ମେଲବୋର୍ନ, ୬ା୨ (ଏପି)-ସେରେନା ଓ୍ବିଲିୟମ୍ସ ଅଷ୍ଟ୍ରେଲିଆନ ଓପନ ଟ୍ୟୁନ୍ ଅପ୍୍ ଟୁର୍ନାମେଣ୍ଟ ସେମିଫାଇନାଲରୁ ଓହରିଯାଇଛନ୍ତି। ଡାହାଣ କାନ୍ଧରେ ଯନ୍ତ୍ରଣା ଅନୁଭବ କରୁଥିବାରୁ ସେ ଏହି ନିଷ୍ପତ୍ତି ନେଇଥିବା କହିଛନ୍ତି। ସେରେନା ସେମିଫାଇନାଲରେ ଶୀର୍ଷ ର଼୍ୟାଙ୍କିଙ୍ଗପ୍ରାପ୍ତ ଆଶ ବାର୍ଟିଙ୍କ ସହ ମୁକାବିଲା କରିଥାନ୍ତେ। ଏହି ୨୩ଥର ଗ୍ରାଣ୍ଡସ୍ଲାମ ବିଜୟିନୀ ଏକ ଗ୍ରାଣ୍ଡସ୍ଲାମ ଇଭେଣ୍ଟରେ ଅଂଶଗ୍ରହଣ କରିବାର ଏକ ସପ୍ତାହ ପୂର୍ବରୁ କୌଣସି ଟୁର୍ନାମେଣ୍ଟରେ ଭାଗ ନେଇ ନ ଥାନ୍ତି। କୋଭିଡ୍ ଯୋଗୁ ଗତ ବର୍ଷ ସେ ତାଙ୍କ ନୀତିରେ ପରିବର୍ତ୍ତନ କରିଛନ୍ତି। ଗତବର୍ଷ ୟୁଏସ୍ ଓପନ୍ ପରେ ସିଜନ ଆରମ୍ଭ ଅଷ୍ଟ୍ରେଲିଆନ ପୂର୍ବରୁ ଅଭ୍ୟାସ ପାଇଁ ସେ ଏକ ଟେନିସ ଟୁର୍ନାମେଣ୍ଟ ଖେଳିଛନ୍ତି। ୩୯ ବର୍ଷୀୟା ଏହି ଆମେରିକୀୟ ଅକ୍ଟୋବରରେ ଇଞ୍ଜୁରି ଯୋଗୁ ଫ୍ରେଞ୍ଚ୍ ଓପନ ଦ୍ୱିତୀୟ ରାଉଣ୍ଡରୁ ଓହରିଯିବା ପରଠାରୁ ଏହା ହେଉଛି ତାଙ୍କର ପ୍ରଥମ ଟୁର୍ନାମେଣ୍ଟ। ଅଷ୍ଟ୍ରେଲିଆନ ଓପନ ଖେଳିବା ଲାଗି ଆସିଥିବା ସମସ୍ତ ଖେଳାଳିଙ୍କ ଭଳି ତାଙ୍କୁ ୧୪ଦିନ କ୍ୱାରାଣ୍ଟାଇନ୍ରେ ରହିବାକୁ ପଡ଼ିଥିବାରୁ ଅଭ୍ୟାସ ପାଇଁ ତାଙ୍କୁ କମ୍ ସମୟ ମିଳିଥିଲା। ସେରେନା ଓହରିଯିବାରୁ ବାର୍ଟିଙ୍କୁ ଓ୍ବାକଓଭର ମିଳିଛି। ଫାଇନାଲ ପୂର୍ବରୁ ଶନିବାର ମଧ୍ୟ ତାଙ୍କୁ କିଛି ବିଶ୍ରାମ ମିଳିବ। ଅନ୍ୟପକ୍ଷରେ ଗାର୍ବିନ ମୁଗୁରୁଜା ୬-୨, ୬-୨ ସେଟ୍ରେ ଅଷ୍ଟ୍ରେଲିଆନ ଓପନ ଚାମ୍ପିୟନ ସୋଫିଆ କେନିନଙ୍କୁ ପରାସ୍ତ କରି ସେମିଫାଇନାଲରେ ପ୍ରବେଶ କରିଛନ୍ତି।