କେନ୍ଦୁଝର, ୫।୨(ନରେଶ ଚନ୍ଦ୍ର ପଟ୍ଟନାୟକ) : କେନ୍ଦୁଝର ଟାଉନ ଥାନା ଅଧୀନ ବୈଦରାଜ ସାହି ଛକ ନିକଟରେ ସୋମବାର ଏକ ସିରିଜ୍ ଦୁର୍ଘଟଣା ଘଟିଛି। ଏକ ୧୪ ଚକିଆ ଟ୍ରକ ବ୍ରେକ୍ ଫେଲ ହେବାରୁ ୩ଟି ଟ୍ରକ, ୪ଟି ବାଇକ୍କୁ ଧକ୍କା ଦେଇ ରାସ୍ତା କଡକୁ ଓଲଟି ପଡିଥିଲା। ଦୁର୍ଘଟଣାରେ ରାସ୍ତା ପାର୍ଶ୍ୱରେ ଛିଡ଼ା ହୋଇଥିବା ୭ଜଣ ଲୋକ ଆହତ ହୋଇଥିବା ବେଳେ ୨ଜଣଙ୍କ ଅବସ୍ଥା ଗୁରୁତର ରହିଛି। ଘଟଣା ସ୍ଥଳରେ ପୋଲିସ ଏବଂ ଦମକଳ ବାହିନୀ ପହଞ୍ଚି ଆହତମାନଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ କେନ୍ଦୁଝର ମୁଖ୍ୟ ଚିକିତ୍ସାଳୟ ପଠାଇଥିଲେ।
ଆହତମାନେ ହେଲେ ଘଟଗାଁ ବ୍ଲକ ପୋଇପାଣି ଗ୍ରାମର କୂଳମଣି ମହାନ୍ତ(୬୫), ପାଟଣା ବ୍ଲକ ପାଟନାଳୀ ଗ୍ରାମର ଭାଗବତ ମହାନ୍ତ(୩୫), ଭଦ୍ରକ ଅଞ୍ଚଳର ପ୍ରିୟରଞ୍ଜନ ମହାପାତ୍ର(୪୮), ଶୁଆକାଟି ଅଞ୍ଚଳର ଏସ୍କେ ଦାନିସ(୧୮) ଏବଂ ଅନ୍ୟ ୩ଜଣଙ୍କ ପରିଚୟ ମିଳିପାରି ନାହିଁ। ଆହତଙ୍କ ମଧ୍ୟରୁ ପ୍ରିୟରଞ୍ଜନ ମହାପାତ୍ର ଏବଂ ଅନ୍ୟ ଜଣଙ୍କ ଅବସ୍ଥା ଗୁରୁତର ରହିଛି।
ମିଳିଥିବା ସୂଚନା ମୁତାବକ ସୋମବାର ଡବ୍ଲୁବି୫୭ବି-୬୩୩୪ ନମ୍ବର ବିଶିଷ୍ଟ ଏକ ଆଇରନ ବୋଝେଇ ଟ୍ରକ୍ ସମ୍ବଲପୁରରୁ ୪୯ ନମ୍ବର ଜାତୀୟ ରାଜପଥ ଦେଇ କେନ୍ଦୁଝର ଦେଇ ଯାଉଥିବା ବେଳେ ଜୁଡିଆ ଘାଟିରେ ବ୍ରେକ୍ ଫେଲ ହୋଇଯାଇଥିଲା। ଫଳରେ ଟ୍ରକଟି ଜୁଡିଆ ଓଭରବ୍ରିଜ ତଳେ ଏକ ଟ୍ରକକୁ ଧକ୍କା ଦେବା ପରେ ବିପରିତ ପାର୍ଶ୍ୱରେ ଥିବା ୨ଟି ଟ୍ରକକୁ ଧକ୍କା ଦେଇଥିଲା। ଏପରିକି ଟ୍ରକଟି ଭାରସାମ୍ୟ ହରାଇ ରାସ୍ତା କଡକୁ ଓଲଟି ପଡିଥିଲା। ଟ୍ରକରେ ଭାରି ସାମଗ୍ରୀ ଥିବାରୁ ଦୁଇଫାଳ ହୋଇଯାଇଥିଲା ।
ଅନ୍ୟପକ୍ଷେ ଟ୍ରକ୍ ୪ଟି ବାଇକ୍ ଉପରେ ଚଢିଯିବାରୁ ବାଇକ୍ଗୁଡିକ ଚୁରମାର୍ ହୋଇଯାଇଛି। ହେଲେ ଟ୍ରକ ଚାଳକ ଦୁର୍ଘଟଣାରୁ ବର୍ତ୍ତି ଯାଇଛନ୍ତି। ଦୁର୍ଘଟଣା ପରେ ରାସ୍ତାରେ ୨ଘଣ୍ଟା ଧରି ଯାତାୟତ ଠପ୍ ହୋଇଥିଲା। ଖବର ପାଇ ପୋଲିସ ଓ ଦମକଳ ବାହିନୀ ପହଞ୍ଚି ଉଦ୍ଧାର କାର୍ଯ୍ୟ କରିବା ସହ ରାସ୍ତା ସଫା କରିଥିଲେ । ଦୁର୍ଘଟଣା ଏତେ ଜୋର ଥିଲା ଯେ, ଏକ ଟ୍ରକର ତେଲ ଟାଙ୍କି ଫାଟିଯାଇ ତେଲ ରାସ୍ତାରେ ବୋହିଥିଲା। ଫଳରେ ନିଆଁ ଲାଗିବା ଆଶଙ୍କା କରି ଦମକଳ ବାହିନୀ ପକ୍ଷରୁ ପାଣି ସ୍ପ୍ରେ କରାଯାଇଥିଲା। ଦୁର୍ଘଟଣା ଘଟାଇଥିବା ଟ୍ରକ୍ ହେଲପରକୁ ସ୍ଥାନୀୟ ଲୋକ ଧରି ପୋଲିସ ଜିମା ଦେଇଛନ୍ତି। ଟାଉନ ଥାନା ଅଧିକାରୀ ରମାକାନ୍ତ ସଏ, କହିଛନ୍ତି, ଦୁର୍ଘଟଣା ଘଟିବା ପରେ ଚାଳକ ଫେରାର ହୋଇଯାଇଥିବା ବେଳେ ହେଲପରଙ୍କୁ ପୋଲିସ ଆଣି ପଚରାଉଚୁରା କରୁଛି। ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।