କୋହିମା,୫।୧୨: ସୁରକ୍ଷା ବାହିନୀଙ୍କ ଭୁଲ ଯୋଗୁ ନାଗାଲାଣ୍ଡରେ ୧୩ ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଛି। ଏହି ଘଟଣା ପରେ କ୍ରୋଧିତ ଗ୍ରାମବାସୀ ସୁରକ୍ଷା ବାହିନୀଙ୍କ ଗାଡିରେ ନିଆଁ ଲଗାଇ ଦେଇଛନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ, ଏହି ଘଟଣା ମୋନ୍ ଜିଲାର ଓଟିଙ୍ଗ ଗ୍ରାମରେ ଘଟିଛି। ଗ୍ରାମବାସୀ ଏକ ପିକଅପ ଟ୍ରକରେ ଘରକୁ ଫେରୁଥିଲେ।
କୁହାଯାଉଛି ଯେ ଭୁଲରେ ସୁରକ୍ଷା ବାହିନୀ ସେମାନଙ୍କ ଉପରକୁ ଗୁଳି ଚଳାଇଥିଲେ। ଏହି ଘଟଣାରେ ବହୁ ଲୋକ ମଧ୍ୟ ଆହତ ହୋଇଛନ୍ତି। ଘଟଣା ପରେ ନାଗାଲାଣ୍ଡ ମୁଖ୍ୟମନ୍ତ୍ରୀ ନେଫିୟୁ ରିଓ ଶାନ୍ତି ବଜାୟ ରଖିବାକୁ ଲୋକଙ୍କୁ ନିବେଦନ କରିଛନ୍ତି। ଏହା ସହିତ ସ୍ବତନ୍ତ୍ର ଅନୁସନ୍ଧାନକାରୀ ଦଳ (ଏସଆଇଟି) ଦ୍ୱାରା ଘଟଣାର ଅନୁସନ୍ଧାନ କରାଯିବ ବୋଲି ନିିର୍ଦ୍ଦେଶ ଜାରି କରିଛନ୍ତି।
ମୁଖ୍ୟମନ୍ତ୍ରୀ ଟୁଇଟ୍ କରି କହିଛନ୍ତି ଯେ ଓଟିଙ୍ଗରେ ସାଧାରଣ ନାଗରିକଙ୍କ ହତ୍ୟା ଅତ୍ୟନ୍ତ ନିନ୍ଦନୀୟ। ଏହି ଘଟଣାର ତଦନ୍ତ ପାଇଁ ସେ ଉଚ୍ଚ ସ୍ତରୀୟ ଏସଆଇଟିକୁ ନିର୍ଦ୍ଦେଶ ଦେଇଛନ୍ତି। ସିଏମ କହିଛନ୍ତି- ଦେଶର ଆଇନ ଅନୁଯାୟୀ ଏସଆଇଟି ନ୍ୟାୟ କରିବ। ସେ ଶାନ୍ତି ପାଇଁ ନିବେଦନ କରିଛନ୍ତି। ତେବେ ଏହି ଗୁଳି ବିନିମୟ କିପରି ହୋଇଛି ସେନେଇ କୌଣସି ସରକାରୀ ବିବୃତ୍ତି ଦିଆଯାଇ ନାହିଁ। ନାଗାଲାଣ୍ଡର ସ୍ଥାନୀୟ ଗଣମାଧ୍ୟମ ଅନୁଯାୟୀ, ସୁରକ୍ଷା ବାହିନୀ ମାଓବାଦୀଙ୍କ ବିରୋଧରେ ଅପରେଶନ ଚଳାଉଥିଲେ। ଏହି ସମୟରେ ଏହି ଘଟଣା ଘଟିଥିଲା।
ଗ୍ରାମବାସୀ ଠିକ ସମୟରେ ଘରେ ପହଞ୍ଚି ନ ଥିବାରୁ ସେମାନଙ୍କ ପରିବାର ସଦସ୍ୟ ଖୋଜାଖୋଜି ଜାରି ରଖିଥିଲେ। ମୃତଦେହ ମିଳିବା ପରେ ଗ୍ରାମବାସୀ ରାଗିଯାଇ ସୁରକ୍ଷା ବାହିନୀଙ୍କ ଗାଡିରେ ନିଆଁ ଲଗାଇ ଦେଇଥିଲେ। ରାଜ୍ୟ ଆଇପିଏସ ଅଧିକାରୀ ରୁପିନ ଶର୍ମା ଏହି ଘଟଣାର ଭିଡିଓ ଟୁଇଟରରେ ଅପଲୋଡ୍ କରିଥିଲେ। ସେ ଗାଡିରେ ନିଆଁ ଲଗାଯାଉଥିବାର ଭିଡ଼ିଓ ଏବଂ ଫଟୋ ମଧ୍ୟ ଅପଲୋଡ୍ କରିଥିଲେ, କିନ୍ତୁ ପରେ ସେ ଭିଡିଓ ଡିଲିଟ କରି ଦେଇଥିଲେ।
