ବାରିପଦା ଅଫିସ,୩ା୨: ମୌଳିକ ସୁବିଧାରୁ ବଞ୍ଚିତ ମୟୂରଭଞ୍ଜ ଜିଲା ବଡ଼ସାହି ବ୍ଲକ ଅଧୀନ ପୂର୍ଣ୍ଣଚନ୍ଦ୍ରପୁର ପଞ୍ଚାୟତ କମଳାଶୋଳ ଗ୍ରାମବାସୀ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଭୋଟ ବର୍ଜନ କରିବେ ବୋଲି ଚେତାବନୀ ଦେଇଛନ୍ତି। ଏନେଇ ମଙ୍ଗଳବାର ଶତାଧିକ ମହିଳା ପୁରୁଷ ବାରିପଦା ସଦର ଉପଜିଲାପାଳଙ୍କୁ ଦାବିପତ୍ର କରିଛନ୍ତି। ଜିଲାପାଳ ଓ ବଡ଼ସାହି ବିଡିଓଙ୍କୁ ମଧ୍ୟ ଅବଗତ କରି ବିହୀତ କାର୍ଯ୍ୟାନୁଷ୍ଠାନ ଲାଗି ଦାବି କରିଛନ୍ତି।
ଏହି ଗ୍ରାମରେ ଥିବା ୮,୯ ଓ ୧୦ନଂ. ୱାର୍ଡରେ ପାଖାପାଖି ୭ଶହରୁ ଊର୍ଦ୍ଧ୍ୱ ଭୋଟର ରହିଛନ୍ତି। ଏହି ୱାର୍ଡ ଗୁଡ଼ିକରେ ଶିକ୍ଷା, ସ୍ବାସ୍ଥ୍ୟ, ପାନୀୟଜଳ, ଗମନାଗମନ, ବିଦ୍ୟୁତ୍ ଆଦି ସମସ୍ୟା ଦୀର୍ଘ ବର୍ଷ ଧରି ରହିଆସୁଛି। ନିର୍ବାଚନ ଆସିଲେ ମାଳ ମାଳ ନେତାଙ୍କ ପ୍ରତିଶ୍ରୁତି ବ୍ୟତୀତ ଅନ୍ୟକୌଣସି ମିଳି ନ ଥାଏ ବୋଲି ଗ୍ରାମର ରବୀନ୍ଦ୍ର ସିଂ, ସୁରେନ୍ଦ୍ର ସିଂ ପ୍ରକାଶ କରିଛନ୍ତି। ଉକ୍ତ ୱାର୍ଡର ବହୁ ହିତାଧିକାରୀ ବିଜୁ ପକ୍କାଘର ଓ ପ୍ରଧାନମନ୍ତ୍ରୀ ଆବାସ ଯୋଜନାରୁ ବଞ୍ଚିତ ହୋଇ ନୁଅଁାଣିଆ ଚାଳଛପର ଘରେ ଦିନ ବିତାଉଛନ୍ତି। ୨୨ନଂ. ଜିଲାପରିଷଦ ଜୋନ ଅଧୀନରେ ଏହି ୩ଟି ୱାର୍ଡ ରହୁଥିବା ବେଳେ ଜିଲାପରିଷଦ ସଦସ୍ୟ, ସରପଞ୍ଚ, ସମିତିସଭ୍ୟ ଓ ୱାର୍ଡସଭ୍ୟମାନେ ନିର୍ବାଚିତ ହୋଇ ବ୍ୟକ୍ତି ସ୍ବାର୍ଥପ୍ରତି ଧ୍ୟାନ ଦେଉଥିବା ଗ୍ରାମବାସୀ ଶୁକଦେବ ସିଂ, ରାମ ସିଂ, ଦେବ ସିଂ ଅଭିଯୋଗ କରିଛନ୍ତି।