ମୁମ୍ବାଇ,୪।୭: କରୋନା ଭାଇରସ୍ ସଂକ୍ରମଣ ଯୋଗୁ ଏବେ ସରକାରୀ ହେଉ କି ବେସରକାରୀ ସମସ୍ତ କାର୍ଯ୍ୟାଳୟରେ କମ୍ କର୍ମଚାରୀଙ୍କୁ ନେଇ କାମ କରାଯାଉଛି। ବାକି ଅନ୍ୟମାନେ ଘରେ ରହି କାର୍ଯ୍ୟ କରୁଛନ୍ତି। କରୋନା ଲକ୍ଡାଉନ ସମୟରେ ଓ୍ବାର୍କ ଫ୍ରମ୍ ହୋମ୍ ଶବ୍ଦ ବହୁଥର ଶୁଣିଥିବେ ଏବଂ କାର୍ଯ୍ୟରେ ମଧ୍ୟ ଲଗେଇଥିବେ। କିନ୍ତୁ ଓ୍ବାର୍କ ଫ୍ରମ୍ ଷ୍ଟେଜ୍ କଥା କେବେ ଶୁଣିଛନ୍ତି କିମ୍ବା କରିଛନ୍ତି କି। କିଛି ଏଭଳି ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଯେଉଁଥିରେ ବିବାହ ମଞ୍ଚ ଉପରେ ଜଣେ କନ୍ୟା ବସି ଲ୍ୟାପଟପ୍ରେ କାର୍ଯ୍ୟ କରୁଥିବା ଦେଖିବାକୁ ମିଳିଛି। ଗୋଟିଏ ହାତରେ ଲ୍ୟାପ୍ଟପ୍ ଓ ଅନ୍ୟ ହାତରେ ମୋବାଇଲ ଧରି କନ୍ୟା ଜଣଙ୍କ କାମ କରୁଛନ୍ତି। କାମ କରିବାରେ ଏତେ ବ୍ୟସ୍ତ ରହିଯାଇଛନ୍ତି ଯେ, ନିଜ ବିବାହକୁ ମଧ୍ୟ ଉପଭୋଗ କରିପାରୁ ନାହାନ୍ତି। ଅନ୍ୟପଟେ କନ୍ୟାଙ୍କୁ ଏଭଳି କାର୍ଯ୍ୟ କରୁଥିବା ଦେଖି ବର ମଧ୍ୟ କିଛି କହି ପାରୁନାହାନ୍ତି। କେବଳ ଆଶ୍ଚର୍ଯ୍ୟ ହୋଇ ତାଙ୍କୁ ଅନେଇକି ବସିଛନ୍ତି। କେତେବେଳେ କାମ ସରିବ ଓ କନ୍ୟା ତାଙ୍କୁ ଟିକେ ପ୍ରେମଭରା ଦୃଷ୍ଟିରେ ଅନେଇବେ। ସେହିପରି ସେଠାରେ ଉପସ୍ଥିତ ଥିବା ଅତିଥିମାନେ ଏହାକୁ ନେଇ କମେଣ୍ଟ କରି କହିଛନ୍ତି, ମାସକ ଟାର୍ଗେଟ ପୁରା ହୋଇନି କି। ଏହି ଭିଡିଓ ଏବେ ଭାଇରାଲ ହୋଇଥିବା ବେଳେ ଏହା କେଉଁଠିକାର ଜଣାପଡ଼ିନାହିଁ।
