କେନ୍ଦୁଝର,୫ା୬(ନରେଶ ଚନ୍ଦ୍ର ପଟ୍ଟନାୟକ): ସଦର ଥାନା ଅନ୍ତର୍ଗତ ଠାକୁର ଡିହିରୁ ପୂତୁଲୁପାଣି ଛକ ମଧ୍ୟରେ ଜାତୀୟ ରାଜପଥ ୪୯ରେ ବୁଧବାର ଏକ ସିରିଜ ଦୁର୍ଘଟଣା ଘଟି ୩ ଜଣଙ୍କ ମୃତ୍ୟୁ ଘଟିଥିବା ବେଳେ ୧୨ ଜଣ ଆହତ ହୋଇ ଚିକିତ୍ସିତ ହେଉଛନ୍ତି।
ପ୍ରକାଶ ଯେ, ଆଜି ଏକ ଟ୍ରେଲର କ୍ଷୀପ୍ର ଗତିରେ ମୁମ୍ବାଇ ପଟୁ କେନ୍ଦୁଝର ଆଡ଼କୁ ଆସୁଥିବା ବେଳେ ପ୍ରଥମେ ଏକ ଲୁନାକୁ ଧକ୍କା ଦେଇଥିଲା। ଲୁନା ଆରୋହୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା। ତାଙ୍କର ପରିଚୟ ମିଳିନାହିଁ, କିନ୍ତୁ ତାଙ୍କ ଘର ନୟାଗଡ଼ ଅଞ୍ଚଳରେ ଏବଂ ସ୍କ୍ରାପ୍ ବ୍ୟବସାୟ କରୁଥିଲେ ବୋଲି ଜଣାପଡ଼ିଛି। ଏହା ପରେ ଟ୍ରେଲରଟି ଏକ ବାଇକ୍କୁ ଧକ୍କା ଦେବାରୁ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ତାଙ୍କ ନାମ କୁଶ ବେହେରା (୩୬) ଏବଂ ଘର ଉପର କାଇପୁର ବୋଲି ଜଣାପଡ଼ିଛି। ବାଇକ୍ରେ ବସିଥିବା ଅନ୍ୟ ଜଣେ ଗୁରୁତର ହୋଇ ପ୍ରଥମେ କେନ୍ଦୁଝର ଜିଲା ମୁଖ୍ୟ ଡାକ୍ତରଖାନା ଓ ପରେ ଗୁରୁତର ଅବସ୍ଥାରେ କଟକ ସ୍ଥାନାନ୍ତରଣ ବେଳେ ବାଟରେ ମୃତ୍ୟୁବରଣ କରିଥିବା ଜଣାପଡ଼ିଛି। ତାଙ୍କ ନାମ ଖଗେଶ୍ବର ବେହେରା (୨୮) ଏବଂ ଘର ଉପର କାଇପୁର ବୋଲି ଜଣାପଡ଼ିଛି। ଏହା ପରେ ଉକ୍ତ ଟ୍ରେଲରଟି ଦୁଇଟି କାର୍, ଏକ ଅଟୋ, ଏକ ବାଇକ୍କୁ ଧକ୍କା ଦେବା ଫଳରେ ସମୁଦାୟ ୧୨ ଜଣ ଆହତ ହୋଇଥିବା ଜଣାପଡ଼ିଛି। ସେମାନଙ୍କୁ କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିବା ବେଳେ ଜଣେ ବାଇକ୍ ଆରୋହୀଙ୍କୁ ଗୁରୁତର ଅବସ୍ଥା ହେବାରୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। ରାସ୍ତା କଡ଼ରେ ଛିଡ଼ା ହୋଇଥିବା ଲମ୍ବା ଟ୍ରକ୍ ପାର୍କିଂ କାରଣରୁ ଏଭଳି ଦୁର୍ଘଟଣା ଘଟିଥିବା ଅଭିଯୋଗ ହେଉଛି। ପୋଲିସ ମୃତଦେହ ଜବତ କରି ଜିଲା ମୁଖ୍ୟ ଡାକ୍ତରଖାନାକୁ ବ୍ୟବଚ୍ଛେଦ ପାଇଁ ପଠାଇ ତଦନ୍ତ କରୁଛି। ଟ୍ରକ୍କୁ ଓଭର ଟେକ୍ କରିବା ସମୟରେ ଏଭଳି ଦୁର୍ଘଟଣା ଘଟିଥିବା ସ୍ଥାନୀୟ ଲୋକ ମତବ୍ୟକ୍ତ କରୁଛନ୍ତି। ଏନେଇ ସଦର ଥାନା ଅଧିକାରୀ ତ୍ରିନାଥ ସେଠୀ କହିଛନ୍ତି, କେସ୍ ନମ୍ବର ୩୬୫/୨୦୨୪ରେ ମାମଲା ରୁଜୁ କରିବା ସହ ଗାଡ଼ି ଜବତ କରି ଘଟଣାର ତଦନ୍ତ ଚାଲିଛି। ତେବେ ବେଆଇନ ରାସ୍ତାରେ ଟ୍ରକ ପାର୍କିଂ ଯୋଗୁ ବାରମ୍ବାର ଦୁର୍ଘଟଣା ଘଟିବା ସହ ବହୁ ଜୀବନ ହାନି ଘଟୁଥିଲେ ହେଁ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଉ ନ ଥିବାରୁ ଏଥିପାଇଁ ପ୍ରଶାସନଙ୍କୁ ଦାୟୀ କରି ମାନବାଧିକାର କମିଶନ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ସାମାଜିକ କର୍ମୀମାନେ ଦାବି କରୁଛନ୍ତି। ବିଭିନ୍ନ ଟ୍ରାନ୍ସପୋର୍ଟର ରାସ୍ତା ଉପରେ ଗାଡ଼ି ଅଟକାଇ ଚାଲାଣ, ତେଲ ଟୋକନ ଆଦି ଦେଉଥିବା ବେଳେ ପାର୍କିଂ ବ୍ୟବସ୍ଥା ନ ଥିବାରୁ ଲୁହାପଥର ଲୋଡ୍ ପାଇଁ ଶହଶହ ଟ୍ରକ୍ ରାସ୍ତା ଉପରେ ଓ କଡ଼ରେ ବେଆଇନ ଭାବରେ ପାର୍କିଂ କରୁଥିବାରୁ ବହୁ ଜୀବନ ହାନି ଘଟିଛି। ଏଣୁ ଏଥିପାଇଁ ପ୍ରଶାସନ ପକ୍ଷରୁ ତୁରନ୍ତ ପଦକ୍ଷେପ ନେବାକୁ ଦାବି ହେଉଛି।