ସମ୍ବଲପୁର,୧୦।୩(ଭବାନୀ ଶଙ୍କର ଭୋଇ): ଆତ୍ମୀୟସ୍ବଜନଙ୍କ ମୃତ୍ୟୁ ପରେ ପରିବାର ଲୋକେ ଶବ ସତ୍କାର ପାଇଁ ସମ୍ବଲପୁର ଦୁର୍ଗାପାଲିସ୍ଥିତ ସ୍ବର୍ଗଦ୍ୱାରରେ ପହଞ୍ଚି କାଠ, କିରୋସିନ ସହ ରୀତିନୀତି ପାଳନ ପାଇଁ ପୁରୋହିତ ଆଦି ଖୋଜିବାରେ ହଇରାଣ ହେଉଥିବା ଏକ ସାଧାରଣ ଘଟଣା। ଶବ ସତ୍କାରରେ ଆବଶ୍ୟକ ହେଉଥିବା ସମସ୍ତ ସୁବିଧା ଯୋଗାଇବା ପାଇଁ ରବିବାରଠାରୁ ସମ୍ବଲପୁର ସ୍ବର୍ଗଦ୍ୱାରଠାରେ ରାମଦାସ ପଣ୍ଡା ଏବଂ ସାଥୀଙ୍କ ଦ୍ୱାରା ଆରମ୍ଭ ହୋଇଛି ‘ଶେଷ ବନ୍ଧୁ ପ୍ରକଳ୍ପ’।
ମୃତଦେହ ସ୍ବର୍ଗଦ୍ୱାରରେ ପହଞ୍ଚିବା ପରେ ସର୍ବନିମ୍ନ ଏବଂ ସରକାରୀ ଦରରେ ସତ୍କାର ପାଇଁ ଆବଶ୍ୟକ ରହିଥିବା ସମସ୍ତ ସାମଗ୍ରୀ ଯୋଗାଇ ଦିଆଯିବାର ବ୍ୟବସ୍ଥା କରାଯାଇଛି। ସାମ୍ବାଦିକ ଭବନଠାରେ ଆୟୋଜିତ ଖବରଦାତା ସମ୍ମିଳନୀରେ ଏନେଇ ରାମଦାସ ପଣ୍ଡା ସୂଚନା ଦେଇଛନ୍ତି।
ଆତ୍ମୀୟଙ୍କ ମୃତ୍ୟୁ ପରେ ସମ୍ପର୍କୀୟମାନେ ଶୋକ ଓ ଚିନ୍ତାଗ୍ରସ୍ତ ରହିଥିବାବେଳେ କେଉଁଠୁ କଣ ସାମଗ୍ରୀ ଯୋଗାଡ କରିବାକୁ ପଡେ ତାକୁ ନେଇ ହଇରାଣ ହେବାକୁ ପଡିବ ନାହିଁ। ଦୀର୍ଘ ୧୫ବର୍ଷରୁ ଅଧିକ ସମୟ ହେବ ସମ୍ବଲ ଅନୁଷ୍ଠାନ ମାଧ୍ୟମରେ ୮୦୦ରୁ ଅଧିକ ଶବ ସତ୍କାରରେ ସହଯୋଗ କରିଥିବା ରାମଦାସ ପଣ୍ଡା ସତ୍କାର ସମୟର ଅସୁବିଧା ସମ୍ପର୍କରେ ଜାଣିଥିଲେ। ସମ୍ପର୍କୀୟମାନେ ମୃତଦେହ ସତ୍କାର କିପରି ସୂଚାରୁ ରୂପେ କରିପାରିବେ, ସେଥିପାଇଁ ଏକ ଛୋଟ ପ୍ରୟାସ ଶେଷ ବନ୍ଧୁ ନାମରେ ପ୍ରକଳ୍ପ ଆରମ୍ଭ କରାଯାଇଥିବା କହିଛନ୍ତି।
ଏଥିରେ ମତଦେହ ସତ୍କାର ପାଇଁ ଆବଶ୍ୟକ ହେଉଥିବା ଶବ ବାହକ ଗାଡି, କାଠ, ବିଡା କାଠ, କିରୋସିନ, ପଣ୍ଡିତ, ଅନ୍ୟାନ୍ୟ ସମସ୍ତ ସାମଗ୍ରୀ ଯୋଗାଇ ଦିଆଯିବ ବୋଲି କୁହାଯାଇଛି। ମହାନଗରନିଗମ ଦ୍ୱାରା ଧାର୍ଯ୍ୟ କରାଯାଇଥିବା ଦେୟ ବ୍ୟତୀତ ଆଉ କୌଣସି ଦେୟ ଦେବାକୁ ପଡିବ ନାହିଁ।
ବର୍ତ୍ତମାନ କେବଳ ମହାନଗର ନିଗମରେ ଏହି କାର୍ଯ୍ୟକ୍ରମ ଆରମ୍ଭ କରାଯାଇଛି। ଏଥିରେ ବିଭିନ୍ନ ସାମାଜିକ ଅନୁଷ୍ଠାନ ସହଯୋଗ କରୁଛନ୍ତି। ଖବରଦାତା ସମ୍ମିଳନୀରେ ସୁବ୍ରତ କୁମାର ପଣ୍ଡା, ବିପିନ ବିହାରୀ ପଣ୍ଡା, ନନ୍ଦକିଶୋର ଅଗ୍ରୱାଲ, ସନ୍ତକ ପଣ୍ଡା, ଅମିତ କୁମାର ସ୍ବାଇଁ, ବିପ୍ଳବ ଦଣ୍ଡସେନା ଏବଂ ନୀଳକଣ୍ଠ ସ୍ବାଇଁ ପ୍ରମୁଖ ଶେଷବନ୍ଧୁର କର୍ମକର୍ତ୍ତା ଉପସ୍ଥିତ ଥିଲେ।