ଦାରିଙ୍ଗବାଡି,୮।୬(ଡି.ଏନ୍.ଏ): କନ୍ଧମାଳ ଜିଲା ଦାରିଙ୍ଗବାଡି ସାଞ୍ଜାସରୁ ଉନ୍ନୟନ ଟ୍ରଷ୍ଟର ବୈଠକ ଗୁରୁବାର ଦାରିଙ୍ଗବାଡ଼ି ବିଡ଼ିଓଙ୍କ କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଛି। ବାଲିଗୁଡ଼ା ଉପଜିଲାପାଳ ତଥା ଟ୍ରଷ୍ଟ ଅଧ୍ୟକ୍ଷ ଏମ୍ଏସ୍ ମଧୁମିତାଙ୍କ ଅଧ୍ୟକ୍ଷତାରେ ଏହି ବୈଠକ ହୋଇଥିଲା। ବୈଠକରେ ହିଲଭିୟୁ ପାର୍କର ରକ୍ଷଣାବେକ୍ଷଣ ଦାୟିତ୍ୱରେ ଥିବା ଠିକା ସଂସ୍ଥାର ମାଲିକ ରୂପକ କୁମାର ସରକାରଙ୍କ ବିୟୋଗ ପରେ ପାର୍କର ତଦାରଖ ପାଇଁ ନୂତନ ଦାୟିତ୍ୱ ଦେବାକୁ ବୈଠକରେ ଆଲୋଚନା ହୋଇଥିଲା।
ଅଧ୍ୟକ୍ଷ ମଧୁମିତା ବ୍ଲକ ପ୍ରଶାସନ ପକ୍ଷରୁ ଜଣେ ଅଧିକାରୀଙ୍କୁ ଦାୟିତ୍ୱ ଦେବାକୁ ନିର୍ଦ୍ଦେଶ ଦେଇଛନ୍ତି। ଏଥିସହ ମହିଳା ସ୍ବୟଂ ସହାୟକ ଗୋଷ୍ଠୀ ପାର୍କର ତଦାରଖ କରିବେ ଏବଂ ବ୍ଲକର ଜଣେ ଅଧିକାରୀ ଏହାର ଦାୟିତ୍ୱରେ ରହିବେ ବୋଲି ଉପଜିଲ୍ଲାପାଳ ମଧୁମିତା କହିଛନ୍ତି। ସେହିପରି ପାର୍କରେ ରୂପାନ୍ତରିକରଣ କାର୍ଯ୍ୟ ଚାଲିଥିବା ବେଳେ ତାହା କିଛି ଦିନ ହେଲା ଅଟକି ରହିଛି। ଏପରି କି ନୂତନ ୱାଚ୍ ଟାୱାର ନିର୍ମାଣ କାର୍ଯ୍ୟ ଅଧପାନ୍ତରିଆ ହୋଇ ରହିଥିବା ବେଳେ ଶିଶୁ ପର୍ଯ୍ୟଟକଙ୍କ ଟୟ ଟ୍ରେନ୍ ଦୀର୍ଘ ଦିନ ହେଲା ଅଚଳବସ୍ଥା ହୋଇ ରହିଛି। ସେହିପରି ଜଳ ଫୁୱାରାରେ ରଙ୍ଗବେରଙ୍ଗର ଆଲୁଅ ବ୍ୟବସ୍ଥା ସହ ସାଉଣ୍ଡସିଷ୍ଟମ, ସେଲ୍ଫି ପଏଣ୍ଟ ଆଦି କରିବାକୁ ବୈଠକରେ ନିଷ୍ପତ୍ତି ହୋଇଛି। ଏପରିକି ପାର୍କ ଭିତରେ ଅଧିକରୁ ଅଧିକ ଫୁଲ ଗଛ ଲଗାଯିବାକୁ କୁହାଯାଇଥିଲା। ବୈଠକରେ ବିଧାୟକ ସାଲୁଗା ପ୍ରଧାନ, ବ୍ଲକ ଅଧ୍ୟକ୍ଷ ସୁଶାନ୍ତ କୁମାର ପ୍ରଧାନ, ବିଡିଓ ଗଦାଧର ପାତ୍ର, ତହସିଲଦାର ଡ. ଅଶୋକ କୁମାର ଦାସ, ସତୀଶ କୁମାର ଧାରୁଆ, ଆଇଆଇସି କୌଶିକ ମାଝୀ, ଜାଗୃତି ସମ୍ପାଦକ କୈଳାସ ଚନ୍ଦ୍ର ଦଣ୍ଡପାଠ, ବଣିକ ସଙ୍ଘ ସଭାପତି ଲଡୁ କିଶୋର ସାହୁ, ପତିତପାବନ ରାଉତ, ରମେଶ ଚନ୍ଦ୍ର ସାହୁ, ସରପଞ୍ଚ ଚନ୍ଦ୍ରିକା ମଲ୍ଲିକ, ସୁଷମା ସିଂ ପ୍ରମୁଖ ଯୋଗ ଦେଇଥିଲେ। ବୈଠକ ପରେ ଉପଜିଲାପାଳ ପାର୍କ ଯାଇ ବୁଲି ଦେଖିଥିଲେ।