ନୂଆଦିଲ୍ଲୀ,୧୭।୭: ପାକିସ୍ତାନ ଛାଡି ଭାରତ ପଳାଇଆସିଥିବା ସୀମା ଗୁଲାମ ହେଦର ଏବଂ ତାଙ୍କ ସ୍ବାମୀ ସଚିନଙ୍କୁ ଜାମିନ ମିଳିଛି। କିଛି ସର୍ତ୍ତରେ ତାଙ୍କୁ ଜେଲରୁ ମୁକ୍ତ କରାଯାଇଛି। କୋର୍ଟ କହିଛନ୍ତ, ଯଦି ସୀମାଙ୍କୁ ସହର ବାହାରେ କୌଣସି ସ୍ଥାନକୁ ଯିବାକୁ ପଡେ, ତେବେ ତାଙ୍କୁ ପୋଲିସକୁ ଜଣାଇବାକୁ ପଡିବ। ସେ କେବଳ ସଚିନଙ୍କ ଠିକଣାରେ ରହିବେ। ମୋକଦ୍ଦମା ଚାଲିଥିବା ପର୍ଯ୍ୟନ୍ତ ତାଙ୍କୁ କୌଣସି ସ୍ଥାନକୁ ଯିବାକୁ ପଡିବ ନାହିଁ। ଅନ୍ୟପକ୍ଷରେ ପାକିସ୍ତାନ ସୀମାଙ୍କ ସ୍ବାମୀ ଗୁଲାମ ସୀମା ଗୁଲାମ ହେଦର ସୋସିଆଲ ମିଡିଆ ମାଧ୍ୟମରେ ଭାରତ ସରକାରଙ୍କୁ ତାଙ୍କ ସ୍ତ୍ରୀଙ୍କୁ ପାକିସ୍ତାନ ପଠାଇବାକୁ ନିବେଦନ କରୁଛନ୍ତି।
ଏକ ସ୍ବତନ୍ତ୍ର ସାକ୍ଷାତକାରରେ ସୀମା କହିଛନ୍ତି, ସେ ବାଗେଶ୍ୱର ଧାମର ଧୀରେନ୍ଦ୍ର ଶାସ୍ତ୍ରୀଙ୍କୁ ପସନ୍ଦ କରନ୍ତି। ସେ କହିଛନ୍ତି, ମୁଁ ଧୀରେନ୍ଦ୍ର ଶାସ୍ତ୍ରୀଙ୍କୁ ପସନ୍ଦ କରେ। ତାଙ୍କ ହସ ମୋତେ ବହୁତ୍ ପସନ୍ଦ। ତାଙ୍କ ଈଶ୍ୱରୀୟ ଧାମକୁ ଯିବାକୁ ମୋର ଇଚ୍ଛା। କିନ୍ତୁ କୋର୍ଟଙ୍କ ନିର୍ଦ୍ଦେଶ ହେତୁ ମୁଁ କୌଣସି ସ୍ଥାନକୁ ଯାଇପାରିବି ନାହିଁ। କୋର୍ଟଙ୍କ ନିଷ୍ପତ୍ତି ମୋ ସପକ୍ଷରେ ଆସିବ। ମୁଁ କେବଳ ଭାରତରେ ରହିବି, ଏଠାରେ ମୋତେ ବଞ୍ଚିବାକୁ ପଡିବ।
ସୂଚନାଯୋଗ୍ୟ, ସୀମା ଗୁଲାମ ହେଦର ଅନ୍ଲାଇନ୍ ପବ୍ଜି ଖେଳି ନୋଏଡାର ସଚିନ ମିଣାଙ୍କ ପ୍ରେମରେ ପଡ଼ିବା ପରେ ପାକିସ୍ତାନ ଛାଡ଼ି ଭାରତ ଚାଲିଆସିଥିଲେ। ନିଜ ୪ ପିଲାଙ୍କ ସହ ନେପାଳ ଦେଇ ଭାରତ ଆସିଥିବା ସୀମା ପୁଣିଥରେ ପାକିସ୍ତାନ ନ ଫେରନ୍ତୁ ବୋଲି ତାଙ୍କ ସମ୍ପର୍କୀୟ କହିଛନ୍ତି। ସେମାନଙ୍କ ମତରେ ସୀମା ଏବେ ଅନ୍ୟ ସମ୍ପ୍ରଦାୟର ହୋଇଗଲେଣି। ସେଥିପାଇଁ ତାଙ୍କୁ ପୁଣିଥରେ ଗ୍ରହଣ କରାଯାଇ ପାରିବ ନାହିଁ। ଭାରତରେ ବେଆଇନ ପ୍ରବେଶ ନେଇ ସୀମାଙ୍କୁ ଜୁଲାଇ ୪ରେ ଗିରଫ କରାଯାଇଥିଲା। ଜାମିନରେ ଆସିବା ପରେ ସେ ପାକିସ୍ତାନ ଯିବାକୁ ଏବେ ଅରାଜି। ସେଠାକୁ ଗଲେ ତାଙ୍କୁ ମୃତ୍ୟୁ ଭୟ ଥିବା ସୀମା କହିଛନ୍ତି।
ସୀମାଙ୍କ ପୂର୍ବତନ ସ୍ବାମୀ ଗୁଲାମ ହେଦର ସାଉଦି ଆରବରେ ଚାକିରି କରୁଥିବାବେଳେ ସୀମା ତାଙ୍କ ପିଲାଙ୍କ ସହ ଏକୁଟିଆ ଗୁଲିସ୍ତାନ-ଇ-ଜୈହାରସ୍ଥିତ ଘରେ ରହୁଥିଲେ। ୨୦୧୯ରୁ ସୀମା ସଚିନଙ୍କ ପ୍ରେମରେ ପଡ଼ିଥିବା କୁହାଯାଉଛି। ଗୁଲାମ ପୁଣିଥରେ ସୀମାଙ୍କୁ ଆପଣାଇବାକୁ ପ୍ରସ୍ତୁତ ଥିବା ଏକ ଭିଡିଓ ଶେୟାର କରି କହିଛନ୍ତି। ୧୦ ବର୍ଷ ପୂର୍ବେ ସୀମା ଓ ଗୁଲାମ ପ୍ରେମ ବିବାହ କରିଥିଲେ।