ଠାକୁରମୁଣ୍ଡା,୩୦।୮(ଡି.ଏନ୍.ଏ.): ମୟୂରଭଞ୍ଜ ଜିଲା କରଞ୍ଜିଆ ବନଖଣ୍ଡ ସାତକୋଶିଆ ରେଞ୍ଜ ଅଞ୍ଚଳରୁ ବନ କର୍ମଚାରୀ ସୋମବାର ରାତିରେ ଚୋରା କାଠ ବୋଝେଇ ଏକ ପିକ୍ଅପ୍ ଭ୍ୟାନ୍ ଜବତ କରିଛନ୍ତି। ସେଥିରେ ଲକ୍ଷାଧିକ ଟଙ୍କା ମୂଲ୍ୟର ଶାଳ କାଠଥିବା ଜଣାପଡ଼ିଛି। ଘଟଣାରେ ସମ୍ପୃକ୍ତ ଜଣେ ବ୍ୟକ୍ତିଙ୍କୁ ବନ ବିଭାଗ ଗିରଫ କରିଥିବା ସୂଚନା ମିଳିଛି।
ପ୍ରକାଶ ଯେ, ଚୋରା କାଠ ଚାଲାଣ ହେଉଥିବା କୌଣସି ସୂତ୍ରରୁ ଖବର ପାଇ ସାତକୋଶିଆ ରେଞ୍ଜ ଅଧିକାରୀ ରବୀନ୍ଦ୍ର ମହାନ୍ତଙ୍କ ନେତୃତ୍ୱରେ ଫରେଷ୍ଟର ଗିରିଜା ନନ୍ଦନ ଦଳେଇ, ଗାର୍ଡ ସନତ ମହାନ୍ତଙ୍କ ସମେତ ଟାଇଗର ପ୍ରୋଟେକ୍ସନ ଫୋର୍ସ କର୍ମକର୍ତ୍ତାମାନେ ସାତକୋଶିଆ- ନଦା ପ୍ରଧାନମନ୍ତ୍ରୀ ଗ୍ରାମ ସଡ଼କ ରାସ୍ତାରେ ଜଗି ରହିଥିଲେ। ପରେ କାଠ ବୋଝେଇ କରି ନଦା ଆଡ଼କୁ ଯାଉଥିବା ପିକଅପ ଭ୍ୟାନକୁ ବାଉଁଶନାଳ ନିକଟରେ ବନ କର୍ମଚାରୀ ଧରିଥିଲେ। ଗାଡ଼ିରେ ଥିବା ଅନ୍ୟମାନେ ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ ଡ୍ରାଇଭରଙ୍କୁ କାବୁ କରାଯାଇଥିଲା। ଡ୍ରାଇଭର ଜଣକ ହେଉଛନ୍ତି ଅନନ୍ତ ପାଲ (୫୯)। ତାଙ୍କ ଘର ରାମଚନ୍ଦ୍ରପୁର ଥାନା ଅନ୍ତର୍ଗତ ଓତା ଅଞ୍ଚଳରେ ବୋଲି ଜଣାପଡିଛି। କାଠ ବୋଝେଇ କରି ନେଉଥିବା ପିକ୍ଅପ୍ ଭ୍ୟାନ ଜବତ ହୋଇଥିବା ବେଳେ ସେଥିରୁ ୫୦,୩୫୫ ସିଏଫ୍ଟିର ୯୦ ଖଣ୍ଡ ଶାଳ ଚୌକାଠ ଜବତ ହୋଇଛି, ଯାହାର ଆନୁମାନିକ ମୂଲ୍ୟ ୧ ଲକ୍ଷ ଟଙ୍କାରୁ ଊର୍ଦ୍ଧ୍ୱ ହେବ ବୋଲି ଜଣାପଡ଼ିଛି।
