ବାରଙ୍ଗ,୧୨।୨(ଡି.ଏନ୍.ଏ.): ନନ୍ଦନକାନନରେ ପୁଣି ସୁରକ୍ଷା ପାଚେରି ଭାଙ୍ଗି ଭିତରକୁ ପଶିଛନ୍ତି ଚନ୍ଦକା ଜଙ୍ଗଲର ଦୁଇଟି ହାତୀ। ପରିସରରେ ପଶି ଏଣେତେଣେ ବୁଲି ବୋଟ୍ ଘାଟ ପାଖ ପମ୍ପଘର ପଛପଟେ ଲାଗିଥିବା କଦଳୀ ଗଛଗୁଡିକୁ ଭାଙ୍ଗି ଖାଇଦେଇଛନ୍ତି ଏହି ଦୁଇ ହାତୀ। ଏହାସହ ଶିଶୁ ରେଳଗାଡ଼ି ରେଳଧାରଣା ଉପରେ ଚାଲି ଚାଲି ବାଘ ସଫାରି ଦେଇ ହମିରାଟାଙ୍ଗୀ ଜଙ୍ଗଲ ଭିତରେ ପଶିରହିଛନ୍ତି। ସିକ୍ୟୁରିଟି ବିଭାଗର ଜଗୁଆଳମାନେ ରାତିରେ ନନ୍ଦନକାନନ ଭିତରେ ଜଗୁଥିଲେ ମଧ୍ୟ ହାତୀ ବିଷୟରେ ଜାଣିପାରିନାହାନ୍ତି। ଶୁକ୍ରବାର ସକାଳେ କଦଳୀ ଗଛଗୁଡିକ ଭାଙ୍ଗିଥିବାର ଜାଣି ସିସିଟିଭି ଫୁଟେଜ୍କୁ ଅନୁଧ୍ୟାନ ପରେ ଜଙ୍ଗଲୀ ହାତୀ ପଶିଥିବାର ଜାଣିବାକୁ ପାଇଛନ୍ତି ନନ୍ଦନକାନନ କର୍ତ୍ତୃପକ୍ଷ। ଖବର ପାଇ ଚନ୍ଦକା-ଡମପଡ଼ା ଅଭୟାରଣ୍ୟର ଏକ ଟିମ୍ ନନ୍ଦନକାନନ ଟିମ୍ ସହ ମିଶି ହାତୀଦ୍ୱୟକୁ ଘଉଡାଇବା ପାଇଁ ଦିନସାରା ଚେଷ୍ଟା କରିଥିଲେ ମଧ୍ୟ ସେମାନେ ହମିରାଟାଙ୍ଗୀ ଜଙ୍ଗଲ ଭିତରୁ ପଦାକୁ ବାହାରି ନ ଥିଲେ। ପୁଣି ରାତିରେ ହାତୀ ଘଉଡ଼ାଇବା ଅଭିଯାନ ଆରମ୍ଭ ହେବ ବୋଲି ସୂଚନା ମିଳିଛି।
