ହିଞ୍ଜିଳିକାଟୁ,୧।୨(ଦ୍ବିତୀକୃଷ୍ଣ ପଣ୍ଡା): ଗଞ୍ଜାମ ଜିଲା ୫୯ ନମ୍ବର ଜାତୀୟ ରାଜପଥ ହିଞ୍ଜିଳି ଥାନା ଅନ୍ତର୍ଗତ ସମରଝୋଳ- ସାରୁ ରାସ୍ତାରେ ଜଣେ ମଦ୍ୟପ କାର୍ ଚାଳକ ସିରିଜ୍ ଦୁର୍ଘଟଣା ଘଟାଇଛନ୍ତି। ଦୁର୍ଘଟଣାରେ ବଡ଼ଧରଣର କ୍ଷୟକ୍ଷତି ଘଟି ନ ଥିଲେ ମଧ୍ୟ କାରଟି ଭାଙ୍ଗି କ୍ଷତିଗ୍ରସ୍ତ ହୋଇଛି। ଏପରିକି କେତେଜଣ ବାଇକ୍ଚାଳକ ଓ ଅନ୍ୟ ଗାଡ଼ିଗୁଡିକ ବଡ଼ ଧରଣର ଦୁର୍ଘଟଣାରୁ ବର୍ତ୍ତି ଯାଇଛନ୍ତି।
ପ୍ରକାଶ ଯେ, ବୁଧବାର ରାତିରେ ବ୍ରହ୍ମପୁରରୁ ଭଞ୍ଜନଗର ଅଭିମୁଖେ ଯାଉଥିବା ଏକ କାର୍(ନଂ.ଓଡି୦୨ସିଏନ-୪୮୦୭) ହିଞ୍ଜିଳି ଥାନା ତଥା ୫୯ ନମ୍ବର ଜାତୀୟ ରାଜପଥ ସମରଝୋଳ ଛକ ନିକଟରେ ପ୍ରଥମେ ଏକ କୁକୁଡ଼ା ବୋଝେଇ ପିକଅପ୍ ଭ୍ୟାନ୍କୁ ପଛପଟୁ ଧକ୍କା ଦେଇଥିଲା। ସେଠାରେ ଉଭୟ ଗାଡ଼ି ଚାଳକଙ୍କ ମଧ୍ୟରେ ବିବାଦ ଉପୁଜିଥିଲା। ଏଭଳି ସ୍ଥିତିରେ ଉକ୍ତ କାରଟି କିଛି ଦୂର ଗଲାପରେ ଅନ୍ୟ ୨ଟି ବାଇକ୍କୁ ଧକ୍କା ଦେଇଥିଲା। ପରେ ନିଶାସକ୍ତ କାର୍ ଚାଳକ ଜଣଙ୍କ ସାରୁ ଛକରେ ଥିବା ପୋଲିସ ଷ୍ଟପ୍ ଫାଟକକୁ ଧକ୍କା ଦେଇଥିଲେ। ଦୁର୍ଘଟଣାରେ କାରର ସମ୍ମୁଖ ଭାଙ୍ଗି କ୍ଷତିଗ୍ରସ୍ତ ହେବା ସହ କାର୍ ଚାଳକ ଜଣଙ୍କ ମାତାଲ ଅବସ୍ଥାରେ ଗାଡିରୁ ତଳକୁ ଖସି ପଡ଼ିଥିଲେ।
ଦୁର୍ଘଟଣା ପରେ ରାଜପଥରେ ଟ୍ରାଫିକ ସମସ୍ୟା ସୃଷ୍ଟି ହୋଇଥିଲା। ଖବର ପାଇ ହିଞ୍ଜିଳି ପୋଲିସ ଦୁର୍ଘଟଣା ଗ୍ରସ୍ତ କାରକୁ ରାସ୍ତାରୁ ହଟାଇବା ପରେ ଗାଡ଼ି ଚଳାଚଳ ସ୍ବାଭାବିକ ହୋଇଥିଲା। ପରେ ପୋଲିସ ଅଚେତ ଅବସ୍ଥାରେ କାର୍ ଚାଳକଙ୍କୁ ଉଦ୍ଧାର କରିଥିଲା। ଅନ୍ୟପକ୍ଷେ ରାଜପଥରେ ମଦ୍ୟପାନ କରି ବେଆଇନ ଭାବେ ଟ୍ରାଫିକ ସମସ୍ୟା ସୃଷ୍ଟି କରୁଥିବା ନିଶାସକ୍ତ ଡ୍ରାଇଭରଙ୍କୁ ପୋଲିସ ପକ୍ଷରୁ ଚିହ୍ନଟ କରି ଦୃଢ ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବୀ ମହଲରେ ଦାବି କରାଯାଇଛି।
