ଭୁବନେଶ୍ୱର,(ବ୍ୟୁରୋ)/ବୌଦ୍ଧ,୨୦ା୩(ସ୍ବ.ପ୍ର.):ଫାଷ୍ଟଫୁଡ୍ ଦୋକାନ ଆଳରେ ଚଳାଇଥିଲେ ବନ୍ୟପ୍ରାଣୀଙ୍କ ଚମଡ଼ା ବିକ୍ରି କାରବାର। ଖବର ପାଇ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍)ରବିବାର ରାତିରେ ବୌଦ୍ଧ ଜିଲା ହରଭଙ୍ଗା ଥାନା ଅଞ୍ଚଳରେ ଚଢାଉ କରି ଜଣଙ୍କୁ ଗିରଫ କରିଛି। ସେ ହେଲେ ଉକ୍ତ ଅଞ୍ଚଳର ଗିରିଶ୍ କୁମାର ସାହୁ। ତାଙ୍କଠାରୁ ଏସ୍ଟିଏଫ୍ ଗୋଟିଏ କଲରାପତରିଆ ବାଘ ଛାଲ ଓ ଦୁଇଟି ହରିଣ ଛାଲ ଜବତ କରିଛି। ଏନେଇ ଏକ ମାମଲା (ନଂ.୫/୨୩ ) ରୁଜୁ ସହ ସୋମବାର ଗିରିଶ୍ଙ୍କୁ ସ୍ଥାନୀୟ କୋର୍ଟରେ ହାଜର କରାଯାଇଛି। ଜବତ ଛାଲ ୫ ଲକ୍ଷ ଟଙ୍କାରେ ବିକ୍ରି ପାଇଁ ଡିଲ୍ ହୋଇଥିବା ତଦନ୍ତ ବେଳେ ଜଣାପଡ଼ିଛି। ଜବତ ଛାଲକୁ ପରୀକ୍ଷା ପାଇଁ ଡେରାଡୁନ୍ସ୍ଥିତ ୱାଇଲ୍ଡ ଲାଇଫ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆକୁ ପଠାଯିବ। କାରବାରରେ ସମ୍ପୃକ୍ତ ଅନ୍ୟମାନଙ୍କୁ ଗିରଫ ପାଇଁ ଉଦ୍ୟମ ଆରମ୍ଭ ହୋଇଥିବା ଏସ୍ଟିଏଫ୍ ପକ୍ଷରୁ କୁହାଯାଇଛି। ଏହି ଚଢ଼ାଉରେ ସ୍ଥାନୀୟ ବନ ବିଭାଗର କର୍ମଚାରୀ ସହଯୋଗ କରିଥିଲେ।
ସୂଚନା ମୁତାବକ, ଛତରଙ୍ଗ-ହରଭଙ୍ଗା ରାସ୍ତାରେ ଅଭିଯୁକ୍ତଙ୍କର ଏକ ଫାଷ୍ଟଫୁଡ୍ ଦୋକାନ ରହିଛି। ସେଠାରେ ସେ ବନ୍ୟପ୍ରାଣୀଙ୍କ ଚମଡ଼ା ବିକ୍ରି କରୁଥିବା ନେଇ ବିଶେଷ ସୂତ୍ରରୁ ଖବର ପାଇ ଏସ୍ଟିଏଫ୍ ଟିମ୍ ଶନିବାର ସେଠାରେ ପହଞ୍ଚତ୍ଥିଲା। ଦିନରେ ଦୋକାନ ବନ୍ଦ ଥିବାରୁ ରାତିରେ ଚଢାଉ କରାଯାଇଥିଲା। ଅପରପକ୍ଷରେ ୨୦୨୧ରେ ଏସ୍ଟିଏଫ କର୍ମଚାରୀ ମନମୁଣ୍ଡା ଓ ବାଉଁଶୁଣୀ ଅଞ୍ଚଳରୁ ଗୋଟିଏ ଲେଖାଏ ବାଘଛାଲ ଜବତ କରିଥିବା ବେଳେ ଚଳିତବର୍ଷ ଜାନୁୟାରୀ ୪ରେ ବୌଦ୍ଧ ସହରର ସାଲୁଙ୍କୀ ନଦୀ ପୋଲ ନିକଟରେ ଚଢାଉ କରି ଗୋଟିଏ ମହାବଳ ବାଘ ଓ ଗୋଟିଏ କଲରାପତରିଆ ଛାଲ ଜବତ କରିଥିଲା।