ରାଉରକେଲା,୮।୩(ବିପ୍ଳବ ରଞ୍ଜନ ଦାଶ): ରାଉରକେଲା ସହରରେ ଜନସଂଖ୍ୟା ସହ ଯାନବାହନ ସଂଖ୍ୟା ମଧ୍ୟ ବୃଦ୍ଧି ପାଉଛି। ୨୦୧୨ ପୂର୍ବରୁ ଏବଂ ୨୦୧୨ ମସିହା ପରବର୍ତ୍ତୀ ସମୟରେ ସହରରେ ଓଆର ଏବଂ ଓଡି ସିରିଜରେ ମୋଟ ୩.୧୮ଲକ୍ଷ ଯାନାବାହନ ପଞ୍ଜୀକୃତ ହୋଇଛି। ସେହିପରି ଯାନବାହନ ଜନିତ ଆପରାଧିକ ମାମଲା ମଧ୍ୟ ବୃଦ୍ଧି ପାଇଛି। ତେବେ ଏହି ମାମଲାଗୁଡିକର ବିଚାରରେ ଅହେତୁକ ବିଳମ୍ବ ଏବଂ ଭିତ୍ତିଭୂମି ଅଭାବ ଯୋଗୁ ଜବତ ହେଉଥିବା ଶହ ଶହ ଦୁଇ ଓ ଚାରିଚକିଆ ଯାନବାହନ ଥାନା ଏବଂ ଅବକାରୀ ଅଫିସ୍ ପରିସରରେ ପଡିରହି ଖତ ଖାଉଛି।
ସୂଚନା ଅନୁସାରେ, ଭାରତୀୟ ଯାନବାହନ ସାକ୍ଷ୍ୟ ପ୍ରମାଣ ଅଧିନିୟମ-୧୯୭୨ ମୁତାବକ କୌଣସି ଅଭିଯୁକ୍ତ ଗିରଫ ହେଲେ ତାଙ୍କ ବ୍ୟବହୃତ ଗାଡିକୁ ସାକ୍ଷ୍ୟ ପ୍ରମାଣ ଆଧାରରେ ଜବତ କରାଯିବ। ଯାନବାହନ ମଧ୍ୟରେ ମୁହାଁମୁହିଁ ଧକ୍କା ହେଲେ ଗାଡି ଜବତ କରିବା, ବେଆଇନ ନିଶା କାରବାରରେ ବ୍ୟବହୃତ ଯାନବାହନ ଜବତ କରାଯିବା ଅଧିନିୟମରେ ରହିଛି।
ମାତ୍ର ଏହି ମାମଲାର ବିଚାର ଓ ସମାଧାନରେ ହେଉଥିବା ବିଳମ୍ବ ଯୋଗୁ ରାଜ୍ୟ ସରକାରଙ୍କ କୋଟି କୋଟି ଟଙ୍କା ରାଜସ୍ବ ହାନି ହେଉଛି। ଗୋଟିଏ ପଟେ ଜାମିନ ମଞ୍ଜୁର ପରେ ଗାଡ଼ି ମାଲିକଙ୍କୁ ଛାଡି ଦିଆଯାଉଛି । ମାତ୍ର ବିଚାର ବିଳମ୍ବରୁ ଗାଡ଼ି ରିଲିଜ ହୋଇପାରୁନାହିଁ କି ନିଲାମ ମଧ୍ୟ କରାଯାଉନାହିଁ।
ଭାରତରେ ଯାନବାହାନ ବ୍ୟବହାର ଅବଧି ସୀମା ୧୫ବର୍ଷ ରହିଛି। ଏହାବ୍ୟତୀତ ପୁନଃ ରାଜସ୍ବ ଭରଣା କଲେ ଏହାର ଅବଧି ୫ବର୍ଷ ବୃଦ୍ଧି ହୋଇପାରିବ। ତେବେ ଅବଧି ମଧ୍ୟରେ ଜବତ ଯାନବାହନ ନ ମୁକୁଳାଇଲେ ସେଗୁଡିକ ନିଲାମ ହେବା ମଧ୍ୟ ନିୟମ ରହିଛି। ମାତ୍ର ବର୍ଷ ବର୍ଷ ଧରି ପୋଲିସ ଏବଂ ଅବକାରୀ ଥାନାରେ ପଡିଥିବା ଶତାଧିକ ଗାଡ଼ି ମୁକୁଳା ଯାଉନାହିଁ କି ନିଲାମ ହେଉନାହିଁ। ଏ ନେଇ ରାଉରକେଲା ଏସ୍ପି ମିତ୍ରଭାନୁ ମହାପାତ୍ରଙ୍କୁ ପଚାରିବାରୁ ସେ କହିଲେ, ଆଇନ ଅନୁସାରେ ଜବତ ଯାନବାହନ ମାମଲା ଥାନାରୁ କୋର୍ଟକୁ ହସ୍ତାନ୍ତର ହେଉଛି। ଆଗକୁ କିଭଳି ଅଧିକରୁ ଅଧିକ ଯାନବାହନ ରିଲିଜ ହେବ ତାହା ଉପରେ ବିହିତ ପଦକ୍ଷେପ ନିଆଯିବ ବୋଲି ସେ କହିଥିଲେ।
ରାଉରକେଲା ଅବକାରୀ ଅଧିକାରୀ ମୋହନ ପ୍ରଧାନଙ୍କୁ ପଚାରିବାରୁ ସେ କହିଲେ, ଅବକାରୀ ବିଭାଗ ଦ୍ୱାରା ଜବତ ଯାନବାହନ ବହୁ ବର୍ଷରୁ ପଡିରହିଛି। ତେବେ ଜବତ ଯାନଗୁଡିକୁ ସଂରକ୍ଷିତ ରଖିବା ପାଇଁ ଭିତ୍ତିଭୂମି ଅଭାବ ରହିଥିବା ସେ କହିଥିଲେ। ଜବତ ଗାଡ଼ିଗୁଡିକୁ ସୁରକ୍ଷିତ ରଖିବା ପାଇଁ ବିଭାଗ ପକ୍ଷରୁ ପଦକ୍ଷେପ ନେବା ଆବଶ୍ୟକ ବୋଲି ବରିଷ୍ଠ ଆଇନଜୀବୀ ଗିରିଶ ମହାପାତ୍ର ମତ ଦେଇଛନ୍ତି।