ଭୁବନେଶ୍ୱର,୧୧।୨(ଅନୁରାଧା ମହାରଣା): ସେମିକଣ୍ଡକ୍ଟର ଉତ୍ପାଦନ କ୍ଷେତ୍ରରେ ଭାରତ ବଡ଼ ସଫଳତା ପାଇବାକୁ ଯାଉଛି। ଇସ୍ରାଏଲର ପ୍ରସିଦ୍ଧ ସେମିକଣ୍ଡକ୍ଟର ଉତ୍ପାଦନକାରୀ କମ୍ପାନୀ ‘ଟାୱାର’ ୮ ବିଲିୟନ ଡଲାର ବିନିଯୋଗରେ ଦେଶରେ ଏକ ପ୍ଲାଣ୍ଟ ସ୍ଥାପନ କରିବାକୁ ପ୍ରସ୍ତାବ ଦେଇଛି। ଏହି ପ୍ରସ୍ତାବ ଅନୁଯାୟୀ ଟାୱାର ଭାରତରେ ୬୫ ନାନୋମିଟର ଏବଂ ୪୦ ନାନୋମିଟର ଚିପ୍ସ ତିଆରି କରିବ।
ଆଇଟି ମନ୍ତ୍ରୀ ରାଜୀବ ଚନ୍ଦ୍ରଶେଖର ଗତ ବର୍ଷ ଅକ୍ଟୋବରରେ ଟାୱାର ସେମିକଣ୍ଡକ୍ଟରର ସିଇଓ ରସେଲ ସି ଏଲୱାନଗରଙ୍କୁ ଭେଟିଥିଲେ। ଏହି ସଭାରେ ଇସ୍ରାଏଲର ରାଷ୍ଟ୍ରଦୂତ ନାଓର ଗିଲାନ ମଧ୍ୟ ସାମିଲ ହୋଇଥିଲେ। ବୈଠକ ପରେ ରାଜୀବ ଚନ୍ଦ୍ରଶେଖର କହିଛନ୍ତି ଯେ ଭାରତ ଏବଂ ଟାୱାର ମଧ୍ୟରେ ସେମିକଣ୍ଡକ୍ଟର ସହଭାଗିତା ସମ୍ପର୍କରେ ଆଲୋଚନା ହୋଇଛି। ଏହା ପୂର୍ବରୁ ୨୦୨୨ ମସିହାରେ ଅନ୍ତର୍ଜାତୀୟ ସେମିକଣ୍ଡକ୍ଟର କନ୍ସୋର୍ଟିୟମ ଭାରତର ସେମିକଣ୍ଡକ୍ଟର ଯୋଜନାର ଏକ ଅଂଶ ହେବାକୁ ଆବେଦନ କରିଥିଲା। ଟାୱାର ମଧ୍ୟ ଏହି ଆଇଏସସିର ଏକ ଅଂଶ। ସେହି ସମୟରେ ଇଣ୍ଟେଲ ଟାୱାର ସେମିକଣ୍ଡକ୍ଟର କିଣିବାକୁ ଚେଷ୍ଟା କରିଥିଲା। ଏହି କାରଣରୁ ଭାରତ ସରକାର ଏହି ଆବେଦନକୁ ଗ୍ରହଣ କରିନଥିଲେ।
ତେବେ ଇଣ୍ଟେଲ ଅଧିଗ୍ରହଣ ପରେ ଟାୱାର ସେମିକଣ୍ଡକ୍ଟରକୁ ଆଇଏସସିର ଏକ ଅଂଶ ରହିବାକୁ ଅନୁମତି ଦେବ କି ନାହିଁ ସରକାର ନିଶ୍ଚିତ ନୁହନ୍ତି। ଟାୱାର ସେମିକଣ୍ଡକ୍ଟର ଉଚ୍ଚ ମୂଲ୍ୟର ଆନାଗଲ ସେମିକଣ୍ଡକ୍ଟର ସମାଧାନ ପ୍ରଦାନ କରେ। ଏହା ଅଟୋମୋବାଇଲ, ଡାକ୍ତରୀ, ଶିଳ୍ପ, ଉପଭୋକ୍ତା, ଏରୋସ୍ପେସ ଏବଂ ପ୍ରତିରକ୍ଷା ପରି କ୍ଷେତ୍ରରେ ଚିପ୍ସ ଯୋଗାଏ। କମ୍ପାନୀ ବିଶ୍ୱ ୩୦୦ରୁ ଅଧିକ ଗ୍ରାହକଙ୍କୁ ଆନାଲଗ ଇଣ୍ଟିଗ୍ରେଟେଡ ସର୍କିଟ ଉତ୍ପାଦନ ଏବଂ ଯୋଗାଇଥାଏ। କମ୍ପାନୀର ବାର୍ଷିକ ଆୟ ୧ ବିଲିୟନ ଡଲାରରୁ ଅଧିକ। ଗତ ବର୍ଷ ଜୁନରେ ଆମେରିକୀୟ ଚିପ ନିର୍ମାତା ମାଇକ୍ରୋନ ଟେକ୍ନୋଲୋଜି ଗୁଜରାଟରେ ୮୨୫ ନିୟୁତ ଡଲାର ବିନିଯୋଗରେ ଏକ ଆସେମ୍ବ୍ଲି ଏବଂ ଟେଷ୍ଟ ଫ୍ୟାସିଲିଟି ନିର୍ମାଣ କରିବାକୁ ଘୋଷଣା କରିଥିଲା। ଏହା ୨୦୨୪ ଶେଷ ସୁଦ୍ଧା ଆରମ୍ଭ ହେବ।