ଲାଞ୍ଜିଗଡ଼,୧୮।୧୨(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ଆଦିବାସୀ ଅଧ୍ୟ୍ୟୁଷିତ ମଦନଗୁଡା ଗ୍ରାମର ଆଦିବାସୀ ଯୁବକ ସଞ୍ଜୟ ମାଝୀ ଜାତୀୟ ଏନଟିପିସି ସିନିୟର ତୀରନ୍ଦାଜ ପ୍ରତିଯୋଗିତାରେ କାଂସ୍ୟ ପଦକ ଜିତିଛନ୍ତି। ଝାଡଖଣ୍ଡର ଜାମସେଦପୁରସ୍ଥିତ ଗୋପାଲ ମୈଦାନରେ ଡିସେମ୍ବର ୧୫ ରୁ ୨୦ ପର୍ଯ୍ୟନ୍ତ ଚାଲିଥିବା ଜାତୀୟ ଏନଟିପିସି ସିନିୟର ତୀରନ୍ଦାଜ ପ୍ରତିଯୋଗିତାରେ ଲାଞ୍ଜିଗଡର ଆଦିବାସୀ ଯୁବକ ସଞ୍ଜୟ ମାଝୀ କାଂସ୍ୟ ପଦକ ହାସଲ କରି ଓଡ଼ିଶା, ଜିଲା ତଥା ବ୍ଳକ ପାଇଁ ଗୌରବ ଆଣିଛନ୍ତି।
କଳାହାଣ୍ଡି ଜିଲ୍ଲା ଆଦିବାସୀ ଅଧ୍ୟ୍ୟୁଷିତ ଲାଞ୍ଜିଗଡ ବ୍ଳକ ପାହାଡ଼ ପଦର ପଞ୍ଚାୟତର ମଦନଗୁଡା ଗ୍ରାମର ଦାନ ମାଝୀଙ୍କ ପୁଅ ସଞ୍ଜୟ। ସଞ୍ଜୟ ଲାଞ୍ଜିଗଡ ସରକାରୀ ଏସଏସଡି ଉଚ୍ଚ ମାଧ୍ୟମିକ ବିଦ୍ୟାଳୟରେ ପ୍ରଥମେ ଷଷ୍ଠ ଶ୍ରେଣୀରୁ ଅଧ୍ୟୟନ କରି ଯୁକ୍ତ-୨ ପର୍ଯ୍ୟନ୍ତ ଶିକ୍ଷା ସହିତ କୋଚ ଶୀମାଞ୍ଚଳ କାଟ୍ରାକାଙ୍କ ଠାରୁ ତୀରନ୍ଦାଜ ତାଲିମ ମଧ୍ୟ
ନେଉଥିଲେ। ଚଳିତବର୍ଷ ବାଣିଜ୍ୟରେ ଉତ୍ତୀର୍ଣ୍ଣ ହେବାପରେ ଭୁବନେଶ୍ୱରସ୍ଥିତ କିସ ବିଦ୍ୟାଳୟ ଅଧ୍ୟୟନ କରୁଛନ୍ତି। ସେ ଭୁବନେଶ୍ୱର କିସ ବିଦ୍ୟାଳୟ ପକ୍ଷରୁ ଏହି ଜାତୀୟ ଏନଟିପିସି ସିନିୟର ତୀରନ୍ଦାଜ ପ୍ରତିଯୋଗିତାରେ ଇଣ୍ଡିଆନ ରାଉଣ୍ଡ ସିନିୟର ବାଳକ ବିଭାଗରେ ଭାଗ ନେଇ ୫୦ ମିଟରରେ ବ୍ୟବଧାନରେ ୩୨୭ ପଏଣ୍ଟ ଓ ୩୦ ମିଟର ବ୍ୟବଧାନରେ ୩୨୮ ପଏଣ୍ଟ ରଖି ମୋଟ ୬୫୫ ପଏଣ୍ଟ ହାସଲ କରି ତୃତୀୟ ସ୍ଥାନ ଅଧିକାର କରି କାଂସ୍ୟ ପଦକ ହାସଲ କରିଛନ୍ତି। ସଞ୍ଜୟ ଓଡ଼ିଶା, ଜିଲା ତଥା ବ୍ଳକ ପାଇଁ ଗୌରବ ଆଣିଥିବାରୁ ଜିଲା ତଥା ବ୍ଲକ ଅଞ୍ଚଳରେ ବିଭିନ୍ନ ମହଲରୁ ତାଙ୍କୁ ସମ୍ବର୍ଦ୍ଧନା ଜଣାଉଛନ୍ତି ।
