ଭୋପାଳ, ୨ା୯:ମଧ୍ୟପ୍ରଦେଶର ସାଗର ସହରରେ ଜଣେ ସିରିଏଲ କିଲର ଆତଙ୍କ ଖେଳାଇଛନ୍ତି। ଗତ ୩ ଦିନରେ ୩ ଜଣଙ୍କୁ ହତ୍ୟା କରିବା ପରେ ଲୋକେ ଭୟଭୀତ ହୋଇପଡ଼ିଛନ୍ତି। ବିଶେଷକରି ସିକ୍ୟୁରିଟି ଗାର୍ଡଙ୍କୁ ସେ ଟାର୍ଗେଟ କରୁଥିବା ଜଣାଯାଇଛି। ଜଗୁଆଳିମାନେ ରାତିରେ ଶୋଇଥିବାବେଳେ ହାତୁଡ଼ି କିମ୍ବା ପଥର ଦ୍ୱାରା ସେମାନଙ୍କ ମୁଣ୍ଡ ଛେଚି ହତ୍ୟା କରୁଛନ୍ତି। ଦୁଇ ଜଣଙ୍କ ହତ୍ୟାରେ ଜଣଙ୍କର ସମ୍ପୃକ୍ତି ଥିବା ପୋଲିସ ଜାଣିବାକୁ ପାଇଥିବାରୁ ଏହା ସିରିଏଲ କିଲରଙ୍କ କାମ ବୋଲି କୁହାଯାଉଛି। ଅଦ୍ୟାବଧି ମୋଟ ୪ ଜଣଙ୍କୁ ଆକ୍ରମଣ ହୋଇଥିବାବେଳେ ୩ ଜଣ ପ୍ରାଣ ହରାଇସାରିଛନ୍ତି। ଅନ୍ୟ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ହତ୍ୟାକାଣ୍ଡର କାରଣ ଜଣାପଡ଼ି ନ ଥିବାବେଳେ ପୋଲିସ ଅଭିଯୁକ୍ତଙ୍କ ସ୍କେଚ୍ ଜାରି କରିଛି।
କାଣ୍ଟ୍ ଥାନା ଅନ୍ତର୍ଗତ ଏକ ଫ୍ୟାକ୍ଟ୍ରିରେ ସିକ୍ୟୁରିଟି ଗାର୍ଡ ଭାବେ ନିୟୋଜିତ କଲ୍ୟାଣ ଲୋଧି (୫୦)ଙ୍କୁ ଅଗଷ୍ଟ ୨୮ ତାରିଖ ରାତିରେ ହାତୁଡ଼ିରେ ଆକ୍ରମଣ କରି ହତ୍ୟା କରାଯାଇଛି। ସେହିପରି ଅଗଷ୍ଟ ୨୯ରେ ସିଭିଲ୍ ଲାଇନ ପୋଲିସ ଷ୍ଟେଶନ ଅନ୍ତର୍ଗତ ଏକ କଲେଜର ଜଗୁଆଳି ଶମ୍ଭୁରାମ ଦୁବେ(୬୦)ଙ୍କ ମୁଣ୍ଡକୁ ପଥରରେ ଛେଚି ହତ୍ୟା କରାଯାଇଥିବା ପୋଲିସ କହିଛି। ହତ୍ୟାର ଶିକାର ହୋଇଥିବା ଅନ୍ୟ ଜଣେ ସିକ୍ୟୁରିଟି ଗାର୍ଡ ହେଲେ ଉତ୍ତମ ରଜାକ। ସାଗରର ମୋତି ନଗର ଅଞ୍ଚଳରେ ଜଣକ ଘରେ ଜଗୁଆଳି ଥିବା ମଙ୍ଗଲ ଅହିରଓ୍ବାରଙ୍କୁ ପଥରରେ ଆକ୍ରମଣ କରାଯାଇଥିବାବେଳେ ତାଙ୍କ ଅବସ୍ଥା ସଙ୍କଟାପନ୍ନ ରହିଛି। ଗୋଟିଏ ପ୍ରକାର ଷ୍ଟାଇଲରେ ହତ୍ୟା କରାଯାଇଥିବାରୁ ସମାନ ଅଭିଯୁକ୍ତ ଏଥିରେ ସମ୍ପୃକ୍ତ ଥିବା ପୋଲିସ ସନ୍ଦେହ କରିଛି। ସିସିଟିଭି ଫୁଟେଜ୍ ଆଧାରରେ ଅଭିଯୁକ୍ତଙ୍କ ସ୍କେଚ୍ ଜାରି କରାଯାଇଛି। ମଙ୍ଗଲ ସୁସ୍ଥ ହେଲେ ତାଙ୍କଠାରୁ ହତ୍ୟାକାଣ୍ଡର ସୁରାକ ମିଳିପାରେ ବୋଲି ପୋଲିସ କହିଛି। ଆଶ୍ଚର୍ଯ୍ୟକର କଥା ହେଉଛି ହତ୍ୟା ପରେ ଅଭିଯୁକ୍ତ କୌଣସି ଲୁଟ୍ପାଟ ନ କରି କେବଳ ତାଙ୍କ ମୋବାଇଲ ଫୋନ୍ ନେଇଯାଉଛନ୍ତି। ଏହା ପୂର୍ବରୁ ସେଥିରୁ ସିମ୍କାର୍ଡ କାଢ଼ି ସେଠାରେ ହିଁ ଫିଙ୍ଗି ଦେଉଛନ୍ତି। ଅଭିଯୁକ୍ତ ସାଇକୋ କିଲର ହୋଇଥିବାରୁ କୌଣସି ସୂଚନା ନ ଥିବା ପୋଲିସ କହିଛି। ଏହାପୂର୍ବରୁ ମଧ୍ୟପ୍ରଦେଶର ସିରିଏଲ କିଲର ଆଦେଶ ଖାମ୍ରା ଟ୍ରକ୍ ଡ୍ରାଇଭର ଏବଂ କ୍ଲିନରଙ୍କୁ ଟାର୍ଗେଟ କରି ହତ୍ୟାକରିବା ଘଟଣା ସେତେବେଳେ ସାରା ଦେଶରେ ଚାଞ୍ଚଲ୍ୟ ଖେଳାଇଥିଲା। ଆଦେଶ ୩୪ ଜଣଙ୍କୁ ହତ୍ୟା କରି ଦଶନ୍ଧି ପର୍ଯ୍ୟନ୍ତ ଫେରାର ଥିଲେ। ୨୦୧୮ରେ ପୋଲିସ ତାଙ୍କୁ ଗିରଫ କରିଥିଲା।
