ବ୍ରହ୍ମପୁର ଅଫିସ,୩।୭: ବ୍ରହ୍ମପୁର ସହରରେ ଏବେ ଜମି ଦୁର୍ନୀତି ବଢ଼ିବାରେ ଲାଗିଛି। ଏହି ଧାରାରେ ଜନୈକା ବୃଦ୍ଧାଙ୍କ ନାମରେ ଥିବା ଏକ ଜମିକୁ ଜାଲ୍ ଦସ୍ତଖତ କରି ଅନ୍ୟଜଣଙ୍କୁ ବିକ୍ରି ହୋଇଥିବା ଅଭିଯୋଗ ହୋଇଛି। ଏ ନେଇ ବୃଦ୍ଧା ଜଣଙ୍କ ସଦର ଥାନାରେ ଅଭିଯୋଗ କରିବା ପରେ ପୋଲିସ ନଂ.୨୮୫/୨୨ ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
ପ୍ରକାଶ ଯେ, ନିମଖଣ୍ଡି ଗ୍ରାମର ପୁନିଆ ସାହୁ ଓ ଜଗନ୍ନାଥ ସାହୁଙ୍କ ନାମରେ କୁକୁଡ଼ାଖଣ୍ଡି ତହସିଲ ଅଧିନ ନିମଖଣ୍ଡି ମୌଜାରେ ୦.୪୨୫ ଡ଼ିସିମିଲର ଏକ ଜମି ରହିଛି। କିନ୍ତୁ କିଛି ବର୍ଷ ପୂର୍ବେ ଜଗନ୍ନାଥ ଓ ତାଙ୍କ ପୁଅ ରିଷିକେଶ ପୁନିଆଙ୍କ ଜାଲ୍ ଦସ୍ତଖତ କରି ଶୈଳେନ୍ଦ୍ର କୁମାର ସାହୁଙ୍କୁ ବିକ୍ରି କରିଥିବା ଅଭିଯୋଗ ହୋଇଛି। ରିଷିକେଶ ବିକ୍ରୀ ଦଲିଲରେ ତାଙ୍କ ନିଜର ଫଟୋ ଲଗାଇଥିବା ବେଳେ ପୁନିଆଙ୍କ ନାମରେ ଜାଲ୍ ଦସ୍ତଖତ କରି ଉଭୟ ବାପ ପୁଅ ତାଙ୍କ ଅଜାଣତରେ ଉକ୍ତ ଜମି ବିକ୍ରି କରିଥିବା ଅଭିଯୋଗ ହୋଇଛି। କିଛି ଦିନ ହେବ ପୁନିଆଙ୍କ ଶରୀର ଅସୁସ୍ଥ ରହିବାରୁ ଅଧିକ ଚିକିତ୍ସା ନିମନ୍ତେ ବାହାରକୁ ଯିବାକୁ ଉକ୍ତ ଜମି ବିକ୍ରି କରିବାକୁ ସେ ଭାବିଥିଲେ। ପୁନିଆ ଜମି ନକଲ ଦଲିଲ ବାହାର କରିବା ସମୟରେ ତାଙ୍କ ନାମରେ ଥିବା ଜମି ଅନ୍ୟ ଜଣଙ୍କୁ ବିକ୍ରି ହୋଇ ସାରିଥିବା ଜାଣିବାକୁ ପାଇଥିଲେ। ପରେ ସେ ଏନେଇ ସଦର ଥାନାରେ ଅଭିଯୋଗ କରିଛନ୍ତି।