କୋଲକାତା,୨୯।୭: ଗହଣା ରିଟେଲିଂ କ୍ଷେତ୍ରରେ ପ୍ରମୁଖ କମ୍ପାନୀ ସେନ୍କୋ ଗୋଲ୍ଡ ଆଣ୍ଡ ଡାଇମଣ୍ଡର ଅଧ୍ୟକ୍ଷ ଶଙ୍କର ସେନ୍ଙ୍କର କରୋନା ସଂକ୍ରମଣ ଯୋଗୁ ପରଲୋକ ଘଟିଛି। ତାଙ୍କୁ ୬୩ ବର୍ଷ ବୟସ ହୋଇଥିଲା। ନିକଟରେ ତାଙ୍କର ଏକ ଅପରେଶନ ହୋଇଥିବା ବେଳେ ସେ ଡାକ୍ତରଖାନାରେ ଚିକିତ୍ସିତ ହେଉଥିଲେ ବୋଲି ସୂଚନା ରହିଛି। ସେନ୍କୋ ଗୋଲ୍ଡକୁ ଜାତୀୟ ସ୍ତରରେ ଲୋକପ୍ରିୟ କରାଇବା ଦିଗରେ ତାଙ୍କର ଗୁରୁତ୍ୱପୂର୍ଣ୍ଣ ଯୋଗଦାନ ରହିଛି। ୧୯୯୦ରେ ତାଙ୍କ ପିତାଙ୍କଠାରୁ କାରବାର ସମ୍ଭାଳିବା ସହ ସେ ପ୍ରଥମେ ୩ଟି ଷ୍ଟୋରରୁ କାରବାର ଆରମ୍ଭ କରିଥିଲେ। ଏହି ଷ୍ଟୋର ସଂଖ୍ୟା ବର୍ତ୍ତମାନ ୧୦୦ ଟପିଛି। ତାଙ୍କ ବିୟୋଗରେ ଇଣ୍ଡିଆନ ଚାମ୍ବର୍ସ ଅଫ୍ କମର୍ସ ପକ୍ଷରୁ ଶୋକ ପ୍ରକାଶ କରାଯାଇଛି। ସେନ୍ ଜଣେ ଭବିଷ୍ୟଦ୍ରଷ୍ଟା ଥିବା ବେଳେ ଗ୍ରାହକଙ୍କ ଲାଗି ବିଭିନ୍ନ ପଦକ୍ଷେପ ସର୍ବଦା ନେଉଥିଲେ। ଭାରତୀୟ ରତ୍ନ ଏବଂ ଆଭୁଷଣ ପରିଷଦରେ ସେ ଜଣେ ପ୍ରତିଷ୍ଠାତା ସଦସ୍ୟ ରହିଥିଲେ। ପରିଷଦର ଅଧ୍ୟକ୍ଷ ଏନ୍.ଅନନ୍ତ ପଦ୍ମନାଭନ କହିଛନ୍ତି ଯେ, ସେନ୍ଙ୍କ ବିୟୋଗ ଏକ ଅପୂରଣୀୟ କ୍ଷତି। ତାଙ୍କ ପରିବାରକୁ ସଂଘ ପକ୍ଷରୁ ସମବେଦନା ଜ୍ଞାପନ କରାଯାଇଛି।
