ଶାରଜା,୧୨।୧୦: ଲିଗ୍ ପର୍ଯ୍ୟାୟରେ ଚମତ୍କାର ପ୍ରଦର୍ଶନ ସତ୍ତ୍ୱେ ଏଲିମିନେଟର ମ୍ୟାଚ୍ରେ ଆଶାନୁରୂପ ପ୍ରଦର୍ଶନ କରିପାରି ନ ଥିଲା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି)। ଦଳ କୋଲକାତା ନାଇଟ୍ ରାଇଡର୍ସଠାରୁ ୪ ଉଇକେଟରେ ହାରିଯାଇଛି। ବାଙ୍ଗାଲୋର ହାରିବା ପରେ ଅଲରାଉଣ୍ଡର ଡାନିଏଲ ଖ୍ରୀଷ୍ଟିଆନଙ୍କ ଖରାପ ପ୍ରଦର୍ଶନ ଭାରି ପଡ଼ିଥିବା ନେଇ ଚର୍ଚ୍ଚା ହେଉଛି। ସେ ଉଭୟ ବ୍ୟାଟିଂ ଏବଂ ବୋଲିଂରେ ଅସଫଳ ହେବା ଯୋଗୁ ଦଳ ହାତରୁ ମ୍ୟାଚ୍ ଚାଲିଯାଇଥିବା କୁହାଯାଉଛି। ଏହାକୁ ନେଇ ଖପ୍ପା ହୋଇଛନ୍ତି ପୂର୍ବ ବିସ୍ଫୋରକ ଭାରତୀୟ ବ୍ୟାଟ୍ସମ୍ୟାନ ବିରେନ୍ଦ୍ର ସେହ୍ବାଗ।
ଆର୍ସିବି କେବଳ ୧୦ଜଣ ଖେଳାଳିଙ୍କୁ ନେଇ ଖେଳିଆସୁଥିଲା। ଏଲିମିନେଟର୍ରେ ତାର ପରିଣାମ ଭୋଗିବାକୁ ପଡ଼ିଛି। ଲକି ଚାର୍ମକୁ ଖେଳାଇବାକୁ ଚାହୁଁଥିଲେ କର୍ଣ୍ଣ ଶର୍ମାଙ୍କଠାରୁ ଭଲ ଆଉ କେହି ନୁହେଁ ବୋଲି ସେହ୍ବାଗ କହିଛନ୍ତି।
କହିରଖୁଛୁ, ଆଇପିଏଲ୍ ନିଲାମର ପ୍ରଥମ ରାଉଣ୍ଡରେ ଖ୍ରୀଷ୍ଟିଆନଙ୍କୁ କେହି କିଣି ନ ଥିଲେ। ପରେ ବାଙ୍ଗାଲୋର ତାଙ୍କୁ ୪.୮ କୋଟି ଟଙ୍କାରେ କିଣିଥିଲା। ଏହି ଖେଳାଳି ଚଳିତ ଆଇପିଏଲ୍ରେ ନିରାଶାଜନକ ପ୍ରଦର୍ଶନ କରିଛନ୍ତି। ସେ ମୋଟ ୯ ମ୍ୟାଚ୍ ଖେଳିଥିଲେ ହେଁ ସବୁଥିରେ ଫ୍ଲପ୍ ହୋଇଛନ୍ତି। ଏହି ସିଜନ୍ରେ ୭ ଥର ତାଙ୍କୁ ବ୍ୟାଟିଂର ସୁଯୋଗ ମିଳିଥିଲା। ସେ ୨.୩୩ ହାରରେ ମାତ୍ର ୧୪ ରନ୍ କରିଥିଲେ। ସେହିଭଳି ସେ ବୋଲିଂରେ ୯.୩୦ ହାରରେ କେବଳ ୪ ଉଇକେଟ ନେଇଛନ୍ତି।
