ନିଶ୍ଚିନ୍ତକୋଇଲି,୨୦।୪(ସ୍ବ.ପ୍ର.): ଓଡ଼ିଶା ପ୍ରସିଦ୍ଧ ଦାଣ୍ଡ ଯାତ୍ରା ଉପରେ କଟକଣା ଲାଗିଛି। କୋଭିଡ୍ ସଂକ୍ରମଣକୁ ଦୃଷ୍ଟିରେ ରଖି ସ୍ଥାନୀୟ ପ୍ରଶାସନ ପକ୍ଷରୁ ୧୪୪ ଧାରା ଜାରି କରାଯାଇଛି। କଟକ ଜିଲା ନିଶ୍ଚିନ୍ତକୋଇଲି ବ୍ଲକ କେଣ୍ଟାଳ ପଞ୍ଚାୟତ ଅଧୀନ ମାଲିପୁର ଗ୍ରାମରେ ଥିବା ପ୍ରସିଦ୍ଧ ଆସୁରେଶ୍ୱର ରାମମନ୍ଦିରରେ ଶ୍ରୀରାମ ନବମୀ ଓ ଦାଣ୍ଡ ଯାତ୍ରା ଅନୁଷ୍ଟିତ ହୋଇଥାଏ। ଏଥିରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ। ଚଳିତ ବର୍ଷ କରୋନା କଟକଣା ଲାଗି ବିନା ଭକ୍ତରେ ଏହାକୁ କରାଯିବାକୁ ନିଷ୍ପତ୍ତି ନିଆଯାଇଛି। ନିଶ୍ଚିନ୍ତକୋଇଲି ତହସିଲଦାର ମନୋରଞ୍ଜନ ତରସିଆ ମଙ୍ଗଳବାର ରଘୁନାଥ ମନ୍ଦିରର ୧୦୦ ମିଟର ପରିଧିରେ ୧୪୪ ଧାରା ଜାରି କରିଛନ୍ତି। ଏନେଇ ତହସିଲଦାର ନିଶ୍ଚିନ୍ତକୋଇଲି ଥାନା ଅଧିକାରୀଙ୍କୁ ଅବଗତ କରାଇବା ପରେ ମନ୍ଦିର ଚତୁଃପାର୍ଶ୍ୱରେ ବାଉଁଶ ବ୍ୟାରିକେଟ କରିବା ଲାଗି ଟ୍ରଷ୍ଟ ବୋର୍ଡକୁ ଅବଗତ କରାଯାଇଛି। ବୁଧବାର ଶ୍ରୀରାମ ନବମୀ ପାଇଁ ବ୍ୟାପକ ପୋଲିସ ମୁତୟନ କରାଯିବାର ବ୍ୟବସ୍ଥା ରହିଛି। ଆସନ୍ତା ୨୦ ତାରିଖରୁ ୨୨ ତାରିଖ ଓ ୨୪ ତାରିଖରୁ ୨୮ ତାରିଖ ପର୍ଯ୍ୟନ୍ତ ସକାଳ ୬ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଏହି କଟକଣା ଲାଗୁ ହେବ ବୋଲି ତହସିଲଦାର କହିଛନ୍ତି।