ପୁରୀ ଅଫିସ,୨୯।୬: ମହାପ୍ରଭୁଙ୍କ ରଥ ନିର୍ମାଣ କାର୍ଯ୍ୟରେ ବିଶ୍ୱକର୍ମା, ଭୋଇ ସେବକଙ୍କ ସମତେ ଅନେକ ସେବକ ଓ କାରିଗର ନିୟୋଜିତ ହୋଇଥାନ୍ତି। ମହାପ୍ରଭୁଙ୍କ ଏମିତି କିଛି ସେବା ରହିଛି ଯାହା ଶ୍ରୀମନ୍ଦିର ବାହାରେ ସମ୍ପାଦନ କରାଯାଇଥାଏ। ତେବେ ମହାପ୍ରଭୁଙ୍କ ସେବକ ନ ହୋଇ ମଧ୍ୟ ମହାପ୍ରଭୁଙ୍କ ସେବା କରିବା ପାଇଁ ସୁଯୋଗ ପାଇଥାନ୍ତି କେତେକ ପରିବାରର ବ୍ୟକ୍ତି। ଏହିପରି ଜଣେ ଭାଗ୍ୟବାନ ପରିବାର ହେଉଛି ପୁରୀ ସିଦ୍ଧ ମହାବୀର ଅଞ୍ଚଳର ସାଗର ସାହୁଙ୍କ ପରିବାର। ଶ୍ରୀମନ୍ଦିରର ସେବକ ହୋଇ ନ ଥିଲେ ମଧ୍ୟ ଠାକୁରଙ୍କ ଘୋଷଯାତ୍ରା ସମୟରେ ସାଗରଙ୍କ ପରିବାରକୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଖୋଜାପଡିଥାଏ। ମହାପ୍ରଭୁଙ୍କ ତିନି ରଥରେ ଲାଗୁଥିବା କାରୁକାର୍ଯ୍ୟ ପୂର୍ଣ୍ଣ ପିତ୍ତଳ ସାମଗ୍ରୀଗୁଡିକୁ ପ୍ରତିବର୍ଷ ସଫା କରନ୍ତି ସାଗର ସାହୁଙ୍କ ପରିବାର। ବର୍ଷକୁ ମାତ୍ର ୧୫ ଦିନ ମହାପ୍ରଭୁଙ୍କ ସେବାର ସୁଯୋଗ ପାଇ ସାଗର ଓ ତାଙ୍କ ପରିବାର ନିଜକୁ ଭାଗ୍ୟବାନ ବୋଲି ମନେ କରିଥାନ୍ତି।
T୯୯୦ ମସିହାରୁ ମହାପ୍ରଭୁଙ୍କ ସେବା କରି ଆସୁଛନ୍ତି ସାଗରଙ୍କ ପରିବାର। ପୂର୍ବରୁ ତାଙ୍କ ବାପା ଏହି କାର୍ଯ୍ୟ ଜାରି ରଖିଥିବା ବେଳେ ଏବେ ସେ ମହାପ୍ରଭୁଙ୍କ କାର୍ଯ୍ୟ କରୁଛନ୍ତି ଏବଂ ଏଥିରେ ତାଙ୍କ ପୁଅ ସାହାଯ୍ୟ କରୁଛି। ଘୋଷଯାତ୍ରା ସମୟରେ ମହାପ୍ରଭୁଙ୍କ ରଥ ଗଡିବା ସମୟରେ ଶ୍ରଦ୍ଧାଳୁଙ୍କ ନଜର଼ ରଥକନା ଉପରେ ପଡିଥାଏ। ଏହି ରଥ କନାରେ ପିତ୍ତଳର ସଖୀ, କଦଳୀ ଗଛ ଓ ରାହୁମୁଣ୍ଡ ମଗର, ମାଉ କଳସ ଆଦି ପିତ୍ତଳ ସାମଗ୍ରୀର ସଫା କରିବାର ଦାୟିତ୍ୱ ନେଇଥାନ୍ତି ସାଗର ଓ ତାଙ୍କ ପରିବାର। ଏ ସମ୍ପର୍କରେ ସାଗର କୁହନ୍ତି, ବୃତ୍ତିରେ କଂସାରି, ପିତ୍ତଳ କାର୍ଯ୍ୟ କରେ। ମହାପ୍ରଭୁଙ୍କ ସ୍ନାନଯାତ୍ରା ପରଦିନ ଶ୍ରୀମନ୍ଦିର ପ୍ରଶାସନ ପକ୍ଷରୁ ଚିଠି ଆସେ। ଚିଠି ମୁତାବକ ୯୬ଟି ପିତ୍ତଳ ଜିନିଷ ପ୍ରଦାନ କରାଯାଇଥାଏ। ଯେଉଁଥିରେ ପିତ୍ତଳ କାରୁକାର୍ଯ୍ୟ ପୂର୍ଣ୍ଣ ନିର୍ମିତ ମାଛ, ମଗରମୁଣ୍ଡ, ସଖୀ, ଯୋଡ଼ିହଂସ, ରାହୁମୁଣ୍ଡ, କଦଳୀ ଗଛ ଆଦି ରହିଥାଏ। ଏସବୁକୁ ମେଶିନ ଓ ହାତରେ ସଫା ସହ ଆବଶ୍ୟକ ହେଲେ ମରାମତି କରାଯାଏ। ନିର୍ଦ୍ଧାରିତ ସମୟରେ କାର୍ଯ୍ୟ ସାରି ନେତ୍ରୋତ୍ସବ ପୂର୍ବଦିନ ଏସବୁକୁ ଶ୍ରୀମନ୍ଦିର ପ୍ରଶାସନ ଜିମା ଦିଏ। ଆମ ପରିବାରକୁ ଠାକୁରଙ୍କ ସେବା କରିବାର ସୁଯୋଗ ମିଳିଥିବାରୁ ବହୁତ ଖୁସି ବୋଲି ସାଗର ପ୍ରକାଶ କରିଛନ୍ତି।
