ନୂଆଦିଲ୍ଲୀ,୨୪।୩: ଭାରତୀୟ ଦଳ ପାଇଁ ଖେଳାଳି ଚୟନ କରାଯାଉଥିବା ବେଳେ ପକ୍ଷପାତ କରାଯାଉଥିବା କହିଛନ୍ତି ପୂର୍ବ ଓପନର ବିରେନ୍ଦ୍ର ସେହଓ୍ବାଗ୍। ଇଂଲଣ୍ଡ ବିପକ୍ଷରେ ଖେଳାଯିବାକୁ ଥିବା ଦିନିକିଆ ଟିମ୍ରେ କେଏଲ୍ ରାହୁଲଙ୍କୁ ପୁଣିଥରେ ସୁଯୋଗ ଦିଆଯାଇଥିବା ଦେଖି ସେ ଏଭଳି କହିଛନ୍ତି।
ତେବେ ଭାରତ ଏକାଦଶରେ ରିଷଭ ପନ୍ତଙ୍କ ସ୍ଥାନରେ ରାହୁଲଙ୍କୁ ଉଇକେଟକିପର ବ୍ୟାଟ୍ସମ୍ୟାନ୍ ଭାବେ ଖେଳାଇବାର ନିଷ୍ପତ୍ତି ନିଆଯାଇଥିଲା। ଲଗାତାର ଖରାପ ପ୍ରଦର୍ଶନ ସତ୍ତ୍ୱେ ତାଙ୍କୁ ଏତେ ମାତ୍ରାରେ ସୁଯୋଗ ଦିଆଯାଉଛି। ଅପରପକ୍ଷେ ବୋଲରମାନଙ୍କୁ ସେଭଳି ସୁଯୋଗ ଦିଆଯାଉନାହିଁ ବୋଲି ସେହଓ୍ବାଗ କହିବା ସହ ଏହା ପକ୍ଷପାତ ବୋଲି ସେ କହିଛନ୍ତି।
ପ୍ରକାଶ ଯେ, ଟି୨୦ ସିରିଜର ୪ ମୁକାବିଲାରେ ନିରାଶ କରିବା ପରେ ପଞ୍ଚମ ମ୍ୟାଚ୍ରେ ରାହୁଲଙ୍କୁ ସୁଯୋଗ ଦିଆଯାଇ ନ ଥିଲା। ହେଲେ ସେ ପୁଣିଥରେ ଟିମ୍କୁ ଫେରିଛନ୍ତି। ଅପରପକ୍ଷେ ୟୁଜବେନ୍ଦ୍ର ଚହଲଙ୍କୁ ଟି୨୦ ସିରିଜର ଶେଷ ଦୁଇ ମୁକାବିଲାରେ ତାଙ୍କୁ ବାହାର କରାଯାଇଥିବା ବେଳେ ଦିନିକିଆ ମ୍ୟାଚ୍ରେ ତାଙ୍କୁ ଖେଳାଯାଇନାହିଁ। ଏଥିନେଇ ଚହଲଙ୍କ କ୍ଷେତ୍ରରେ ଏଭଳି ରଣନୀତି କାହିଁକି ଆପଣାଉନାହାନ୍ତି ବୋଲି ସେହଓ୍ବାଗ ପ୍ରଶ୍ନ କରିଛନ୍ତି। ଗୋଟିଏ ମ୍ୟାଚ୍ରେ ଖରାପ ପ୍ରଦର୍ଶନ ଦେଖି ବୋଲରଙ୍କୁ ବାହାର କରିଦିଆଯାଉଛି ହେଲେ କେଏଲ୍ଙ୍କୁ ୪ ମ୍ୟାଚ୍ ଦିଆଯାଉଛି । ବୁମ୍ରାଙ୍କ କ୍ଷେତ୍ରରେ ମଧ୍ୟ ସେଭଳି କିଛି କରାଯାଉଥିବା ସେ କହିଛନ୍ତି।