ଋଷିକେଶ: ଅଯୋଧ୍ୟା ରାମ ମନ୍ଦିର ନିର୍ମାଣ ପାଇଁ ପ୍ରସ୍ତୁତି ଜୋରସୋରରେ ଚାଲିଛି। ସମାଜର ବିଭିନ୍ନ ବର୍ଗର ଲୋକେ କ୍ରମାଗତ ଭାବେ ଏଥିପାଇଁ ଦାନ କରୁଥିବା ଦେଖାଯାଉଛି। ଏହି କ୍ରମରେ ଜଣେ ବାବା ୧ କୋଟି ଟଙ୍କା ଦାନ କରିବା ପରେ ଚର୍ଚ୍ଚାକୁ ଆସିଛନ୍ତି। ସେ ହେଲେ ବାବା ଶଙ୍କର ଦାସ। ସେ ଗତ ୬୦ ବର୍ଷ ଧରି ମାଣିକୋଟ ପର୍ବତର ପାଦଦେଶରେ ଥିବା ପ୍ରସିଦ୍ଧ ନୀଳକଣ୍ଠ ମହାଦେବ ମନ୍ଦିରର ଗୁମ୍ଫାରେ ଜୀବନ ଅତିବାହିତ କରୁଛନ୍ତି। ଲୋକମାନେ ତାଙ୍କୁ ଫକ୍କଡ ବାବାଙ୍କ ନାମରେ ମଧ୍ୟ ଜାଣନ୍ତି। ତେବେ ବର୍ଷ ବର୍ଷ ଧରି ଭକ୍ତମାନେ ଆସି ଗୁମ୍ଫାରେ ଥିବା ବାବାଙ୍କ ନିକଟରେ ଦାନ ଦକ୍ଷିଣା ଦେଇ ଯାଇଥାନ୍ତି। ବାବା ଏହି ପୁଞ୍ଜିକୁ ସଞ୍ଚୟ କରି ଏତେ ପରିମାଣର ଟଙ୍କା ସଂଗ୍ରହ କରିଥିଲେ।
୮୩ ବର୍ଷୀୟ ଶଙ୍କର ବାବା ବ୍ୟାଙ୍କ କର୍ମଚାରୀଙ୍କୁ ୧ କୋଟି ଟଙ୍କାର ଚେକ୍ ଦେଇଥିଲେ। ଏହାଦେଖି ସେମାନେ ଆଶ୍ଚର୍ଯ୍ୟ ହୋଇଯାଇଥିଲେ । ପରେ କର୍ମଚାରୀମାନେ ଖାତାରେ ଏତେ ରାଶି ଅଛି କି ନାହିଁ ତାହା ଯାଞ୍ଚ କରି ତାଜୁବ ହୋଇଥିଲେ। ତେବେ ରାମ ମନ୍ଦିର ପାଇଁ ଦାନ କରିବା ପରେ ତାଙ୍କ ଜୀବନର ଲକ୍ଷ୍ୟ ପୂରଣ ହୋଇଛି ବୋଲି ସେ କହିଛନ୍ତି।
୩୬ରୁ ୩୯ ମାସ ମଧ୍ୟରେ ରାମ ମନ୍ଦିର ନିର୍ମାଣ କାର୍ଯ୍ୟ ଶେଷ ହେବାକୁ ସ୍ଥିର କରାଯାଇଛି। ଏହାକୁ ନେଇ ରାଜନେତାଙ୍କଠାରୁ ଆରମ୍ଭ କରି ଚଳଚ୍ଚିତ୍ର ଜଗତ ତଥା ସମାଜର ସାଧାରଣ ବର୍ଗର ଲୋକମାନେ ଦାନ ଦେଉଛନ୍ତି। ଏଯାବତ କୋଟି କୋଟି ଟଙ୍କା ଜମା ହୋଇସାରିଥିବା ବେଳେ ଦିନକୁ ଦିନ ଏହା ବଢ଼ିବାରେ ଲାଗିଛି।
