ଯାଜପୁର ଅଫିସ,୨୮ା୭:ଆଜାଦୀ କା ଅମୃତ ମହୋତ୍ସବ ପରୀପ୍ରେକ୍ଷୀରେ ୨୫ରୁ ୩୦ ପର୍ଯ୍ୟନ୍ତ ପ୍ରତ୍ୟେକ ଜିଲାରେ ଉଜ୍ଜ୍ୱଳ ଭାରତ-ଉଜ୍ଜ୍ୱଳ, ଭବିଷ୍ୟତ ପାୱାର-୨୦୪୭ କାର୍ଯ୍ୟକ୍ରମ(ବିଜୁଳି ମହୋସତ୍ବ) ପାଳନ କରାଯାଉଛି। ଏଥିରେ ଭାରତ ସରକାରଙ୍କ ଶକ୍ତି ମନ୍ତ୍ରଣାଳୟ, ରାଜ୍ୟ ସରକାରଙ୍କ ଶକ୍ତି ବିଭାଗ ଓ ଯାଜପୁର ଜିଲା ପ୍ରଶାସନର ମିଳିତ ଆନୁକୂଲ୍ୟରେ ଜିଲାସ୍ତରୀୟ ବିଜୁଳି ମହୋସତ୍ବ ଚାଲିଛି। ତେବେ ଏହି ଉସତ୍ବ ପାଳନ ଅପେକ୍ଷା ନିରନ୍ତର ବିଜୁଳି ସେବା ଯୋଗାଇବା ନିହାତି ଅପରିହାର୍ଯ୍ୟ ବୋଲି ମତପ୍ରକାଶ ପାଇଛି।
ବୁଧବାର ମଙ୍ଗଳପୁର ସାଧୁ ଗୌଡେଶ୍ୱର ମହାବିଦ୍ୟାଳୟ ସମ୍ମିଳନୀ କକ୍ଷରେ ବିଜୁଳି ଉସତ୍ବ ପାଳିତ ହୋଇଯାଇଛି। ଓପିଟିସିଏଲ୍ର ଜେନେରାଲ ମ୍ୟାନେଜର ଦୁର୍ଗା ଚରଣ ଜେନାଙ୍କ ସଭାପତିତ୍ୱରେ ଅନୁଷ୍ଠିତ ଏହି ଊସତ୍ବରେ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଅଶୋକ କୁମାର ବେହୁରିଆ ମୁଖ୍ୟ ଅତିଥି ଭାବେ ଯୋଗଦେଇ କହିଲେ ଯେ, ସ୍ବାଧୀନତାର ୭୫ ବର୍ଷ ଭିତରେ ଦେଶ ଆଜି ଅନେକ ସୋପାନ ଅତିକ୍ରମ କରି ବିଦ୍ୟୁତ୍ କ୍ଷେତ୍ରରେ ଏକ ବୈପ୍ଳବିକ ପରିବର୍ତ୍ତନ ଆଣିପାରିଛି। ଆଜି ଆଉ ଲୋ ଭୋଲ୍ଟେଜର ସମସ୍ୟା ନାହିଁ। ନୂଆ ନୂଆ ବୈଷୟିକ ଜ୍ଞାନ କୌଶଳ ପ୍ରୟୋଗ ଫଳରେ ପ୍ରତି ଘରେ ବିଜୁଳି ପହଞ୍ଚି ପାରିଛି। ଯାଜପୁର ବିଧାୟକଙ୍କ ପ୍ରତିନିଧି କର୍ଣ୍ଣାଟ କେଶରୀ ଦାସ ମୁଖ୍ୟବକ୍ତା ଭାବେ ଯୋଗଦେଇ ବିଜୁଳି ସମସ୍ୟାର ସମାଧାନ ଦିଗରେ ଓପିଟିସିଏଲ୍ ଓ ଟିପିଏନ୍ଓଡିଏଲ୍ ମିଳିତ ଭାବେ କାମ କରିପାରିଲେ ବିଜୁଳି ମହୋସତ୍ବର ସୁଫଳ ଉପଭୋକ୍ତାଙ୍କ ନିକଟରେ ପହଞ୍ଚି ପାରିବ ବୋଲି କହିଥିଲେ। ଦଶରଥପୁର ବ୍ଳ୍କ ଅଧ୍ୟକ୍ଷ ଦିଗାମ୍ବର ମଲ୍ଲିକ ସମ୍ମାନୀତ ଅତିଥି ଭାବେ ଯୋଗଦେଇ ବିଜୁଳି ଚୋରି ଏବଂ ଏହାର ଦୂରୁପଯୋଗ ବିଷୟରେ ଜନସାଧାରଣ ବିଜ୍ଞତା ପ୍ରଦର୍ଶନ କରିବା ଊଚିତ ବୋଲି କହିଥିଲେ। ଏହି ଉପଲକ୍ଷେ ବିଜୁଳି ସମ୍ବନ୍ଧିତ ଆଞ୍ଚଳିକ କ୍ଷୁଦ୍ର ଚଳଚିତ୍ର ପ୍ରଦର୍ଶନ କରାଯାଇଥିଲା। ଓପିଟିସିଏଲ୍ ପକ୍ଷରୁ ୭ ବିଷୟବସ୍ତୁ ଉପରେ୍ ଭାଷା ପୋଷ୍ଟର ପ୍ରଦର୍ଶିତ ହୋଇଥିଲା। ପ୍ରାରମ୍ଭରେ ସହକାରୀ ଜିଲାପାଳ ତିଳୋତ୍ତମା ପୃଷ୍ଟି ପ୍ରାରମ୍ଭିକ ସୂଚନା ଦେବା ସହ ଅତିଥି ପରିଚୟ ଓ ମଞ୍ଚ ପରିଚାଳନା କରିଥିଲେ। ଶେଷରେ ଟିପିଏନଓଡିଏଲର ନିର୍ବାହୀ ଯନ୍ତ୍ରୀ ଗୌରହରି ମଣ୍ଡଳ ଧନ୍ୟବାଦ ଅର୍ପଣ କରିଥିଲେ। ଦ୍ୱିତୀୟ ପର୍ଯ୍ୟାୟରେ ଆସନ୍ତା ୨୯ ତାରିଖରେ ବିଞ୍ଝାରପୁର ବ୍ଲକ୍ର ବରୁଣେଶ୍ୱର ମହାବିଦ୍ୟାଳୟଠାରେ ଏହି ଊସତ୍ବ ଅନୁଷ୍ଠିତ ହେବ।
ସୂଚନାଯୋଗ୍ୟ, ଜିଲାରେ ବିଜୁଳି ମହୋସତ୍ବ ଚାଲିଥିବା ସମୟରେ ଏବଂ ପୂର୍ବରୁ ଘନଘନ ବିଜୁଳିକାଟ ଉପଭୋକ୍ତାଙ୍କୁ ଅତିଷ୍ଠ କରି ପକାଇଛି। ଗତ ୨୪ ତାରିଖରେ ୮ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଯାଜପୁର ସହର ଓ ଏହାର ଆଖପାଖ ଅଞ୍ଚଳରେ ବିଜୁଳି କାଟ ଯୋଗୁ ଏକ କାର୍ଯ୍ୟକ୍ରମରେ ଓଡିଆ ଭାଷା ସାହିତ୍ୟ ଓ ସଂସ୍କୃତି ବିଭାଗର ନିର୍ଦ୍ଦେଶକ ରଞ୍ଜନ କୁମାର ଦାସ ଉପସ୍ଥିତ ରହି ହଟହଟା ହୋଇଥିଲେ। କେବଳ ସେତିକି ନୁହେଁ ଯାଜପୁର ରୋଡ ଏବଂ ଏହାର ଆଖପାଖ ସମେତ ବରୀ, ଚଣ୍ଡିଖୋଲ, କୁଆଖିଆ, ଧର୍ମଶାଳା ଅଞ୍ଚଳରେ ଆଘୋଷିତ ବିଜୁଳି କାଟ ଯୋଗୁଁ ଲୋକେ ନାହିଁ ନ ଥିବାର ସମସ୍ୟାର ସମ୍ମୁଖୀନ ହେଉଛନ୍ତି। ସାମାନ୍ୟ ବର୍ଷା ଏବଂ ପବନ ହେଲେ ବିଜୁଳି କାଟ ହେବା ଦେଖିବାକୁ ମିଳୁଛି। ଦୀର୍ଘ ବର୍ଷ ହେବ ପୁରୁଣା ତାର ବଦଳା ଯାଉ ନ ଥିବାରୁ ଏଭଳି ପରିସ୍ଥିତି ସୃଷ୍ଟି ହେଉଥିବା ଅଭିଯୋଗ ହୋଇଛି। ତେଣୁ ବୈଠକରେ କେବଳ ବିଜୁଳି ଉସତ୍ବ ପାଳନ ସୀମିତ ନ ରଖି ଉପଯୁକ୍ତ ବିଜୁଳି ସେବା ନିହାତି ଆବଶ୍ୟକ ବୋଲି ମତପ୍ରକାଶ ପାଇଛି।