ବ୍ରହ୍ମପୁର ଅଫିସ,୧୦।୪: ଗଜପତି ଜିଲା ମୋହନା ଅଞ୍ଚଳରୁ ବ୍ରହ୍ମପୁର ଦେଇ ଗଞ୍ଜେଇ ଚାଲାଣ କରୁଥିବା ଏକ ର଼୍ୟାକେଟ୍କୁ ଅବକାରୀ ଟିମ୍ ଧରିବାରେ ସଫଳ ହୋଇଛି। ଗଞ୍ଜେଇ ଚାଲାଣ ହେଉଥିବା ନେଇ ଅବକାରୀ ଗୋଇନ୍ଦା ବିଭାଗକୁ ଖବର ମିଳିଥିଲା। ଏନେଇ ଅବକାରୀ ଡେପୁଟି ସୁପରିଣ୍ଟେଣ୍ଡେଣ୍ଟ କୁବେର ସେଠୀଙ୍କ ନେତୃତ୍ୱରେ ଦୁଇଟି ଟିମ୍ ଗଠନ ହୋଇଥିଲା। ସହରର ବିଭିନ୍ନ ସ୍ଥାନରେ ଚଢ଼ାଉକରାଯାଇ ୧୦୫ କେଜି ଗଞ୍ଜେଇ, ଗୋଟିଏ କାର, ଗୋଟିଏ ସ୍କୁଟି ସହ ଘଟଣାରେ ସମ୍ପୃକ୍ତ ୭ ଜଣଙ୍କୁ ଗିରଫ କରାଯାଇଛି। ୭ଟି ମାମଲାରେ ସମସ୍ତ ଅଭିଯୁକ୍ତଙ୍କୁ ସୋମବାର କୋର୍ଟ ଚାଲାଣ କରାଯାଇଛି ବୋଲି ଡେପୁଟି ସୁପରିଣ୍ଟେଣ୍ଡେଣ୍ଟ ସେଠୀ ସୂଚନା ଦେଇଛନ୍ତି। ଜବତ ଗଞ୍ଜେଇ ଓ ଗାଡ଼ିର ମୂଲ୍ୟ ୨୧ଲକ୍ଷ ୫୦ହଜାର ଟଙ୍କା ହେବ ବୋଲି ସେ କହିଛନ୍ତି।
ଘଟଣାରୁ ପ୍ରକାଶ ଯେ, ଅବକାରୀ ଟିମ୍ ନୂଆ ବସ୍ଷ୍ଟାଣ୍ଡ ନିକଟରେ ରବିବାର ଏକ କାର ନମ୍ବର (ଓଡି୦୫ୟୁ-୨୩୧୫) କୁ ଅଟକାଇ ଯାଞ୍ଚ କରିଥିଲା। ଯାଞ୍ଚ ବେଳେ କାର ଭିତରୁ ୭୫ କେଜି ଗଞ୍ଜେଇ ମିଳିଥିଲା। ଏନେଇ ଅବକାରୀ ଟିମ୍ ପୋଡ଼ାମାରି ଗ୍ରାମର ଦୀପକ ନାୟକ(୧୮)ଙ୍କୁ କାବୁକରି ନେଇଥିଲା। ଏନେଇ ଏକ ମାମଲା(୯/୨୩-୨୪) ରୁଜୁ ହୋଇଥିଲା। ପରେ ଦୀପକଙ୍କ ବୟାନକୁ ଆଧାରକରି ଅବକାରୀ ଟିମ୍ ବିହାର ଅଞ୍ଚଳର ଭଗବାନ ରାମ(୬୦)ଙ୍କୁ ଧରିବା ସହ ତାଙ୍କ ନିକଟରୁ ୫ କେଜି ଗଞ୍ଜେଇ ଜବତ କରିଥିଲ।
ସେହିପରି ବିହାରର ଦୁର୍ଗେଶ କୁମାର ପାଣ୍ଡେ(୧୯)ଙ୍କଠାରୁ ୫ କେଜି ଏବଂ ମନୁ ଦୁବେ(୩୨)ଙ୍କ ନିକଟରୁ ୫ କେଜି ଗଞ୍ଜେଇ ଜବତ ହୋଇଥିବା ବେଳେ ବ୍ରହ୍ମାନନ୍ଦ ରାଜବରଙ୍କଠାରୁ ୫ କେଜି ଗଞ୍ଜେଇ, ରୋହିତ କୁମାରଙ୍କଠାରୁ ୫କେଜି ଗଞ୍ଜେଇ ଓ ନୟାଗଡ଼ ଜିଲା ଦଶପଲ୍ଲାର ଅଲେଖ ବେହେରାଙ୍କ ସ୍କୁଟିରୁ ୫ କେଜି ଗଞ୍ଜେଇ ଜବତ କରାଯାଇଥିଲା। ଅଭିଯୁକ୍ତଙ୍କୁ ଜେରା ବେଳେ ସେମାନେ ଉକ୍ତ ଗଞ୍ଜେଇ ମୋହନାରୁ ବ୍ରହ୍ମପୁର ଦେଇ ବିହାର ଚାଲାଣ କରିଥାନ୍ତେ ବୋଲି ଜଣାପଡ଼ିଛି। ଏନେଇ ଅବକାରୀ ବିଭାଗ ପକ୍ଷରୁ ଘଟଣାର ତଦନ୍ତ ଜାରି ରହିଛି। ଚଢ଼ାଉରେ ଅବକାରୀ ଇନ୍ସପେକ୍ଟର ହୃଦୟ ଚନ୍ଦ୍ର ସାମନ୍ତ, ଏସ୍ଆଇ ଅଜିତ କୁମାର ନାୟକ, ଡ. ଅଶୋକ କୁମାର ସାହୁ, ଏଏସ୍ଆଇ ଅନ୍ତର୍ଯ୍ୟାମୀ ସାହୁ, କନଷ୍ଟେବଲ କପିଳାସ ଭତ୍ରା, ବଳରାମ ଜେନା, କୁମୁଦ ପ୍ରଧାନ ଓ ସନ୍ତୋଷ କୁମାର ନାୟକ, ସରୋଜ ସ୍ବାଇଁ, ଶୁଭମ୍ ସ୍ବାଇଁ ପ୍ରମୁଖ ସାମିଲ ଥିଲେ।