ଜୟପୁର,୫।୧୦: ରାଜସ୍ଥାନର ରାଜନୈତିକ ସଙ୍କଟ ଭିତରେ କଂଗ୍ରେସ ନେତା ସଚିନ ପାଇଲଟ ବିରୋଧୀ ଗୋଷ୍ଠୀଙ୍କୁ ମନେଇବାକୁ ପ୍ରୟାସ ଆରମ୍ଭ କରିଛନ୍ତି। ସେ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ଙ୍କ ଅନୁଗତ ଏବଂ ବିଧାୟକଙ୍କୁ ଭେଟିଛନ୍ତି। ଏହି ସାକ୍ଷାତ୍ ବେଳେ ଖାଦ୍ୟ ଏବଂ ଯୋଗାଣ ମନ୍ତ୍ରୀ ପ୍ରତାପ ସିଂହ ଉପସ୍ଥିତ ଥିବା ଜଣାପଡିଛି। ଦଳ ଭିତରେ ଥିବା ଅସନ୍ତୋଷ ଓ ମତଭେଦ ସମାଧାନ ପାଇଁ ସଚିନ ଉଦ୍ୟମ କରିଛନ୍ତି। ତେବେ ଖୁବ୍ଶୀଘ୍ର ବିଧାୟକ ଦଳ ବୈଠକ ବସି ସମସ୍ୟାର ସମାଧାନ ବାହାରିବ ବୋଲି ସେ ଆଶବାଦୀ ଅଛନ୍ତି।
ମୁଖ୍ୟମନ୍ତ୍ରୀ ପଦକୁ ନେଇ ପାଇଲଟ ଓ ଗେହଲଟ୍ଙ୍କ କ୍ୟାମ୍ପରେ ରାଜନୈତିକ ହଟଚମଟ ସୃଷ୍ଟି ହୋଇଥିଲା। ଏହା ପରବର୍ତ୍ତୀ ସମୟରେ ଦିଲ୍ଲୀରେ ପହଞ୍ଚି ଥିଲା। ଏହି ସମସ୍ୟା କଂଗ୍ରେସ ହାଇକମାଣ୍ଡଙ୍କ ପାଇଁ ଚ୍ୟାଲେଞ୍ଜ ସୃଷ୍ଟି କରିଥିଲା। ଗୋଟିଏ ପଟେ ଦଳର ନେତା ରାହୁଲ ଗାନ୍ଧୀ ଭାରତ ଯୋଡ଼ ଯାତ୍ରା ଜାରି ରଖିଥିବା ବେଳେ ରାଜସ୍ଥାନ କଂଗ୍ରେସର ଆଭ୍ୟନ୍ତରୀଣ କନ୍ଦଳ ତାଙ୍କୁ ଅଡୁଆ ପରିସ୍ଥିତରେ ପକାଇଛି। ଏପରି କି ଅଶୋକ ଗେହଲଟ୍ କଂଗ୍ରେସ ସଭାପତି ଦୌଡରୁ ଓହରି ଯାଇଥିଲେ। ଦଳୀୟ ଗୋଷ୍ଠୀ କନ୍ଦଳ ପାଇଁ ସେ ନିଜକୁ ଦାୟୀ କରି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ନିକଟରେ କ୍ଷମା ପ୍ରାର୍ଥନା ମଧ୍ୟ କରିଥିଲେ।
