ଭୁବନେଶ୍ୱର,୩୦।୪(ବ୍ୟୁରୋ): ଓଡ଼ିଶାରେ କରୋନା ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ରାଜ୍ୟ ସରକାର ଗୁରୁବାର କୋଭିଡ୍ ପରୀକ୍ଷା ପାଇଁ ନୂଆ ନିୟମ ଜାରି କରିଛନ୍ତି। ସମସ୍ତ କରୋନା ସନ୍ଦିଗ୍ଧଙ୍କ ନମୁନା ଉପଯୁକ୍ତ ସମୟରେ ପରୀକ୍ଷା କରାଇବା ଏବଂ ପଜିଟିଭ୍ ଚିହ୍ନଟ ହେଲେ ସମ୍ପୃକ୍ତ ବ୍ୟକ୍ତିଙ୍କୁ ତୁରନ୍ତ ସଙ୍ଗରୋଧରେ ରଖିବା ପାଇଁ ଏଥିରେ ଗୁରୁତ୍ୱ ଦିଆଯାଇଛି।
ସ୍ବାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ସଚିବ ପି.କେ. ମହାପାତ୍ର ଏ ସଂକ୍ରାନ୍ତରେ ସମସ୍ତ ଜିଲାପାଳ, ମହାନଗର ନିଗମ କମିଶନର, ସିଡିଏମ୍ଓ ଏବଂ ପିଏଚ୍ଓମାନଙ୍କୁ ପତ୍ର ଲେଖିଛନ୍ତି। ସାମ୍ପୁଲ ସଂଗ୍ରହ କେନ୍ଦ୍ରଗୁଡ଼ିକରେ ସନ୍ଦିଗ୍ଧ ସଂକ୍ରମିତଙ୍କ କ୍ଷେତ୍ରରେ ସାମାଜିକ ଦୂରତ୍ୱ ରକ୍ଷା କରାଯାଉ। ସେଠାକୁ ନମୁନା ଦେବାକୁ ଯାଇଥିବା ବ୍ୟକ୍ତିମାନେ ମୁହଁରେ ମାସ୍କ ପିନ୍ଧନ୍ତୁ। ରିପୋର୍ଟ ଆସିବା ପର୍ଯ୍ୟନ୍ତ ସେମାନେ କ୍ୱାରାଣ୍ଟାଇନ୍ରେ ରୁହନ୍ତୁ। ଆର୍ଟି-ପିସିଆର୍ ସାମ୍ପୁଲଗୁଡ଼ିକୁ ସଂଗ୍ରହ କରାଯିବା ଦିନ ହିଁ ଲ୍ୟାବ୍କୁ ପଠାଯାଉ। ବିଳମ୍ବ ଏଡ଼ାଇବା ପାଇଁ ଜିଲାଗୁଡ଼ିକରୁ ପଠାଯାଇଥିବା ସାମ୍ପୁଲ ସଂଖ୍ୟା ଜିଲାକୁ ଦିଆଯାଇଥିବା ଟାର୍ଗେଟ ମଧ୍ୟରେ ସୀମିତ ରହୁ। ଲ୍ୟାବ୍ ପକ୍ଷରୁ ଇ-ମେଲ୍ ଜରିଆରେ ପଠାଯାଇଥିବା ଟେଷ୍ଟ ରିପୋର୍ଟଗୁଡ଼ିକୁ ଜିଲାସ୍ତରରେ ଯାଞ୍ଚ କରାଯାଉ। ରିପୋର୍ଟ ପଜିଟିଭ୍ ଆସିଥିଲେ ସମ୍ପୃକ୍ତ ବ୍ୟକ୍ତିଙ୍କୁ ସେହିଦିନ ଅବଗତ କରାଯାଉ ବୋଲି ଏଥିରେ ଉଲ୍ଲେଖ କରାଯାଇଛି। ଅନେକ ଜିଲାରେ କୋଭିଡ୍ ପ୍ରୋଟୋକଲ ପାଳନ ହେଉ ନ ଥିବାରୁ ସଂକ୍ରମିତ ବ୍ୟକ୍ତିମାନଙ୍କ ନମୁନା ପରୀକ୍ଷା ଓ ତାଙ୍କୁ ଆଇସୋଲେଶନରେ ରଖାଯିବାରେ ବିଳମ୍ବ ହେଉଛି। ତେଣୁ ଉପରୋକ୍ତ ନିୟମଗୁଡ଼ିକୁ ଜିଲା ସ୍ତରରେ କଡ଼ାକଡ଼ି ପାଳନ କରିବାକୁ ସେ ଏଥିରେ ନିର୍ଦ୍ଦେଶ ଦେଇଛନ୍ତି।