ମୁମ୍ବାଇ,୫।୩ : ମହାରାଷ୍ଟ୍ର ବିଧାନସଭାର ବିଧାୟକ ତଥା ପ୍ରହାର ଜନଶକ୍ତି ପାର୍ଟିର ମୁଖ୍ୟ ବଚ୍ଚୁ କାଦୁ କହିଛନ୍ତି ଯେ ଆସାମର ଲୋକମାନେ କୁକୁର ମାଂସ ଖାଉଛନ୍ତି। ତେଣୁ ମହାରାଷ୍ଟ୍ରରୁ ବୁଲା କୁକୁରଙ୍କୁ ଆସାମକୁ ପଠାଯିବା ଉଚିତ। ବିଧାନସଭାରେ ବୁଲା କୁକୁର ଏବଂ ସେମାନଙ୍କ ଦ୍ୱାରା ସୃଷ୍ଟି ହେଉଥିବା ସମସ୍ୟା ଉପରେ ଆଲୋଚନା ଚାଲିଥିଲା। ଏହି ପ୍ରସଙ୍ଗରେ ବିଧାୟକ ପ୍ରତାପ ସରନାଇକ ଏବଂ ଅତୁଲ ଭଟକଲକର ନିଜର ମତ ରଖିଥିଲେ। ଏହି ସମୟରେ ବିଧାୟକ ବାଚୁ କାଦୁ ତାଙ୍କ ଭାଷଣରେ ବିବାଦୀୟ ମନ୍ତବ୍ୟ ଦେଇଥିଲେ।
ଆସାମରେ ବୁଲା କୁକୁରମାନଙ୍କର ଚାହିଦା ରହିଛି। ସେଠାରେ ବୁଲା କୁକୁରଙ୍କ ଦାମ ୮ ହଜାର ଟଙ୍କା ପର୍ଯ୍ୟନ୍ତ ମିଳିପାରିବ। ଏହା ସହ ରାଜ୍ୟରେ ବୁଲା କୁକୁରଙ୍କ ସଂଖ୍ୟା ମଧ୍ୟ ନିୟନ୍ତ୍ରିତ ହୋଇ ପାରିବ। ତେଣୁ ବୁଲା କୁକୁରମାନଙ୍କୁ ଆସାମକୁ ପଠାଯିବା ଆବଶ୍ୟକ। ବର୍ତ୍ତମାନ ଏହି ପରୀକ୍ଷା ଗୋଟିଏ ସହରରେ କରାଯିବା ଉଚିତ।
ବିଧାୟକଙ୍କ ଏହି ବିବୃତ୍ତିକୁ ନେଇ ବିବାଦ ସୃଷ୍ଟି ହୋଇଛି। ପ୍ରାଣୀ ଅଧିକାର କର୍ମୀ ତଥା ପ୍ରାଣୀପ୍ରେମୀମାନେ ଏହି ବିବୃତ୍ତିକୁ ଦୃଢ଼ ବିରୋଧ କରିଛନ୍ତି ଏବଂ କହିଛନ୍ତି ଯେ ବିଧାୟକଙ୍କ ଏହି ବିବୃତ୍ତି ଅମାନବୀୟ ଏବଂ ଅପମାନଜନକ।
ଏହାପୂର୍ବର ଝାଡଖଣ୍ଡର ଜଣେ ବିଧାୟକ ମଧ୍ୟ ଏଭଳି ବିବୃତ୍ତି ଦେଇଥିଲେ। ଝାଡଖଣ୍ଡର ବୋକାରୋରୁ ଭାଜପା ବିଧାୟକ ବିରଞ୍ଚି ନାରାୟଣ ବୁଲା କୁକୁରମାନେ ଲୋକଙ୍କୁ ଆକ୍ରମଣ କରୁଥିବାନେଇ କହିଥିଲେ ଯେ, ଯଦି ସରକାର ଏହାର ସମାଧାନ କରିପାରୁ ନାହାଁନ୍ତି, ତେବେ ନାଗାଲାଣ୍ଡର ଲୋକଙ୍କୁ ଡାକନ୍ତୁ, ସେମାନେ ଏହି ସମସ୍ୟାର ସମାଧାନ ସହଜରେ କରିଦେବେ।
