ସିଂ ଚହଲ, ଏସଏସପି ଡ.ଗୌରବ ଗ୍ରୋଭର ଏବଂ ଡିଏସପି ଅଭିଶେକ ତିୱାରୀ ସହରର ସମ୍ବେଦନଶୀଳ ଅଞ୍ଚଳ ବୁଲି ନିରୀକ୍ଷଣ କରିଛନ୍ତି। ଏହା ସହିତ ସମସ୍ତ ସୁରକ୍ଷାକର୍ମୀ ଏବଂ ପୋଲିସ ଅଧିକାରୀଙ୍କୁ ସତର୍କ ରହିବାକୁ ନିର୍ଦ୍ଦେଶ ଦିଆଯାଇଛି। ମଥୁରା ପ୍ରଶାସନ ପକ୍ଷରୁ ୨୦୨୧ ନଭେମ୍ବର ୨୪ ରୁ ୨୦ ଜାନୁୟାରୀ ୨୦୨୨ ପର୍ଯ୍ୟନ୍ତ ଜିଲାରେ ନିଷେଧାଦେଶ ଜାରି କରାଯାଇଛି। ଏହି କାରଣରୁ ୫ କିମ୍ବା ୫ରୁ ଅଧିକ ଲୋକଙ୍କୁ ସମଗ୍ର ଜିଲାରେ ବିନା ଅନୁମତିରେ ଏକାଠି ଭିଡ଼ ଜମାଇବାକୁ ବାରଣ କରାଯାଇଛି।
