ସିମୁଳିଆ, ୧।୮(ଡି.ଏନ.ଏ.): ବାଲେଶ୍ୱର ଜିଲା ସିମୁଳିଆ ବ୍ଲକ ମୁରୁଣା ପଞ୍ଚାୟତ କାର୍ଯ୍ୟାଳୟ ପରିସରରେ ୧୦୦ବସ୍ତା ଗ୍ରୋମର ସାର ଜବତକୁ କେନ୍ଦ୍ର କରି ସୋମବାର ପଞ୍ଚାୟତର ବିଭିନ୍ନ ଅଞ୍ଚଳରୁ ୩୦ରୁ ଊର୍ଦ୍ଧ୍ୱ ମହିଳା ସିମୁଳିଆ କୃଷି ବିଭାଗ ଫାଟକ ସମ୍ମୁଖରେ ଧାରଣା ଦେବା ସହିତ ଚାଷ କାମ ପାଇଁ ୧୦୦ବସ୍ତା ଗ୍ରୋମର ସାର ଯୋଗାଇ ଦେବାକୁ ଦାବି କରିଛନ୍ତି। ସନ୍ଧ୍ୟା ପର୍ଯ୍ୟନ୍ତ ସାର ସମସ୍ୟାର ସମାଧାନ ହୋଇପାରିନାହିଁ। ସାର ନ ମିଳିବା ପର୍ଯ୍ୟନ୍ତ ଏହି ଧାରଣା ଚାଲୁ ରହିବ ବୋଲି ମହିଳାମାନେ ସୂଚନା ଦେଇଛନ୍ତି। ଅପରପକ୍ଷେ କୃଷି ଉଚ୍ଚ କର୍ତ୍ତୃପକ୍ଷ ଓ ଜିଲାପାଳ ଏହାର ତଦନ୍ତର ଦାୟିତ୍ୱ ନେଇଥିବାରୁ ତଳସ୍ତରରେ କୌଣସି ସିଦ୍ଧାନ୍ତ ନିଆଯାଇପାରିବ ନାହିଁ ବୋଲି କୃଷି ଅଧିକାରୀ ବିଶ୍ୱଜିତ ପଣ୍ଡା ସୂଚନା ଦେଇଛନ୍ତି।
ପ୍ରକାଶ ଯେ, ଗତ ୨୨ା୭ା୨୨ରାତିରେ ମୁରୁଣା ପଞ୍ଚାୟତ କାର୍ଯ୍ୟାଳୟ ପରିସରରେ ଶହେ ବସ୍ତା ଗ୍ରୋମର ସାର ରଖାଯିବା ନେଇ ଚର୍ଚ୍ଚା ଜୋର ଧରିଥିଲା। ପଞ୍ଚାୟତର ଏକ ପୁରୁଣା କୋଠରିକୁ ଗତ ବର୍ଷରୁ ସ୍ଥାନୀୟ ରାଉତପଡା ଅଞ୍ଚଳର ଶଶିକାନ୍ତ ମଲିକ ମାସିକ ୨ଶହ ଟଙ୍କାରେ ଆସନ୍ତା ୫ବର୍ଷ ପାଇଁ ଭଡାରେ ନେଇ ସାରବସ୍ତାଗୁଡିକୁ ରଖାଯାଇଥିଲା। ଗତ ରବିବାର ଏ ସମ୍ପର୍କରେ ଅଭିଯୋଗ ହେବା ପରେ ରାତିରେ ପୋଲିସ, ଅତିରିକ୍ତ ତହସିଲଦାର ଭୀମକାନ୍ତ ମାଝି ଓ କୃଷି ଅଧିକାରୀ ସ୍ଥିତପ୍ରଜ୍ଞ ଖମାରୀ ପହଞ୍ଚତ୍ ଶଶିକାନ୍ତଙ୍କୁ ଡକାଇଥିଲେ। ତେବେ ଶଶିକାନ୍ତ ନ ଆସିବାରୁ ତାଲା ଭଙ୍ଗାଯାଇଥିଲା।