ନୂଆଦିଲ୍ଲୀ,୧୩।୯: କରୋନା ମହାମାରୀ ଯୋଗୁ ଜେଲ୍ରେ ଅପରାଧୀଙ୍କ ଭିଡ଼ କମାଇବା ଲାଗି ସୁପ୍ରିମ୍କୋର୍ଟ ନିର୍ଦ୍ଦେଶ ଜାରି କରିଥିଲେ। ତେବେ ଡକାୟତି, ଲୁଟ୍, ଟଙ୍କା ପାଇଁ ଅପହରଣ ଆଦି ସଙ୍ଗିନ ମାମଲା ସହିତ ଜଡ଼ିତ ଥିବା ଅପରାଧୀଙ୍କୁ ମହାମାରୀ ଜାମିନ ମିଳିବ ନାହିଁ ବୋଲି ଦିଲ୍ଲୀ ହାଇକୋର୍ଟଙ୍କର ଏକ କମିଟି ପକ୍ଷରୁ କୁହାଯାଇଛି।
କେଉଁ ଅପରାଧୀଙ୍କୁ ମହାମାରୀ ସମୟରେ ଜାମିନ ପ୍ରଦାନ କରାଯିବ ସେ ନେଇ ମାର୍ଗଦର୍ଶନ କରିବା ସମ୍ପର୍କରେ ଦିଲ୍ଲୀ ହାଇକୋର୍ଟର ଜଣେ ବିଚାରପତିଙ୍କ ଅଧ୍ୟକ୍ଷତାରେ ଗଠିତ ହାଇ ପାୱାର୍ କମିଟି (ଏଚ୍ପିସି) କରୋନା ମହାମାରୀ ସମୟରେ ଜେଲରେ ଥିବା କେତେକ ଅପରାଧୀଙ୍କୁ ଜାମିନ୍ ଦେବାକୁ କହିଥିଲେ।
ତେବେ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ ପାଇଁ ଅପରାଧୀଙ୍କ ବିରୋଧରେଆଇପିସି ଧାରା ୩୬୪-ଏ ଅନ୍ତର୍ଗତ ଟଙ୍କା ପାଇଁ, ୩୯୪ ଅର୍ନ୍ତଗତ ଉଦ୍ଦେଶ୍ୟମୂଳକ ଆଘାତ ଦେବା ଏବଂ ୩୯୭ ଅନ୍ତର୍ଗତ ଡକାୟତି ଆଦି ମାମଲା ନ ଥିବା ଆବଶ୍ୟକ ବୋଲି ବିଚାରପତି ବିପିନ ସାଙ୍ଘିଙ୍କ ନେତୃତ୍ୱରେ ଗଠିତ କମିଟି ପକ୍ଷରୁ ଏଭଳି କୁହାଯାଇଛି।
କମିଟି ସ୍ପଷ୍ଟୀକରଣ ଦେଇଛି ଯେ,କେତେକ ନିର୍ଦ୍ଦିଷ୍ଟ ଅପରାଧ, ଯେପରିକି ଆଇପିସିର ଧାରା ୩୦୨ ଅନ୍ତର୍ଗତ ହତ୍ୟା କ୍ଷେତ୍ରରେ ମଧ୍ୟ ମହାମାରୀ ଜାମିନ ପ୍ରଦାନ କରି ହେବ ନାହିଁ। ସଙ୍ଗିନ ଅପରାଧ ଉପରେ ବିଚାର କରାଯିବା ପରେ ଏସବୁକୁ ବାଦ ଦିଆଯାଇଛି।