ନୂଆଦିଲ୍ଲୀ, ୨୨।୧୦: ଅନ୍ତର୍ଜାତୀୟ ଟେଷ୍ଟ କ୍ରିକେଟ୍ ଇତିହାସରେ ଗୋଟିଏ ଇନିଂସରେ ସର୍ବାଧିକ ବ୍ୟକ୍ତିଗତ ସ୍କୋର କରିବା ରେକର୍ଡ ଓ୍ବେଷ୍ଟଇଣ୍ଡିଜର କିମ୍ବଦନ୍ତୀ ବ୍ୟାଟ୍ସମ୍ୟାନ ବ୍ରାଏନ ଲାରାଙ୍କ ନାମରେ ରହିଛି। ୨୦୦୪ ମସିହାରେ ଆଣ୍ଟିଗୁଆରେ ଭ୍ରମଣକାରୀ ଇଂଲଣ୍ଡ ବିପକ୍ଷରେ ଖେଳାଯାଇଥିବା ୪ର୍ଥ ଟେଷ୍ଟ ମ୍ୟାଚ୍ରେ ଲାରା ଅପରାଜିତ ୪୦୦ ରନ ସଂଗ୍ରହ କରିଥିଲେ। ଯାହା ଆଜି ପର୍ଯ୍ୟନ୍ତ ବିଶ୍ୱ ରେକର୍ଡ ହୋଇରହିଛି। ଗତ ୧୬ ବର୍ଷ ହେବ ଅନେକ ବ୍ୟାଟ୍ସମ୍ୟାନ ଏହାର ନିକଟତର ହୋଇଥିଲେ ମଧ୍ୟ ଏହି ରେକର୍ଡକୁ ଭାଙ୍ଗିପାରି ନାହାନ୍ତି। ଭାରତର ପ୍ରାକ୍ତନ ବ୍ୟାଟ୍ସମ୍ୟାନ ବୀରେନ୍ଦ୍ର ସେହ୍ବାଗ ବିଶ୍ୱାସ କରନ୍ତି ଯେ, ଏହି ରେକର୍ଡ ଭାଙ୍ଗିବାର କ୍ଷମତା ବିଶ୍ୱର ୨ ଜଣ ବ୍ୟାଟ୍ସମ୍ୟାନଙ୍କ ନିକଟରେ ରହିଛି। ସେହି ୨ ଜଣ ହେଲେ ଭାରତର ରୋହିତ୍ ଶର୍ମା ଓ ଅଷ୍ଟ୍ରେଲିଆର ଡେଭିଡ୍ ଓ୍ବାର୍ନର।
ମିଡିଆରେ ନିଜର ସ୍ବତନ୍ତ୍ର ଶୋ ‘ଭୀରୁ କି ବୈଠକ’ରେ ଲାରାଙ୍କ ରେକର୍ଡକୁ ନେଇ ସେହ୍ବାଗ କହିଛନ୍ତି, ଯଦି ଏହି ରେକର୍ଡକୁ କେହି ଭାଙ୍ଗିପାରିବେ ତେବେ ସେ ହେଉଛନ୍ତି ରୋହିତ୍ ଓ ଓ୍ବାର୍ନର। ରୋହିତ୍ ଯଦି ଦେଢ଼ଦିନ ରହିଯାଆନ୍ତି ଏବଂ ନିଜସ୍ବ ଶୈଳୀରେ ବ୍ୟାଟିଂ କରନ୍ତି ତେବେ ସେ ଏହି ରେକର୍ଡକୁ ଭାଙ୍ଗି ପାରିବେ। ଏଠାରେ ଉଲ୍ଲେଖଯୋଗ୍ୟ, ଟେଷ୍ଟ କ୍ରିକେଟ୍ରେ ୨୧୨ ରନ ରୋହିତ୍ଙ୍କ ବ୍ୟକ୍ତିଗତ ସର୍ବାଧିକ ସ୍କୋର। ସେହିଭଳି ଓ୍ବାର୍ନର ଗତବର୍ଷ ପାକିସ୍ତାନ ବିପକ୍ଷରେ ଅପରାଜିତ ୩୩୫ ରନ କରିଥିଲେ। ଯାହା ତାଙ୍କର ସର୍ବୋଚ୍ଚ ସ୍କୋର।